HLAHEI 19 - LEKHARABU INTHENG (BSI)

Akutsyem Chunga Pathen Lûrna

¹ Chungvân in heituk-hrep inchêna Pathen lûrna hi amalâr jo mo! Akutsyem khan heituk inthengtak a amalâr jo mo!

² Akani et khan abân kani omchen sik kha ahrisōt; ajân et khan abân jân nôk a he’nle nôk.

³ Ṭongrahme a-emak leh ṭong chu hrimak hei; rasa heite intheimak.

⁴ Achang ravâng anṭongrôn vânhnōi pumpuia katlung sō khan ralei rakir manlia intheisō. Pathen in chungvân chunga kani omna sik rabuk asyempek;

⁵ jîngkâra kani khan a’npâk hmōipa kapōa a-inna inphut heikasōk, Ratha kahroktak a a’ndei mi inkhat kapōa katlân ri.

⁶ Chungvân bângna inkhat a inphut aphut a a’nchaina inkhat katlunga kase. Kanisat lumna inphut heite inthup theimak hei.

Rōngpu Dân

⁷ Rōngpu dân chu pui katluk; khava khan ratha ther apek. Rōngpu ṭongpek-hei kha hlamrinthei hei kae, singna katlâksam hei singna apek hei.

⁸ Rōngpu dânhei chu akadik-hei kae, khana khava kajuihei kha kahōihei, Rōngpu ṭongpek-hei khachu a’ntlun hei kae, khana malunga manhret theina apek.

⁹ Rōngpu kaja hi akaṭha kae, khavakha ahei tik a a’njōm ṭhak sik kae. Rōngpu ṭongtan hei kha kadik, khahei kha ahei tik a kaṭha hei.

¹⁰ Sana inthengpen kanek a’m, khahei kha madu ka-om jôk hei; khōihning inthengpen kathlum nek a’m, khahei kha kathlum jôk hei.

¹¹ Khavahei khan nasōk kei singna anpek eng; khahei kha kajui hei jâra tloman kachen.

¹² Tûte’n abinga aṭhena hei kha hmutor mak. A’nthup ṭhena heia inphut akeisōt roh, Rōngpu!

¹³ Tlo rong tia a’ntlo setna inphut um ahuk roh; khahei kha kachunga vai manrôn mak hei roh. Khan chu pui katluk kachang sik jo eng, khana setna kaṭhamak a inphut masō kachang sik jo eng.

¹⁴ Kaṭong hri leh kamandonna hei hi nahnenga rahlângthei chang rasoh, O Rōngpu, ka’n-ungna leh ka’ntlensōtpa!