HLAHEI 119 - LEKHARABU INTHENG (BSI)

Rōngpu Dân

¹ Rōngpu, Dân dungjuia akahring hei anhringkhō nōrna kase mihei kha mikahōihei kae.

² Anmalung pumpuia ama kajuihei, aṭongpek kajuihei kha mikahōihei kae.

³ Anmani’n akadik mak tlophung mak hei; anmani’n Rōngpu hlam kha anjui.

⁴ Rōngpu nadân kha keini napek ung, taksentak a kantajui sik a namanthei ung.

⁵ Namansena juina sik, taksenthei kachang sik eng tia heituk a a’nhōr eng mo!

⁶ Naṭongpek rakip a khan malung kamanhlut inchu, heite inzakna chenmak ning.

⁷ Navairôn kadik kha kamanhret dungjuia, malung inthengtak a kachoi ka-ân sik che.

⁸ Nadân kha kajui sik; kei adahlon jenmak roh!

Rōngpu Dân Ṭong Jui sik

⁹ Khong inmo rether inkhat in ahringkhō inthenga aka-om tor sik? naṭongpek juina vânga kae.

¹⁰ Kamalung pumpuia nang razenna sik a tak intlo eng; naṭongpek akajuimak amanchang mak roh.

¹¹ Nang kadōia setna katlo makna sik kamalung shunga nadân kha ka’nda jo.

¹² Kachoi ka-ân che Rōngpu, nahlam kha eimanthei roh.

¹³ Napek eng nadân rakip hei kha, inhnaktak a kahri malet sik hei.

¹⁴ Neinâk katamtak manbuk kanek a, naṭongpek jui sik kha kamadu jôk.

¹⁵ Namansena kha inchu eng; nami mantheina kha ka-enmansin.

¹⁶ Nadân a khan hōi kasak; naṭongpek kha mahngi mak ning.

Rōngpu Dân a Hōina

¹⁷ Naman theina kha kahring kadam a kajui theina sik, nasōk kei hneng akaṭha chang roh,

¹⁸ Nadân shunga akadik inlak-hei kha, kahmu theina sik kahmit amanhar pek roh.

¹⁹ Raleichunga pha bongkhat sik a ka-om eng; keia inphut naṭongpek kha athuppek mak roh.

²⁰ Kamalung hi arangei a-om jâra kana jo; naṭongtan kha pha rakip a kamanhret hnōma kae.

²¹ A’nlensak hei kha rasei hei roh. Naṭongpek kajuimak hei kha hâksêrna chen hei rasoh;

²² Anmani manzakna eng leh raseina enga inphut a khan kei amasōsōt roh, ajârchu kei chu nadân kha kajuia kae.

²³ Vaikarônhei intûp heia kei kadōia ṭōn anmantluk, tâk ke’n naman theinahei kha inchu sik eng.

²⁴ Namansena eng khan hōina apek eng; khahei kha kei ani’nse hei kae.

Rōngpu Dân a Ṭong Jui sik a Ngirna

²⁵ Mihei torna vaiphin kâra kaje jo eng; naṭong tepna kapōa, ajōng mathōi nôk roh!

²⁶ Kachôn ṭhena rakip kaphôngsōt a, khana nang in namasôn eng; nahlam hro kha eimanthei roh.

²⁷ Nadânhei kha manhret theina sik eibôm roh, khan chu nang mantheina inlak-hei kha malung-vona kanei sik hei.

²⁸ Kei malung inreng in ahlō jo eng; naṭong tepna kapōa amanhrat nôk roh.

²⁹ Hlamlea kase sik a inphut aṭhensōt roh, naṭhatna vâng khan nadân kha eimanthei roh.

³⁰ Naṭong jui sik a kakadei jo; naṭongtan a khan kamalung kapek jo.

³¹ Rōngpu naṭong mansenahei kha kajui jo, inzakna amanchen mak roh.

³² Manhret theinachet napek sik eng jâra, naṭongpek hei kha malung kahlut a kajui sik.

Manhretna sik Derna

³³ Nadânhei manhmuna kha amanthei roh, Rōngpu, khan chu pha rakip a kajui sik jo hei.

³⁴ Nadânhei kha ahri manchên pek roh khan chu kajui sik jo hei; kamalung pumpuia kada sik jo.

