HLAHEI 17 - LEKHARABU INTHENG (BSI)

Ṭhenakase Inkhat Derna

¹ O Rōngpu, ṭong kadik tanna sik a kaderna hi arangei pek roh; inthōpui sik a kapengna khôk asak pek roh! Malung inthengtak a kaderna athei pek roh.

² Kei ôpna ṭong natan sik, ajârchu nang in akadik kha namanhret.

³ Nang in kamalung namanhret. Jân a kahnenga kahong che; pui katluk a na-enmansin jo eng, khana ṭhatmak madu rangeina kahnenga hmumak che. Kei ṭongse hrimak eng,

⁴ milak-hei kapōa; naṭongpek kha kajui, khana innâk-insena hlam juimak eng.

⁵ Kei nahlam a kase ṭhak eng, khana inphut hlamle chōnphung mak eng.

⁶ Eh Pathen, nahnenga kader che, ajârchu namasôn ri eng; khava jâra aheihnget ina kaṭong arangei pek roh.

⁷ Nalungsetna inlaktak kha phôngsōt roh khana ahuk roh; Nahnenga khan ka’nrepui heia inphut inhukna kanei.

⁸ Nahmit nahrung kapōhrep a ahrung roh; mikaṭhamak-hei buhluna enga inphut

⁹ namathla hnōi daihlima athup roh. Akakhôk ka’nrepuipen hei khan ankakesi jo eng;

¹⁰ anmani’n lungsetna neiloa, in-ortak a kaṭong hei.

¹¹ Kahngetna hmun rakip a ankatōmbit eng, keimathlûkna sik hlam an-en ṭhak.

¹² Shabakkaihei kapōa anmani’n kei anhngâk eng; ahar-ahak a keihlerna sik a anmadu eng.

¹³ Rōngpu jōng roh! Ka’nrepuihei dōi hei ina ajōng torpek hei roh. Mikaṭhamak heia inphut nachemjâm vâng ahuk roh;

¹⁴ hiva hringkhō shunga antamadu rakip akachen jo heia inphut ahuk roh; anmani sik a namanbuk inrengna vâng khan karâk hei roh; ansahei sik a’m akatluk set chang rasoh, ansahei sa nôk he’n a’nhlei ajing kha chen nôk hei rasoh!

¹⁵ Tâk-kha kei chu, ṭhatmak katlomak jâra nang kahmu sik che; khana kahong inṭhang pha na-ompuina eng khan inpâkna amansip phet sik eng.