HLAHEI 27 - LEKHARABU INTHENG (BSI)

Choi ka-ânna Derna

¹ Rōngpu hi kavâr leh kakahuk inhring kae; ke’n tûte ṭitmak ning. Thinathei rakip a inphut Rōngpu’n asan eng, kei heitik che’num ṭimak ning.

² Mikaṭhamak he’n that sik a anbuhlu eng pha, anmani inpai heia katlu hei.

³ Remi rakip in ankakesi jo enga achang inum, kei ṭimak ning, ka’nrepui he’n anbuhlu eng inum; ke’n Pathen kha kataksen ṭhak sik.

⁴ Ke’n Rōngpu hneng neinâk inkhat kader jo; khava inkhat rōk kha ke’n kamadu, khachu, kahringkhōa Rōngpu inna om sik, khava hmun a khan aṭhatna hei kha inlaktak a en sik, khana ahlam keina derna sik kha kae.

⁵ Khōdeng theina a-om pha ama’n in-ungna apek sik eng; Abek-inn shunga ama’n kei kahōia ada sik eng khana hlungpui inshâng chunga akahuk a ada sik eng.

⁶ Khava jâra ke’n kakimvea ka-om ka’nrepuihei kha kator sik hei. Abek-inn shunga inpâk a ông pum a inthoina kanei sik; Ke’n hla kasak sik a kha, Rōngpu kha kachoi ka-ân sik!

⁷ Rōngpu, kabek pha che leh athei pek roh! Alungset ina amasôn roh!

⁸ Kahnenga, “Hong roh, ava kamuk roh,” nati eng pha, Ke’n kamasôn che, “Kei kahong sik eng, Rōngpu;

⁹ a’nthupde mak roh!” Kachunga nahnuk amannat pek mak roh; nasōk kei ahnong sōt mak roh. Nang chu kei inthōpui hongkachang ṭhak che; amasō mak roh, adahlon mak roh, Eh Pathen, kakahuk inhringpa.

¹⁰ Kapa leh kanu’n andahlon thei eng, tâk Rōngpu’n a-ensui sik eng.

¹¹ Rōngpu, namantlo hnōm eng kha amanthei roh, khana hringna hlamting khan aṭhōi roh, ajârchu inrepui hingja kaneihei.

¹² Maleisei leh maṭhitna vâng ani kabuhlu hei, ka’nrepuihei hneng apek sōt mak roh.

¹³ Ke’n hiva hringkhō shunga hin Rōngpu ṭhatna kha hmun a sik a lakahring sik eng ti hi kamanhret.

¹⁴ Rōngpu kha taksen roh! Taksenna nei roh, malung mathla mak roh, Rōngpu kha taksen roh.