³⁵ Naṭongpek kajui kha amanchang roh, ajârchu khana khan ke’n hōina kahmua kae.

³⁶ Mikanei chang sik kanek a nadân jui maduna sik a eipe roh.

³⁷ Naṭongtep dungjuia kei sik akaṭha chang roh; hnemna kasea kamalung manhlut sik a inphut eidasōt roh.

³⁸ Nasōkpa kei hnenga na’ntepna kha ajuipek roh, naṭongpek kajuihei hnenga na’ntepna kha.

³⁹ Ṭit ka-om inzakna inphut eihuk roh, naṭongtan kha heituk a a’nlak jo mo!

⁴⁰ Ke’n naṭongpek hei kha kajui hnōm; hringkhōther apek roh, ajârchu nang chu akadik che kae.

Rōngpu Dân Taksenna

⁴¹ Heituk-hrep mo nalungset eng, amanhmu roh Rōngpu, khana naṭongtep dungjuia ahuk roh.

⁴² Inzak anikapek hei kha kamasôntor hei. ajârchu naṭong kha kataksena kae.

⁴³ Pha rakip a akadik amanhri tor roh, ajârchu naṭongtan a khan ka’nhōrna kha ka-om.

⁴⁴ Ahei tik a ke’n nadân kha kajui sik, ahei tik chen a.

⁴⁵ Pui katluk ning leh hnōma ka-om sik eng, ajârchu naman theina kha jui sik a inṭang eng.

⁴⁶ Renghei hnenga naṭongpek kaphôngsōt sik kei inzak mak ning.

⁴⁷ Naṭongpek hei juina khan hōi kasak, ajârchu kamadu heia kae.

⁴⁸ Naṭongpek kha kakaja hei khana kamadu hei; namansena kha lum lona kanei sik.

Rōngpu Dân Chunga Inngamna

⁴⁹ Nasōk hnenga naṭongtep kha amandonsōt pek roh; khava khan inhōrna apek eng.

⁵⁰ Khōdeng katheina shunga khannum lungngam athlâk eng ajârchu naṭongtep khan hringna apek eng.

⁵¹ Mi inlensak he’n anirasei ṭhak eng, tâk ke’n nadân kha inṭhenpui mak eng.

⁵² Hmalaia naṭong tanna kha kamandonsōt khahei khan lungmōng anipek, Rōngpu.

⁵³ Mi malung kaṭhamak he’n nadân antasukṭhe kha kahmu pha hnuknat in amakhu eng.

⁵⁴ Kahringkhō katôitek shunga hin naṭongpek kha hla a kaphō.

⁵⁵ Jân a kamandonsōt che, Rōngpu, khana nadân kha’m kamandon ri.

⁵⁶ Naṭongpek juia khan kei hōina kachen.

Rōngpu Dân Lungria Neina

⁵⁷ Nang rōk kamadu che kae, Rōngpu; nadân kajui sik a intep eng.

⁵⁸ Naṭong tepna dungjuia nalungsetna sik eng kamalung pumpui in kader che kae.

⁵⁹ Kei omchen hi kamandon jo, khana mansena kajui sik a intep jo eng.

⁶⁰ Naṭongpek kajui sik kha kei insum mak ning.

⁶¹ Mikaṭhamak-hei khan kei man-ôkna sik châng ankam, tâk, ke’n nadân kha mahngi mak eng.

⁶² Naṭongtan dik jâra choi ka-ânna sik che jân ṭhangṭima kathōi eng.

⁶³ Nang inzen rakip leh, nadân kajui rakip hei kha kaṭhōnhei kae.

⁶⁴ Rōngpu, ralei hi nalungset inthlengmak khan kasip phet; naṭongpek kha amanthei roh.

Rōngpu Dân Hnemna

⁶⁵ Naṭongtep a khan kangir che, Rōngpu, khana nasōk kei sik a akaṭha chu nang che kha kae.

⁶⁶ Singna leh themna eipe roh, ajârchu naṭongpek kha kataksena kae.

⁶⁷ Nang in khōdeng nani manthei mak lai khan, akadik mak a leikase eng, tâk tûnchu naṭong kajui jo.

⁶⁸ Heituk a akaṭha chea, heituk a lungset inhret che mo! Naṭongpek hei kha eimanthei roh.

