HLAHEI 5 - LEKHARABU INTHENG (BSI)

Inhrungna sik a Derna

¹ O Rōngpu, kaṭong hri hei eirangei pek roh, khana ka’nphuna hei athei pek roh.

² Kareng leh ka-Pathen, inthōpuina sik a kaṭana eirangei pek roh, O Rōngpu nahnenga kader che;

³ Jîngkâra nang in karasa nathei; kani ahong sōk pha derna kahong nei che, khana naṭong masôn kahngâk a kae.

⁴ Nang chu akadik mak ṭōn intlo chunga akatlâi Pathen kha changmak che. Nahmai kunga akaṭhamak om sik nang in hnōm mak che.

⁵ Nang in mi inlensak-hei kha en-hnâm tor mak hei che; mikaṭhamak rakip namater hei.

⁶ Nang in malei kasei rakip nathat manram hei khana innâk-inse leh mikahōnhei nahōt hei.

⁷ Tâk-kha nalungsetna eng alen jâra na-inn shunga hongkahlut tor eng; nabek-inn intheng shunga kakamuk thei che; khana kajatak a nahnenga inkun enga kakamuk thei che.

⁸ Rōngpu ka’nrepui khangtuk hrep katam hei; nalungdo tlona sik aṭhōi roh; nahlam kahro theina sik asyem mantlun roh!

⁹ Ka’nrepuihei tahri kha taksenthei chang hêrmak: anmani’n suk manhmang sik rōk anmadu. Anbeisō kha kahōia inne, tâk thitheina mihōnna kasiptak.

¹⁰ O Rōngpu, maset manchen hei roh khana karâkna pek hei roh; anṭōn marûk mantluk khan an-inhmangna chang rasoh. Nang kadōia rōi chaper antlona leh ansetna atam jâra anmani nahmai kunga inphut hnongsōt hei roh.

¹¹ Tâk-kha nanga inhukna kahmu rakip inpâk sik hei; anmani’n tlaina hla ansakṭhak sik. Nang inlungset hei kha hrung hei roh. Nang jâra anmani kadiktak a a’npâk hei kae.

¹² Rōngpu naṭong kajuihei kha vângṭhat napek hei; nalungsetna khan pho kapōa anmani akhâr hei.