HLAHEI 35 - LEKHARABU INTHENG (BSI)

Inthōpuina sik a Derna

¹ Rōngpu, kakadōi hei kha dōi hei roh, Re anikatuk hei kha tuk hei roh!

² Napho leh nachem inlo ina, ani kasan sik a hong roh.

³ Ani kahnong hei chunga nakasei leh nahreicha heikadom roh. Kahuk sik che tia intepna aneipek roh.

⁴ Kei thatna sik katlohei kha re tor makna leh inzakna chen hei rasoh! Kei dōina sik a intluk hei kha ankahnung male hei sona inhmak hei rasoh!

⁵ Anmani kha Rōngpu ngeva khan hnong hei sona, thli tatlen sapôt kachâr kapōhrep chang hei rasoh!

⁶ Rōngpu ngeva’n avōk mathlûklai hei khan anhlam kha inthim sona innepek hei rasoh!

⁷ Ajâr kasea anmani’n kei in-ôkna sik châng ankam, khana kei surna sik khur inthûktak anchoa kae.

⁸ Tâk-kha anmanhret mak hma inhmang na’n asur sik hei; anchâng kam kalan a khan in-ôk sik hei khana insuk inhmang sik hei!

⁹ Khava pha, Rōngpu jâra kamalung inpâk jo; ama’n ahuk eng jâra inpâk sik eng.

¹⁰ Kamalung pumpuia Rōngpu hneng kahri sik, “Nang kapō tûte inkhatbek om mak. Ratha kahrat heia inphut akatlasam hei, mikasuk inrim heia inphut sara khōdeng katheihei kha nahrung hei.”

¹¹ Mikaṭhamak he’n kamanhret hêrmak chunga, maset anpek enga anmani’n sâkhi antlo.

¹² Anmani’n kaṭhatna kha ṭhatmak vâng anmale eng, kei inhōrna kasea ka-om eng.

¹³ Tâk-kha anmani annat pha, malung inrimna pōn leh der kakei, kabinga bu kahngōia kalu kamakhup a kader,

¹⁴ sōpui a-emak leh u leh nai sik derpekna kapōtak a. Mi inkhat in anu sik ṭajai asui kapōa ṭajai kasuia inkun enga kalôn lele eng.

¹⁵ Tâk-kha kei ka’nreng pha, anmani ankhenga lei-inpâk hei, kakimvea intûp heia sem tlona annei eng; khōhme he’n anvōk eng anvōk manjôn eng.

¹⁶ Ke kangōi mi antamanuisō kapōa mater tak a an-en eng.

¹⁷ Rōngpu, heitik chenmo hinga na-en hnâm sik? Anbuhluna enga inphut ahuk roh; hiva shabakkai heia inphut kahringkhō ahuk roh!

¹⁸ Khava sōa ke’n namihei inkhômna shunga kamanpâk sik che. Anmani hmaikunga kachoi ka-ân sik che.

¹⁹ Ka’nrepui malei kaseihei khan kei re tor makna chunga manuisōna amannei mak hei roh. Ajâr kasea ani kahōt hei khan kamalung inrimna chunga amanuisō mak hei rasoh!

²⁰ Anmani’n ṭim leh re ṭonghri ngaia hrimak hei; khava kanek a intōk inchamna indu hei chunga maleisei hingja anjongsōt.

²¹ Anmani’n kei masetna anpek enga, “Nang in heimo natlo kha kanhmu che!” tia ka-ông hei.

²² Tâk-kha O Rōngpu, nang in nahmuhei. Khava jâra Rōngpu sip timak roh; kahlatak a om mak roh!

²³ O Rōngpu, thōi ina asan roh, ka-Pathen, thōi ina kaṭong ahri pek roh.

²⁴ O Rōngpu, nang chu kadik che, kei hi ṭhena kaneimak a amalâr roh; ka’nrepuihei khan kachunga ahnōise mak hei rasoh.

²⁵ Anmani’n, “Achungchânga ṭōn nimanthangsō jo, hivahi nimadu katluk hrep kha kae,” ati mak hei rasoh!

²⁶ Kakhōdeng theina chunga ani-innuisō hei kha inhmak hei sona pui katluk a hmaimôk kha chen hei rasoh; kei kanek a kaṭha jôk eng tia indon hei kha inzak leh marit kaimakna khan katōm hei rasoh!

²⁷ Ke’n maset kachen makna kha ani kahmu hnōm hei khan inpâk a ông hei sona, ave-avea hinga hri hei rasoh, “Rōngpu hi heituk a akalen mo! Asōkpa chung sōkna khan amalung katlâi.”

²⁸ Khava pha ke’n nadikna kha kahri manthang lele sik, khana ani tina kamanpâk ṭhak sik che.