⁶⁹ Mi inlensak khan maleiseia kaṭong anhri, tâk kalungri akhenga namansena hei kha kajui.

⁷⁰ Anmani’n nadân kha manhret mak hei, tâk kei chu nadân a khan tlaina kahmu.

⁷¹ Nakarâkna eng kha kei sik a chu akaṭha kae, ajârchu khana khan naṭongpek amanthem chuk eng.

⁷² Raleichunga sêr leh sum kanek a nadân napek eng khan kei sik kahnem chet jôk.

Rōngpu Dân Dikna

⁷³ Nang in nasyem eng khana nang in nahuk eng; nadân kha ka’nchû theina sik manhret theina eipe roh.

⁷⁴ Nang kaṭit he’n anhmu eng pha inpâk sik hei. ajârchu naṭongtep kha kataksena kae.

⁷⁵ Naṭongtan hei kha kadik ti kamanhret, Rōngpu, khana nang kha taksenthei nachang jâra karâkna kha napek eng.

⁷⁶ Nasōk kei chunga naṭongtep kapōa khan nalungset inthlengmak vâng khan kei lungngam eithlâk roh.

⁷⁷ Eilungset roh, khan chu kahring sik eng ajârchu nadân a khan kei katlâi eng.

⁷⁸ Akadik mak a ṭhena anikapek hei, mi inlensak-hei kha inzak hei rasoh; kei chu namansena kha lum lona kanei sik.

⁷⁹ Nang kaṭit hei leh naṭongpek kajuihei kha, kei hneng hong hei rasoh.

⁸⁰ Naṭongpek kha pui katluk a juirong hmaimôkna inphut aṭhensōt roh.

Katlensōtna sik a Derna

⁸¹ Rōngpu’n nahuk sik eng kha kahngâkna, kei kachâmneng jo eng; ke’n naṭonga khan taksenna kanei.

⁸² “Heitik leh mo najōng inthōpui sik eng,” tia derna kaneilai, naṭongtep eng kha kahngâkna kahmit kakham jo.

⁸³ Jupeng a’nhler, hmangna kase kapō jo eng kae; achang ravâng naṭongpek khachu mahngi mak eng.

⁸⁴ Heichen katlung mo kalahngâk sik? Inrimna anikapek heiso heitik leh mo karâkna napek sik hei?

⁸⁵ Mi inlensak hei, nadân kajuimak hei son, kei surna sik a khur ancho.

⁸⁶ Naṭongpek hei hi taksen sik rahōi kasōk; maleisei vâng mihe’n ansuk manrim eng, a’nthōpui roh!

⁸⁷ Kei thatna sik mantlukna anmani chung kasōkvet hei, tâk ke’nchu naṭongpek hei kha donmak tlomak eng.

⁸⁸ Nadân kha kajui theina sik a, nalungset inthlengmak vâng khan akaṭha achang pek roh.

Rōngpu Dân a Taksen sik

⁸⁹ Naṭong kha are-rea ka-om ṭhak sik, Rōngpu; khavakha kumleikōa marvâna ka-om ṭhak.

⁹⁰ Taksen nachang kha akhang rakip a ka-om ṭhak; ralei kha ahmun a nada, khana ka-om thang jo.

⁹¹ Nang ṭongpek a tuning katlung neinâk-hei hi laka-om hei, ajârchu khahei kha’m ankhenga nasōk-hei kae.

⁹² Nadân kha kei inpâkna hongkōnna alei changmak inchu, kakhōdeng theina khan aleikathi sik jo eng kae.

⁹³ Namansena hei kha donlo tlomak ning; ajârchu khahei vâng khan kahringa naṭhensōt eng kae.

⁹⁴ Kei nata eng kae, eihuk roh! Naṭongpek juina sik a tak intlo eng.

⁹⁵ Mikaṭhamak he’n that sik a anhngâk eng, tâk ke’nchu nadân ṭong kha lum lona kanei sik.

⁹⁶ Heirakip hi pui katluk om mak; tâk naṭongpek chu pui katluk.

Rōngpu Dân Lungsetna

⁹⁷ Heituk a nadân hi kamadu jo mo! Khavakha sûn nilun kamandon.

⁹⁸ Naṭongpek khan pha rakip a a’nṭhōipui eng; ka’nrepuihei nek a singna amannei eng.

