HLAHEI 42 - LEKHARABU INTHENG (BSI)

ARUP INHNINA ( Hl 42—72 ) Hnongsōtpa Inkhat Derna

¹ Shakhi inkhat in tuilōngdai arangei kapōa, Eh Pathen, khang hrep khan karangei che.

² Akahring ṭhak Pathen, karangei ṭhak che; na-ângkunga kamukna sik heitik leh mo akahongtor sik eng?

³ Sûn leh jân kaṭap eng, kahmit rathli rōk hi kabusâk kachang jo; ka’nrepui he’n pha rakip a ander eng, “Khon mo na-Pathen kha aka-om?”

⁴ Pha kasesa hei kha ke’n kamandonsōt a kamalung kakōi, ti chu Pathen inna mipuihei leh inṭhōia kanselai khana mipuihei kha hlam hmakakei heia kajōnpuilai hei, ning kaṭha mipuihei khan hla ansak a, ka-ông heia Pathen anmanpâk.

⁵ Heisa mo kei hi hingtuk hrep kamalung akachâm? Heisa mo hingtuk hrep kamalung a’nreng? Ke’n Pathen chunga inhōrna kanei sik, kakahuk inhringpa leh ka-Pathen kha avea kamanpâk nôk hi sik.

^6-7 Kei hiva hnongsōtna ram a ka-omlai kamalung kakōi, khava jâra ke’n ama kahei mandonsōt. Ama’n karathla chunga inrengna tui in-nông kha ajōngtir; Hermon leh Mizar Tlânga inphut Jordan phaia tuitông ajōng kalōng inthla kapōa, lungjîngna khan tuipui kalen kapōa kahnenga inhrunga kae,

⁸ Kei hringna Pathen hneng derna kanei theina sik, khana jân a amanpâkna hla kasak theina sik, Rōngpu’n akatlasam mak alungsetna kha sûn pha hin malâr rasoh.

⁹ Kei kahukpa Pathen hneng ke’n kati, “Heisa mo kei namahngi jo eng? Ka’nrepuihei rahe setna jâra heisa mo a’nreng ṭhak sik eng?”

¹⁰ Anṭong êng vâng anrachi neng jo eng. “Khon mo na-Pathen aka-om?” tia anderṭhak eng.

¹¹ Heisa mo hingtuk hrep kamalung akachâm? Heisa mo hingtuk hrep kamalung a’nreng? Pathen chunga inhōrna kanei sik, kei kahuk inhringpa leh ka-Pathen kha avea kalamanpâk nôk hi sik.