HLAHEI 40 - LEKHARABU INTHENG (BSI)

Choi ka-ânna Hla

¹ Ke’n Rōngpu inthōpuina kha ratha kahroktak a kaleihngâk; khava pha ama’n kaṭana rasa kha athei pek eng.

² Ama’n kei bōnnâng khura inphut, thinathei khur kōk a inphut akeisōt eng, ama’n hlungpui chunga aman ong enga inhukna kha amannei eng.

³ Ama’n hlather inkhat sak sik a amanthei eng, ni-Pathen manpâkna sik hla inkhat kae. Hiva kahmu mi katamtak in gîkna inkhat a anlo sik anmani’n Rōngpu kha antaksen sik.

⁴ Rōngpu kataksen, limting a’nhemak, khana Pathen kadikmak hei inmukmak hei kha mikahōihei kae.

⁵ O Rōngpu, kan-Pathen, nang in keini sik a hingja natlopek jo ung; Nang kapō inkhatbek om mak! Nang in keini sik a’nlak mantlukna hingja nasyempek ung. Ke’n khahei seng kha hrisōt tor mak eng, ajârchu khahei kha anja katam hêra kae.

⁶ Nang in inthoinahei leh tōksōt hei madu mak che; akapu maichâm chunga pumro sik a dermak che a-emak leh set inthengna sik inthoina dermak che. Khava kanek a naṭong hri katheina sik kōr napek eng,

⁷ khava jâra ke’n kalei masôn che, “Hin, kei ka-om eng; namansena eng kha dân lekharabu shunga ka-om.

⁸ Ka-Pathen, nalungdo tlo sik kha heituk-hrep kamadu jo mo! Naman theina eng kha kalungria ka’nvona kae,” kalei ti.

⁹ Rōngpu, namihei seng ankhenga an-intûpna khan, nang in nahukna ung ṭong kaṭha kha ke’n kaleihri. Khava ṭong kha ke’n kahri ṭhak sik ti kha nang in namanhret.

¹⁰ Huk manhringna ṭong hi ke’n kabinga inda mak eng; ke’n ahei tik a na’nthō puina leh taksenthei nachangna kahrisōt ṭhak. Namihei seng an-intûpna khan akatlasam mak nalungsetna leh lum lona chunga kei sip timak eng.

¹¹ Rōngpu, namaritna eng hi ahei tik a bângmak jo ning ti kamanhret. Nalungsetna eng leh nalum lona eng khan ahei tik a ahuk manhring sik eng.

Inthōpuina sik a Derna

¹² Innokna katamtak in kei akatōmsi eng, teia teithei emak! Kasetna’n kei asur tlit jo eng, khana ke’n khō hmuthei mak jo eng; kasetna hei kha kalua kasam rajang kanek a katam jôk hei, khana ka-invakna katlang jo.

¹³ Rōngpu, ahuk roh, tûnhin a’nthōpui roh!

¹⁴ Kei anikathat sik a a’ntluk ka’nrepuihei kha inhmak hei sona torcher chang hei rasoh. Kei inrengna chunga ning kaṭhahei kha manloisōt chang hei sona inzak chen hei rasoh!

¹⁵ Sem tlona ani kaneihei kha anre tor mak jâra inrimna de hei rasoh!

¹⁶ Nahnenga akahong rakip inpâkna leh tlaina kasip chang hei rasoh! Nang hukmanhringna jâra manpâkna kapek rakip in, “Rōngpu kha heituk a akalen jo mo!” ti hei rasoh.

¹⁷ Kei katlasam eng khana sara kachang eng, O Rōngpu, tâk nang in kei amahngi mak che. Nang chu kakahukpa leh ka-Pathen che kae, kei inṭangpui sik a hong inrang roh!