⁹⁹ Namansena eng kha lum lona kaneia ani’nthei hei kanek a kamanhret chet a kae.

¹⁰⁰ Naṭongpek hei kajui jâra katerhei kanek a singna kaneichet.

¹⁰¹ Naṭong kha kajui hnōm jâra, akaṭhamak omchen rakip kha kapesōt jo.

¹⁰² Namansena hei kha ke’n donmak tlomak ning, ajârchu nangkhet ka-oja che kae.

¹⁰³ Namansena hei kha heituk a akathlum jo hei mo, khōihning kanek a kathlum jôk hei!

¹⁰⁴ Nadân a inphut a singna kahmu, khava jâra akaṭhamak omchenhei kha kahōt jo.

Rōngpu Dân a Inphut a Vâr

¹⁰⁵ Naṭong kha ani kaṭhōi thaihmei kae kahlam sik a vâr kae.

¹⁰⁶ Namansena akadik-hei kha kamatu manhnetna sik ka-ôrtak a ka’ntepna kha kajui sik.

¹⁰⁷ Kakhōdeng theina hi ṭit ka-om hei, Rōngpu; naṭongtep kapōa kahringa eida roh.

¹⁰⁸ O Rōngpu, inpâk a kaderna hei hi eilopek roh, khana naṭongpek hei kha eimanthei roh.

¹⁰⁹ Kahringkhō sik a hin insing theitak a ka-om eng; ke’n nadân kha mahngi hêrmak eng.

¹¹⁰ Mikaṭhamak he’n châng anikam pek ṭhak, tâk naṭongpek eng kha juimak tlomak eng.

¹¹¹ Naṭongpek hei eng kha kumleikōa kakarōi hei kae; khahei kha kamalung inpâkna hei kae.

¹¹² Kathimak lai seng navairônna hei kha jui sik a intluk jo eng.

Rōngpu Dân a Inhukna

¹¹³ Nang kajana pui katluk a akaneimak hei kha kahōt hei, tâk ke’n nadân kha kamadu.

¹¹⁴ Nang ani kahrungpa leh ani’nkurpa che kae; naṭongtep a khan kei inhōr eng.

¹¹⁵ Setkarôn mihei keia inphut a sesōt ruh. Ka-Pathen ṭongpek kha kajui sik.

¹¹⁶ Naṭongtep kapōa ratha eipe roh, khan chu kahring sik eng; ka’nhōrna kha amanhmang pek mak roh!

¹¹⁷ Eimatu roh, khan chu kei inhuk sik eng, Khana naṭongpek a khan kamalung kamanhlut ṭhak sik.

¹¹⁸ Nadân kajuimak heirakip kha rahlâng mak che; anmi hōnna ṭōnmantluk hei kha hnemna kase kae.

¹¹⁹ Mikaṭhamak heirakip kha akabōk neinâk kapōa nalo hei, khava jâra namansena kha kamadu hei.

¹²⁰ Nang jâra kei kaṭi eng; naṭongtan sik jâra ṭitna kasip eng.

Rōngpu Dân Jui

¹²¹ Akadik leh akaṭha ṭōn kha ke’n katlo jo; ka’nrepui kâra eidahlon mak roh!

¹²² Nasōk inthōpui sik a a’ntep pek roh; êngkasehei kha khōdengthei aman pek mak hei roh.

¹²³ Nalei intepna katlensōtna kha kahngâk a kahmit kakham jo hei.

¹²⁴ Nalungset inthlengmak dungjuia eithlop roh, khana naṭongpek hei kha amanthei roh.

¹²⁵ Naman theina eng kha kamanhret theina sik, kei nasōk eng kae; manhret theina eipek roh,

¹²⁶ Mipui in nadân kha anjuimak jâra, Rōngpu, hivahi nang ṭōn phutna sik phatak jo kae.

¹²⁷ Naṭongpek kha sana kanek a kamadu, a’nthengtak sana kanek a kamadudet.

¹²⁸ Khava jâra namansena rakip kajui; hlam kadikmak rakip kahōt.

Rōngpu Dân Jui sik Madu roh

¹²⁹ Nang mantheina hei chu inlak hêr; kamalung pumpuia kajuipet hei.

