HLAHEI 30 - LEKHARABU INTHENG (BSI)

Manpâkna Derna

¹ Rōngpu, kachoi ka-ân che ajârchu nang in nalei huksōt eng, khana ka’nrepuihei ê-jôna amannei mak hei che.

² O Rōngpu, ka-Pathen, inthōpuina sik nahnenga kapeng eng; khana nang in namandam eng.

³ Nang in thlânkhura inphut naṭhensōt eng. Kei khava khur inthûk kajōna leikase eng, tâk nang in kahringkhō napek male eng.

⁴ Ami, taksenthei kachang rakip in Rōngpu manpâkna hla sak ruh! A’ntheng Inkhatpa’n heimo aleitlo kha mandonsōt ruh, khana manpâkna kha ama pek ruh.

⁵ Ama hnuknat chu pha bongkhat rōk kae, khana aṭhatna khachu hringkhō katlung bit sik a kae. Jân pha leh hmit-rathli sōkthei um aja, tâk jîngkâr pha leh ningṭhatna kha kahong.

⁶ Kamalung inngam enga kabinga kahri, “Kei ahei tik a ator hêrmak hei ning.”

⁷ Rōngpu, kei sik a leikaṭha che; nang in tlângbung rekur inkhat kapōa naleihrung eng. Tâk-kha khava sōa keia inphut inthup jo chea, leikaṭi hêr jo eng.

⁸ Rōngpu, nang kabek che, na’nthō puina sik kangek che:

⁹ “Kei thina inphut hei hnemna mo nachen sik? Kei thlânkhur jōnna khan hei hnemna mo nahmu sik? Akathi mihei khan antachoi ka-ân thei sik che mo? Akatlâksam hêrmak naṭhatna kha antahri manthang tor sik mo?

¹⁰ Rōngpu, athei pek roh! Khana lungset a eirôn roh! Rōngpu, a’nthōpui roh!”

¹¹ Nang in kamalung dongna kha inpâk a lâmnating namahe pek eng. Kei inrengna kha nalosōt khana inpâkna khan namankebit eng.

¹² Khava jâra sip timak ning. Namanpâkna hla kha kasak sik. Rōngpu nang ka-Pathen che kae, ahei tik a kamanpâk sik che.