HLAHEI 33 - LEKHARABU INTHENG (BSI)

Choi ka-ânna Hla Inkhat

¹ Nangni mikadik-hei seng, Rōngpu taleitlo chunga khan inpâk ruh, aṭong kajuiseng in choi ka-ân ruh!

² Serângdâr vâng Rōngpu kha manpâk ruh, mahring kanei vâng ahnenga hla sak ruh.

³ Ahnenga hlather kha sak ruh serângdâr kahōitak a karôt una inpâk a ông ruh!

⁴ Rōngpu ṭonghei khachu kadik khana aṭōntlo rakip inhngat theina kae.

⁵ Rōngpu’n akadik leh ṭong intlun kha amadu; alungsetna injônjet khan raleichung hi kasip sō.

⁶ Rōngpu’n marvânhei hi aṭongpek vâng asyem hei, kani, thla, khana ârsihei hi aṭongpek vâng asyem hei.

⁷ Ama’n tui-ôngpui rakip hmun khat a amanchun hei; tui-ôngpui inthûk hei kha mantûpna innden shunga akhum hei.

⁸ Raleichung pumpui in Rōngpu kha kamuk ruh! Vânhnōi mi rakip in, ama kaja ruh!

⁹ Ama ahei ṭongsōt pha, vânhnōi hi a’nsyem kae; ama ṭongpek a heirakip ahon’lâr hei kae.

¹⁰ Rōngpu’n Jât-hlop hei malung mandon kha amanbōk pek hei; anmani’n antamantluk ṭōn kha antlosōt makna sik ating hei.

¹¹ Tâk-kha ama ṭōnmantluk hei khachu ahei tik a ka-om ṭhak; khana amanṭhatna kha kumleikōa sik kae.

¹² Rōngpu kha an-Pathen kachang jât-hei kha anmahâm kaṭha. Atâ kachang sik a akadeisōt jo hei kha mi mahâm kaṭhahei kae!

¹³ Rōngpu’n marvâna inphut ajōng ensuk a mihring nikhenga ahmu sōpet me.

¹⁴ Avai rônna inphut raleichunga aka-om rakip ajōng ensuk.

¹⁵ Ama’n anmalung mandon rakip akhenga asyem khana antatlo rakip amanhret.

¹⁶ Reng inkhat in aremihei rathahrat jâra re ator changmak, sepei inkhat in arathahrat vâng torna anei changmak.

¹⁷ Retorna sik a re shakorhei hnemna om mak; anratha ngarna khan huk tor mak.

¹⁸ Rōngpu’n aṭong kajuihei leh inthlengtik kaneimak alungsetna chunga taksenna kaneihei kha a-ensui hei.

¹⁹ Thina inphut ahuk hei; ṭâmpui a-om pha kahringa ada hei.

²⁰ Eini’n Rōngpu chunga inhōrna ninei; ama kha eini inthōpui leh anikahukpa kae.

²¹ Eini ama jâra kahōi me; eini’n arahming intheng kha nitaksen.

²² Rōngpu, nachunga inhōrna kantanei che kapōa nalungsetna inthlengmak khan keini a-ompui ṭhak rasoh.