HLAHEI 25 - LEKHARABU INTHENG (BSI)

Hlam Keipekna sik leh Hrungna sik Derna

¹ O Rōngpu nahnenga derna kanei;

² Ka-Pathen, nang kataksen che. Re tor mak a inzakna inphut ahuk roh; ka’nrepuihei ê-jôna amannei mak hei roh!

³ Nakataksenhei sik a re tor makna om mak, tâk-kha nang kadōia inranga re katlo he’n torna neimak hei.

⁴ Nahlamhei kha amanthei roh, O Rōngpu, khahei kha manhretna amannei roh.

⁵ Nadikna dungjuia hringna sik amanthei roh, ajârchu nang chu kakahuk inhring ka-Pathen che kae. Ke’n ahei tik a kataksen che.

⁶ Rōngpu nang in hmalaia inphut nalei manhmu eng, lum lona leh nalungset inthlengmak kha amandonsōt pek roh.

⁷ Kakhangdông laia kaṭhena leh kasetna hei arangei mandam roh. Nalungset inthlengmak leh naṭhatna khan, amandonsōt roh, Rōngpu!

⁸ Ajârchu Rōngpu kha akadik leh akaṭha kae; ama’n mikaset-hei kha antajui sik hlam amanthei hei.

⁹ Ama’n a’nsinsak hei kha hlam kadik a aṭhōi hei khana alungdo amanthei hei.

¹⁰ Aṭongkam leh aṭongpek kajuihei seng lungset leh taksentak a anhlam akei hei.

¹¹ Rōngpu naṭong tepna ajuipek ina, kasetna hei arangei mandam roh, ajârchu katam hêr jo.

¹² Rōngpu kajana kaneihei khan ansena sik hlam ama a inphut inthemchûk sik hei.

¹³ Anmani ahei tik a kahao ṭhak sik hei, khana ansahei kha’n anram kha anhlō sik.

¹⁴ Rōngpu kha aṭong kajuihei sik a anṭhōn kae, khana anmani leh an-intepna kha amanhnet.

¹⁵ Pha rakip a inthōpui madu jâra Rōngpu kha ka-en ṭhak; khana ama’n khōdeng theina inphut ahuksōt eng.

¹⁶ Kei hnengting he’nhe roh, Rōngpu, khana amarit roh, ajârchu kabing rōk a jo eng kae khana katlâksam jo eng.

¹⁷ Kamalung inrimna amanyâng pek roh, khana kabōina rakip a inphut ahuk roh.

¹⁸ Kamalung dongna leh ka’nrengna amandon pek roh, khana kasetna rakip arangei mandam roh.

¹⁹ Inrepui heituk katam kanei jo mo, enroh; heituk-hrep a anta enkada jo eng mo, enroh!

²⁰ Ahrung roh khana ahuk roh; mi tator sik a inphut asan roh. Nahuk sik enga kahei jōn che.

²¹ Kaṭhatna leh kamalung inthengna khan kaṭhadek a ada rasoh, ajârchu ke’n nang kataksen che.

²² Eh Pathen, nami Israelhei kha, ankhōdeng theina rakip a inphut huk hei roh!