HLAHEI 73 - LEKHARABU INTHENG (BSI)

ARUP INTHUMNA ( Hl 73—89 ) Pathen Dikna

¹ Pathen hi Israelhei sik, malung intheng hei sik a akaṭhatak kha kae.

² Tâk-kha kei chu kahlamrinna le’nhmangvet jo; khana kataksenna leikatlangvet jo;

³ ajârchu mikaṭhamak-hei hringkhō anhōi kahmu pha, an-inlensakna kha kalei ra-ôt joa kae.

⁴ Anmani’n natna thōkmak hei, kahrat hei, khana antak kaṭha.

⁵ Milak-hei kapōa khōdeng theimak hei; milak-hei kapōa anmani chu bōina neimak hei.

⁶ Khana anmani’n inlensakna kha maṭhi kapōa an-or, khana rumhrat kha pōn insi kapōa ansi;

⁷ anmalung khan ṭhatmak rōk akeisō, khana anmandona kha akaṭhamak mantlukna ting insaler hei.

⁸ Anmani’n mihei kha anmanuisō heia ṭhatmak rōk anhri; anmani inlensak hei khana mihei suksetna sik rōk anmantluk.

⁹ Marvân chunga ka-om Pathen kha anhrimaset, khana raleichung mi rakip hneng êngset a ṭong pekna annei,

¹⁰ hivahi Pathen mihei kapha’n anmani langting ansor heina sik, antahri rakip kha malung kahluttak a antaksenna sik a kae.

¹¹ Anmani’n anti, “Pathen in manhret mak ning; Chunghnung in hmusōt mak ning.”

¹² Mikaṭhamak-hei khachu hing’hin kati heia kae. Katluk a annei, khava chunga anhmusa chet-chet a kae.

¹³ Ke’n heite setna tlo loa ka-om hi, kabinga inthenga kaka-om hi heite hnemmak jo mo?

¹⁴ Eh Pathen, nang in sûn nilun khōdeng nani manthei eng; jîngkâr katai nang in karâkna napek eng.

¹⁵ Ke’n khavahei seng kha kaleihri jo’nchu nami inkhat kapōa leichôn mak jo ning.

¹⁶ Hiva bōina hi manhretna sik a rahnak a kaleitlo, tâk khavahei kha kei sik le’ntak hêr

¹⁷ na-Bek-inna kahlut mak hma seng khan chu. Khava sōa chu mikaṭhamak-hei chunga heimo ahong kasōk sik kahong manhret jo.

¹⁸ Anmani inpai inthlûkna hmun innea nada sik hei an-inhmangna sik a namathlâksuk sik hei!

¹⁹ Anmani khavatak a khan suk manhmang jo hei kae; anmani kha ṭit ka-om tak inchaina kha ansor jo.

²⁰ Rōngpu, anmani kha jân rahmang jîngkâra a’nhmangsō kapōa, najena inphut nahong thōi pha anmani le’nhmang jo hei.

²¹ Kamandonna akōi joa kamalung inrimna asip jo pha,

²² kei hi ranhringhei kapōa leikamo eng; ke’n nang leimanhret tor mak che eng.

²³ Achang ravâng nahnenga kahnaia ka-om ṭhak eng. Khana nakut vâng namatu ṭhak eng.

²⁴ Namansena vâng naṭhōi ṭhak eng, khana achaiting chu kalûrtak a narahlâng sik eng.

²⁵ Nang teilo marvâna ke’n tu mo kanei? Nang rōk kae. Nang kanei jo che jâra raleichunga heimo kalamadu nôk sik?

²⁶ Kamalung leh kataksa atlâksam jo’num, Pathen hi karatha hratna kae; ama rōk hi karangei kae.

²⁷ Nang kahlonsōt hei kha kathi nger sik hei; nahnenga taksenthei kachangmak hei kha nasuk manram sik hei.

²⁸ Tâk-kha kei sik chu, Pathen hnenga oma Chunghnung Rōngpu sânsōtna jonga aṭōntlo rakip hrimanthang sik hi heituk a akahōi inlak jo mo!