HLAHEI 60 - LEKHARABU INTHENG (BSI)

Huksōtna sik Derna

¹ Eh Pathen, nahlon sōt jo ung, nator jo ung; kanchunga nahnuk leikana jo, tâk tûnchu kanhnenga ho’nle nôk jo roh!

² Ram hi naman nôk jo, khana naṭhen man-âng joa kae; tûnchu an-intônna hei kha mandam hei roh, ajârchu khahei kha ahar-ahak a ka-om joa kae!

³ Namihei kha khōdeng namanthei hêr jo hei; ju inrui kapōa keini kanhek kanhek a kalôn jo ung.

⁴ Nang kaṭit hei kha thi leh nat a inphut antlânsōt theina sik ṭong napek hei.

⁵ Nahratna vâng khan ahuksōt roh; kanderna amasôn roh, nalungset mihei kha huksōt anchen theina sik a.

⁶ Ahmun inthenga inphut Pathen in ajōng hri, “Re katorsōa Shechem kha kakhōiṭhen sik, khana Sukkoth phaicham kha kamihei kasem pek sik hei.

⁷ Gilead keita kae, khana Manasseh hi’m kae; Ephraim kei lukhu kae, khana Judah hi kei reng khōnghre kae.

⁸ Tâk-kha Moab kha ka’nsina thlengkông inkhat a kahmang sik, khana Edom kha kei akapu eng kae ti malârna, kakekōk dana akachang sik kae. Philisti he’n kei antor sik enga kha ka-ông sik ung tia antamandon mo?”

⁹ Eh Pathen, rekur takake khum khōpui kalen shunga son tu’n mo kei aṭhōi manhlut sik eng? Edoma tu’n mo kei aṭhōi sik eng?

¹⁰ Kadiktak a nahlon sōt jo ung mo? Kanremihei hlam hma akeipek mak tin che mo?

¹¹ Ka’nrepuihei kadōia abôm roh, ajârchu mihring inthōpuina khachu hnemna kase kae.

¹² Pathen kha kanlangting a’nṭang inchu torna kannei sik; ama’n kankadōi hei kha ator sik hei.