HLAHEI 64 - LEKHARABU INTHENG (BSI)

Hrungna sik a Derna

¹ Kei khōdeng theina ka-om jo eng, Eh Pathen, kaderna arangei pek roh! Kei inrepuihei kha kaṭit jo hei, kahringkhō ahuk roh!

² Mikaṭhamak-hei ṭōnmantluk a inphut, akaṭhamak mipui kachōr heia inphut ahuksōt roh.

³ Anmaleihei kha chemjâm kapōa anmanngei, khana thepui hei kapōa ṭong-êng vâng anradina kae.

⁴ Inzakna neiloa maleisei semsōt sik kha inrang hei; anṭitset pum a mihōnna vâng khan mikaṭhahei kha ansuk manhmang hei.

⁵ Ṭhatmak mantlukna khan khat leh khat mathokna innei hei; khana anchâng hei kha khon mo antakam sik ti kha intluk hei, “Tûte’n eihmu mak hei ning,” anti.

⁶ Akaṭhamak anmantluk a khana anti, “Pui katluk inse innâkna nimantluk jo.” Mihring malung leh mandonna hei hi a’n-ip inkhat kae.

⁷ Tâk-kha Pathen in anchunga the vâng ajōng kâp hei, khana manhret manlo jen a atôn hei.

⁸ Khava anṭonghri jâra amanhmang sik hei; anmani kahmu rakip in anlu ankachuk sik.

⁹ Ankhenga kaṭi sik jo hei, Pathen taleitlo kha anmandon sik jo, aṭōn leitlo hei kha anhri sik jo.

¹⁰ Pathen ṭōn leitlo jâra khan mikadik-hei inpâk sik hei. Ama hneng inhukna anhmu sik; mikaṭha rakip in anchoi ka-ân sik jo.