HLAHEI 72 - LEKHARABU INTHENG (BSI)Reng sik a Derna 1 Eh Pathen, reng kha nadikna vânga ṭong atanna sik a manthei roh, naṭongtan kadik kha chen neipui roh, 2 kha achang inchu namihei chunga kadiktak a vai arôn sik, khana mi inrenghei kha’m kadiktak a a-en manhōi tor sik hei. 3 Ram shunga nei leh hao pung rasoh; akadik kha leng rasoh. 4 Reng khan kadiktak a sarahei chunga ṭong tan rasoh; khana akatlasam hei kha inthōpui hei rasoh khana ankasuk inrim hei kha torpek hei rasoh. 5 Kani’n avâr asat lai seng, thla’n avâr apek lai seng, akahong sik khang rakip a nami he’n kamuk hei che rasoh, 6 Rengpa kha hleipuk a khō kasûr kapō, tlâng kachâra khō cher-cher katla kapō ang rasoh. 7 Ahringkhō shunga dikna kha khang ṭhak rasoh, khana thla’n avârlai seng nei leh hao pung rasoh. 8 Arengram kha tui-ôngpui inkhat in inkhat a sunbit rasoh, Euphrates tuidunga inphut ralei inchaina katlung chang rasoh. 9 Nêrdiram mihe’n a-âng kunga inkun sik hei; a’nrepuihei khan raleia anbinga inbok sik jo hei. 10 Spain ram leh tuikekâk a renghei khan kutchoi anhongpek sik, Sheba leh Seba reng he’n kutchoi anhongpek sik. 11 Rn rakip ahmai kunga inkun sik hei, jât rakip in ama anrazen sik. 12 Ama kabek sarahei, khana akatlasam leh donmak hei kha ahuk hei. 13 Ama’n akatlasam leh sarahei lungsetna anei hei; akatlasam hei hringkhō ahuk hei. 14 Anmani kha suk manbōina leh invōk-inthat a inphut ahuk hei, anhringkhō kha ahnenga mankatamtak hei kae. 15 Reng kha ahringsei sôt rasoh! Sheba ram a sana kha ama pek hei rasoh; ama sik a derna ahei tik a neipek hei rasoh; Pathen mahâmṭhatna achunga tlungṭhak rasoh! 16 Aram shunga khan sâng leh be siptak rasoh; Lebanon ram kara kaṭha kapōa, hmebunghei kha sâng leh be’n makhu rasoh. Hleia kahar kahmông kapōa, akhōpui shung kha mihe’n siptak hei rasoh. 17 Rengpa rahming kha mahngia om hêrmak rasoh; arahming inthang kha kani a-omlai seng om rasoh. Pathen in rengpa vâng apek kapōa vângṭhat apekna sik hei, jât rakip in Pathen hneng inder hei rasoh. 18 Israelhei Pathen Rōngpu kha choi ka-ân ruh! Ama rōk in hiva det-hla hei hi atlosōt kae! 19 Arahming kalûr kha ahei tik a choi ka-ân ruh! Alûrna khan raleichung sipsō rasoh. Amen! Amen! 20 Hivahi Jesse sapa David derna achaina kae. |
Komrem Revised Bible - LEKHARABU INTHENG
Copyright © Bible Society of India, 2015.
Used by permission. All rights reserved worldwide.
Bible Society of India