HLAHEI 74 - LEKHARABU INTHENG (BSI)Jât Hukna sik a Derna 1 Eh! Pathen, heisa mo hing hinna nadahlon jo ung? Namihei chunga ahei tik a, nahnuk namannat ṭhak sik jo mo? 2 Hmalaia inphut nang sik a nakadei jo hei, hmalaia inphut nata sik a nakadeisōt hei, naphung manchang sik a, ansōk changna inphut najōng ṭhōisōt hei, namihei kha mandonsōt hei roh. Vōi khat a nalei omna Zion kha mandonsōt roh. 3 A’nsuksetpet jo khōpui he’m valôn ina va-en roh; kan-inrepui he’n Bek-inn shunga heirakip ansuksetpet jo. 4 Nang inrepui he’n nabek-inn shunga, kantor jo tia ka-ông hei; khana antorna kha malârna, pōnlek hei anphun joa kae. 5 Anmani kha hreicha vâng thing katuthlek mihei anpō. 6 Kot-ke thingpek rakip kha hreicha leh, hreikhup vânga antuk manchip jo hei. 7 Nabek-inn kha anvōkkhōia hmei vâng anro jo; nang kamukna hmun kha anmanbōk sō jo. 8 Pui katluk a suk manhmang sik a anmadu ung, ram shunga hmun intheng rakip kha hmei anro sō jo. 9 A’ntheng mêrchîkna kanneinâk rakip um om mak jo; sânkathem inkhatbek um indahlon mak jo, khana hivahi heituk kasôt sik mo tûte’num manhret mak hei. 10 Eh Pathen, kan-inrepui he’n heichen mo sem antalamanlo sik che? Narahming kha ahei tik chen a antahnōise ṭhak sik jo mo? 11 Heisa mo keini inthōpui sik hi akahnōm mak che? Heisa mo nakut kha nakahnung ting napinsui jo? 12 Tâk-kha, nang chu akungbia inphut kanreng hongkachang che, Eh Pathen; hmun katamtak a nang in naleihuk jo ung. 13 Nahratna vâng khan tui-ôngpui naṭhen tor, khana tuipui shunga khōhri hei lu navōkkhōi tor. 14 Nang in tuipui shunga khōhripa Leviathan lu kha nasuk manchip, ataksa kha nêrdi kâra shahei tasâk sik a napek hei. 15 Nang in tuiri kapût leh tuisi namanlōng hei; khana tuidung kalenhei kha’m namanchâr hei. 16 Nang in sûn leh jân nasyemsōt; khana kani leh thla hei kha anhmun et a nada hei; 17 nang in ralei chaina, kekung keler nasyem; khana khōlum leh phebi um nasyem. 18 Tâk-kha na’nrepui he’n anmanuisōna che kha mandon roh, O Rōngpu, anmani chu Pathen neimak hei, khana nang anhnōise chea kae. 19 Inṭangpui kase namihei kha, an-inrepuihei hneng dahlon mak hei roh; suk manrim jo namihei kha mahngi mak hei roh. 20 Keini leh intepna nasyem kha mandonsōt roh. Ram shunga rakir inthimna rakip a khan innâk-insena ka-om jo. 21 Mi tamanrim jo hei kha inzakna manchen mak hei roh. khava sara leh akatlasam hei khan choi ka-ân hei che rasoh. 22 Eh Pathen, thōi ina nadikna kha hrung roh! Khōvel he’n sûn nilun antamanuisō che kha mandon roh! 23 Na’nrepui he’n hnuk kana tak a an-ôngna, nakadōihei bângtik neilo rasa inhrek kha mahngi mak roh. |
Komrem Revised Bible - LEKHARABU INTHENG
Copyright © Bible Society of India, 2015.
Used by permission. All rights reserved worldwide.
Bible Society of India