HLAHEI 71 - LEKHARABU INTHENG (BSI)

Kater Inkhat Derna

¹ Rōngpu, nahuk sik enga kahong eng; tûte amantor mak hei roh!

² Ajârchu nang chu akadik che kae, a’nthōpui roh eihuk roh, kangekna arangei pek roh khana eihuk roh!

³ Nang, inhukna, in-ungna leh akahnet karekur achang pek roh; Nang ka’n-ungna leh anikasen che kae.

⁴ Ka-Pathen, mikaṭhamak heia inphut, mi nun kasehei leh akaṭhamak-hei rathahrat a inphut, ahuksōt roh.

⁵ Chunghnung Rōngpu, nachunga inhōrna kanei; kasinlaia inphut nang kahong taksen jo che kae.

⁶ Kahringkhō pumpui nanga ajōng inhnga eng kae; kaho’ntet bia inphut nang in najōng kahuk eng kae. Ke’n kachoi ka-ân ṭhak sik che.

⁷ Kahringkhō hi mihei sik a tekhing inkhat kae, ajârchu nang chu akahrat ani kasenpa che kae.

⁸ Sûn nilun nang kachoi ka-ân che khana nalûrna kha kahri manthang.

⁹ Kater jo jâra ahlon sōt mak roh; kataksa atlâksam jâra adahlon mak roh!

¹⁰ Kei inrepuihei khan that sik a anmadu eng. Kei dekna sik inbe heia ṭōn anmantluk.

¹¹ Anmani’n anti, “Pathen in ama adahlon jo; eini’n akahnung jui me sona sur rih; ama kahuk sik tûte om mak jo.”

¹² Eh Pathen, kahlatak a va-om mak roh; ka-Pathen, kei inthōpui sik hong inrang roh!

¹³ Ani kabuhlu hei kha hmaimôkna leh inzakna chen hei rasoh! Kei kasukset sik a akatlohei kha inzakna leh hmesetna chen hei rasoh.

¹⁴ Ka’nhōrna nahnenga kadaṭhak sik; Akakhe chet a kachoi ka-ân sik che.

¹⁵ Naṭhatna kha kahri sik; khavakha kamanhret pet tor mak inum, sûn nilun nahuk sōtna ṭong hi kahri sik.

¹⁶ Rōngpu Pathen ratha hratna shunga ka-om sik eng; nang ṭhatna, nang rōk ṭhatna kha kahri manthang sik.

¹⁷ Kanaipang chang laia inphut nalei manthei jo eng kha, tûn katlung nang ṭōn inlak-hei kha kahria kae.

¹⁸ Tûnchu kater jo eng, kalua sam kabang jo, adahlon mak roh, Eh Pathen! Akahong sik khang rakip a naratha neina leh nahratna kaphông lai seng a-ompui roh.

¹⁹ Pathen, nadikna khan bōirōk chunghei aphâk. Nang in ṭōn kalen natlosōt hei; nang kapō tûte om mak.

²⁰ Nang in kachunga bōina leh inrengna napek eng, tâk nang in karatha namanhrat pek nôk sik eng; thlâna inphut nakeisōt sik eng.

²¹ Hma kanek a namanlen det sik eng; nang in lungam namannei nôk sik eng.

²² Serângdâr leh inṭhōia kachoi ka-ân nger sik che; Ka-Pathen ke’n taksenthei nachangna kha kachoi manshâng sik. Israelhei A’nthengpa! Namanpâkna hla serângdâr vâng kamanjui sik.

²³ Nang sik a serângdâr kamanjui pha inpâk a ka-ông sik eng; kamalung pumpuia hla kasak sik ajârchu nang in nahuk enga kae.

²⁴ Ke’n nadikna kha sûn nilun kahri sik, ajârchu kei inhmangna sik katlohei kha nator heia inzak napek heia kae.