HLAHEI 46 - LEKHARABU INTHENG (BSI)

Pathen in A-ompui Me

¹ Pathen kha ni’nthupna leh nihratna kae, ahei tik a nikhōdengthei pha ani inthōpui sik a intluk ṭhak.

² Khava jâra ralei a’nnok inum, hmebunghei tui-ôngpui shunga anhlutsō jo’num;

³ tuipui in-nông inhnak a a-ông inum, hmebunghei inhnaktak a a’nnok inum, eini’n ṭitmak min.

⁴ Chunghnung ama inn inthenga khan, Pathen khōpuia khan inpâkna ajōng karôn tuidung inkhat ka-om.

⁵ Khōpuia khan Pathen ka-om, suk manset chang hêrmak jo ning; jîng khōvâr hmatak a khava inthōpui sik a kahong sik.

⁶ Jât-hei ṭit-inpirna annei, rengramhei innok hei; Rōngpu hong inhrung khana ralei kha kajorsō.

⁷ Chunghnung Rōngpu’n a-ompui me; Jacob Pathen kha ni’nthupna kae!

⁸ Hong ina, Rōngpu ṭōntlo kha hong-en ruh! Enruh, heituk a inlak ṭōn raleichunga atlo mo.

⁹ Ama’n raleichung rakip a re kha amanbâng; Sai asuk mathlek hei, kasei asuk manhmang hei, khana pho kha hmeia aro hei.

¹⁰ Ama’n ati, “Retlo bâng ruh. Kei Pathen eng kae ti hi manhret ruh, jât-hei kâra torna kaneipen leh vânhnōia torna kaneipen eng kha kae.”

¹¹ Chunghnung Rōngpu’n a-ompui me; Jacob Pathen kha ni’nthupna kae!