HLAHEI 62 - LEKHARABU INTHENG (BSI)

Pathen Hrungna Inngampuina

¹ Kei kahuk sik a Pathen kha malung kahlut a kaleihngâk; ama hneng rōk inngâi eng.

² Ama rōk in ahrung eng khana ahuk eng; ama hi ani kasenpa kae khana tûte’num ator hêrmak ning.

³ Rape katlu kapōa ka-om mi inkhat kha pha heichen hrep mo atorna sik nankhenga nantabuhlu hi sik?

⁴ Ama kajana hmun a inphut keimathlâk sik rōk kha nanta madu kae; maleisei kha akahōia nansak. Mahâmṭhat ṭong chu nanhri, tâk nanlungria chu ama nanhâksêr.

⁵ Pathen hneng rōk a kei in-ngai eng; ahnenga inhōrna kanei.

⁶ Ama rōk in ahrung eng khana ahuk eng; ama hi ani kasenpa kae, kei ator hêrmak hei ning.

⁷ Kei inhuksōtna leh kajana hi Pathen hnenga ka-om; ama kha akahrat ani kahrungpa kae. ama hi ka’n-ungna pa kae.

⁸ Kamihei, pha rakip a Pathen kha taksen ruh! nankhōdeng theina rakip hei kha manthei ruh; ajârchu ama hi ni’n-ungna kha kae.

⁹ Mihring hringkhō hi kaphuk masakhat kapōhrep kae. Kasin-kalen in-angtlinga hnemna kase kae. Atena hmangchâk chunga makhei hei ruh heite’m hrikmak hei ning, kaphuk masa inkhat kanek a kayâng jôk hei.

¹⁰ Rumhrat chunga hlamrinna kha damak roh; marûk neinâk vânga hnemna chen sik inhōr mak roh, nanei kha ahong pung jo’num khahei chunga inngammak roh.

¹¹ Rathahrat hi’m kata kae tia, Pathen in vōi khat kakhea ahri kathei.

¹² khana alungsetna hi inthleng phungmak. O Rōngpu nangkhet in mi rakip ama ama ṭōntlo dungjuia tloman napek hei.