HLAHEI 41 - LEKHARABU INTHENG (BSI)

Dammak Phât a Derna

¹ Sarahei sik lungkhamna kaneihei kha mikahōihei kae; anmani’n bōina anratō pha Rōngpu’n a’nthōpui sik hei.

² Rōngpu’n akahuk sik hei khana anhringkhō kaṭha ada sik hei; khava ram shunga kahōia aman om sik hei; an-inrepuihei ratha neina thōia anmani dahlon mak hei ning.

³ Rōngpu’n anmani annat pha leh a’nthōpui sik hei khana taksa kaṭha kha apek male sik hei.

⁴ Ke’n kaleihri, “Rōngpu, nakadōia setna katlo jo, alungset ina kanat amandam roh.”

⁵ Ka’nrepui he’n kachunga ṭong kakhôk anhri, kei kathi sik leh antamahngi cher sik eng kha anmadu.

⁶ Kei ani kaphâk kahong hei kha anmalung intheng mak; kachungchânga ṭong kaṭhamak anjong mantûp khana kasesōt heia hmun rakip a anhrilea kae.

⁷ Ani kahōt hei seng khan kachungchânga nim-num katia inbek hei, kachunga ṭong kaṭha maktak ansyemsōt a kae.

⁸ Anmani’n anti, “Ama anat kakhôk jo; ajekhum dahlon tor mak jo ning.”

⁹ Kaṭhōn kaṭhapen, kataksenpen inkhat, bu kasâkpuisap inkhat khan, kei kadōia inṭang joa kae.

¹⁰ Rōngpu, kei alungset roh, kataksa amandam pek nôk roh, khan chu ka’nrepuihei kha phu kahlōtor sik hei.

¹¹ Anmani’n kei ator mak hei ning; khan chu kachunga namalung katlâi ti kha kamanhret sik jo.

¹² Ke’n akadik kha katlo achang jâra, nang in na’nthōpui sik eng; ahei tik a kei hi na-ângkunga nada ṭhak sik eng.

¹³ Israelhei Pathen, Rōngpu kha, manpâk ruh! Tûnum ahei tik a’m ama manpâk ruh! Amen! Amen!