¹³⁰ Naman theinahei hri manchênna khan mikamohei hneng vâr leh singna apek

¹³¹ Naṭongpek maduna kha kabei vâng kaphôngsōt.

¹³² Nang inlungset rakip hei chunga natlo kapōa kahnenga hong inle nôk ina eilungset roh.

¹³³ Naṭongtep kapōa, katlu makna sik a eida roh; akaṭhamak kha eimantor mak roh.

¹³⁴ Naṭongpek kajui theina sik a, khōdeng ani’nthei heia inphut eihuk roh.

¹³⁵ Nang ompuina sik vâng eipe roh khana nadân kha eimanthei roh.

¹³⁶ Mipui he’n nadân anjuimak jâra, kahmit rathli kha tuidung kalōng ka-ang.

Rōngpu Dân Dikna

¹³⁷ Rōngpu, nang chu kadik che, khana nadânhei hi’m akadik rōk kae.

¹³⁸ Nang in napek sōt dânhei kha pui katluk set a, a’ntheng leh akadik rōk kae.

¹³⁹ Ka’nrepui he’n naṭong kha heitea ansakmak jâra, kahnuknat kha kashunga hmei kakâng ka-ang.

¹⁴⁰ Naṭongtep hi heituk a a’nchên jo mo! Heituk a kamadu jo mo!

¹⁴¹ Kei hnemna kase leh hnōise leikachang eng; tâk nang mantheina hei chu donmak tlomak eng.

¹⁴² Nadikna kha kumleikōa ka-om sik, khana nadân kha’m kadik ṭhak sik.

¹⁴³ Inrengna leh maduna khan kasip jo eng, tâk naṭongpek khan inpâkna apek eng.

¹⁴⁴ Namansena eng kha ahei tik a kadik ṭhak; manhret theina apek roh, khan chu kahring sik eng.

Huksōtna sik a Derna

¹⁴⁵ Kamalung pumpuia nang kabek che, eimasôn roh, Rōngpu, khan chu ke’n naṭongpek kha kajui sik jo.

¹⁴⁶ Ke’n kabek che; ahuk roh, khan chu ke’n navairônna kha kajui sik.

¹⁴⁷ Kani ahong sōk mak hma inthōpuina ngekna kanei che; naṭongtep a khan inhōrna kanei.

¹⁴⁸ Namansena hei lum lona khan jân kathang rakhuma ka’nthlong ravâng kaharṭhak eng.

¹⁴⁹ O Rōngpu nalungset kha inthlengmak, athei pek roh; nalungsetna malâr roh, kahringkhō ahrung kaṭha roh!

¹⁵⁰ Nadân kajuijen mak hei, hnuk kase, kei kasuk inrim hei khan anhonghnai jo eng.

¹⁵¹ Tâk-kha nang in nahonghnai det eng, khana naṭongtep rakip hei kha inhling mak hei.

¹⁵² Hmalaia inphut namansena kha kamanhret jo; kumleikōa sik a nasyem hei kae.

Inthōpuina sik a Ngekna

¹⁵³ Kei inrengna hi enroh, khana ahuk roh, ajârchu nadân kha heisakloa tlomak eng.

¹⁵⁴ Kei langa inṭang ina, amasōsōt roh; naṭongtep kapōa eihuksōt roh.

¹⁵⁵ Mikaṭhamak-hei kha huksōt changmak hei ning, ajârchu nadânhei kha juimak hei.

¹⁵⁶ Tâk-kha nalum lona kha kalen; nalungsetna kha malâr roh khana eihuk roh!

¹⁵⁷ Inrepui leh indōipui hingja kaneihei, tâk nadân juina khan tlâksam mak eng.

¹⁵⁸ Mikahōnhei kha kahmu pha, kamater hêr hei, ajârchu naṭongpek kha juimak hei.

¹⁵⁹ Enroh heituk a namansena kha kamadu jo mo, Rōngpu. Nalungsetna kha inthlengmak, khava jâra eihuk roh.

¹⁶⁰ Nadân bitin chu akadik kha kae, khana naṭongtan kadik kha kumleikōa kae.

Rōngpu Dân a Inpek sōt

¹⁶¹ Ratha kahrat mihe’n dik loa anibuhlu eng, tâk nadân kha kajana kanei.

¹⁶² Tu mo inkhat in karōi manbukna ahmu sōt a a’npâk kapōa, naