HLAHEI 59 - LEKHARABU INTHENG (BSI)

Inhukna sik a Derna

¹ Ka’nrepui heia inphut ahuk roh, ka-Pathen; Ani kabuhlu heia inphut asansōt roh!

² Mikaṭhamak heia inphut ahuksōt roh; Mikathat heia inphut akeisōt roh!

³ Enroh! that sik a anhngâk jo eng; mi kakhôk hei khan kei kadōia intûp hei. Hivahi heikhat setna a-emak leh dikmak kaleitlo jâra changmak,

⁴ O Rōngpu, hinghrep inranga kei chunga a’ntluk hei hi heikhat kaṭhena om jâra changmak.

⁵ Akahrat chunghnung Rōngpu Pathen, thō roh, ka’nthōpui sik a jōng roh; Israel Pathen nangkhet in hmu hei roh! Inṭhang ina nang inhret mak hei kha karâkna pek hei roh. mikaṭhamak, mikahōnhei kha anchunga lungsetna malârmak roh!

⁶ Anmani kha khōhleia he’nle hei, khōpui kalen shunga anlôn lelena, uihei kapōa anha anmalît.

⁷ Anmani’n mi inzak antapek hei leh antamaṭhit hei kha rangei roh. Anmaleihei kha anbei shunga chemjâm ka-ang hei, achang inum anmani ṭong chu tûte’n theimak hei tia anmandon.

⁸ Tâk-kha Rōngpu, anmani namanuisō hei; khana khōvelhei kha namanuisō hei.

⁹ Nang ratha hratna chunga inngamna kanei; Eh Pathen, nang kei inthupna che kae.

¹⁰ Ka-Pathen in alungset eng khana kahnenga kahong sik; ani ka-en kadahei hmaimôk chen kha amanhmu sik eng.

¹¹ That mak hei roh, Eh Pathen, anthibât inchu kami he’n anmahngi bât sik che. Khava kanek a chu, O Rōngpu, kankasanpa, narathahrat vâng khan kathek hei ina torcher hei roh.

¹² Setna hi anhmura khan ka-om; anṭong rahme hei kha setna rōk kae, an-inlensakna khan anmani kalalen sur hei rasoh. Ajârchu mi anhâksêra anmalei kaseia kae.

¹³ Nahnuknat vâng khan suk manhmang hei roh; pui katluk a suk manhmang hei roh. Khan chu, Pathen in Israelhei chunga vai arôn, khana avai rônna kha raleichung pumpuia katlung ti kha mi rakip in anmanhret sik jo.

¹⁴ Ani ka-en kadahei kha khōhleia he’nle hei, khōpuia anlôn lelena anha anmalit a mi anhnget hei,

¹⁵ uihei kapōa sâk kajōnga kalôn lele hei sâk sik katluk a anhmumak pha anrasa kachōr hei.

¹⁶ Tâk-kha kei chu nahratna kha hla vânga kasak sik; jîngkâr katai nalungset inthlengmak kha hla vâng inshângtak a kasak sik. Nang chu kei inthupna leikachang che, kalei inrenglai katlungna leikachang che.

¹⁷ Kakahrungpa nang kachoi ka-ân sik che. Ka’nthupna hi Pathen kae, ani’nlungset Pathen kae.