HLAHEI 58 - LEKHARABU INTHENG (BSI)

Akaṭhamak-hei Karâkna sik a Derna

¹ Vaikarôn chei in ahei tik a akadik mandonna nantanei mo? Mi rakip chunga inthengtak a ṭong nantatan mo?

² Kha changmak! Nantatlo tor ṭhatmak rōk kha nanmandon, khana ram shunga innâk-inse ṭōnse rōk nantlo.

³ Akaṭhamak katlohei chu anhringkhōa nanhngâk lai khan kase hei, anjōng intet ninga inphut maleisei anhri.

⁴ Mari kapōa anmalei kha tûr kasiptak; kōr kaset rasok kapōa ankōrhei kha ansing hei,

⁵ mari dôi kachoihei tatum mahring rasa akatheimak, a-emak leh dôi kathemhei ṭongsânna akatheimak ka-ang hei.

⁶ Eh Pathen, hiva ṭit ka-om tak shabakkaihei ha kha vōk mathlek pek hei roh.

⁷ Tuilōng kachâr kapōa châr hei rasoh, hlamlaia kahar kapōa chōn rachi hei rasoh.

⁸ Bōnnâng kâra sōkse akatla inhlut kapōa khan tla inhlut hei rasoh; khō lakahmu mak naidông kathi kapōa thi hei rasoh.

⁹ Anmani’n khavakha anmanhret mak lai phi kapōa tuk manjâma ka-om hei; anmani kha kahringa an-om pum a Pathen hnuk natna khan asêmhlon sik jo hei.

¹⁰ Setna katlohei chunga karâkna kha anhmu pha mikadik-hei kha inpâk sik jo hei; anmani’n mikaṭhamak-hei thisen kha tuipea anpe sik.

¹¹ Mipui he’n anti sik, “Mikadik kha tloman anpek takbak jo hei; raleichunga ṭongkatan Pathen chu ka-om takbak a kae.”