HLAHEI 53 - LEKHARABU INTHENG (BSI)

Mihringhei Ṭhatmakna

¹ Mikamo he’n anbinga “Pathen om mak” anti, ankhenga ṭhamak hei, khana ṭōnse ṭit ka-om tak hei antloa kae; akaṭha katlo inkhatbek um om mak hei.

² Mikasing inkhatbek a-om inchu, ama inmuk inkhatbek a-om inchu khava hmusōtna sik a marvâna inphut Pathen in ajōng en.

³ Tâk-kha anmani ankhenga inhesōtpet jo hei; ankhenga in-ang et a ṭhamak hei. Ankhenga akadik katlo om mak hei, inkhatbek om mak hei.

⁴ Pathen in ader, “Anmani’n manhret mak hei mo? Hiva ṭhatmak katlohei hi heite inhret mak hei mo? Anmani hin kamihei anchom heia hringna annei, khana kahnenga adertet mak hei.” ati.

⁵ Tâk-kha anta leiratō phung hêrmak ṭit-inpirna kha anratō sik jo, ajârchu Pathen in ami kadōihei ru leh râng akathek kachek sik. Pathen in anmani kha ahlon sōt jo hei, achang jâra Israel he’n pui katluk a antator sik hei kae.

⁶ Ziona inphut Israelhei hneng torna kha ajōngna sik heituk-hrep mo kader. Pathen khan nei leh haona avea amanpung pek hei pha Israel mipuihei kha heituk a akahōi sik jo hei mo!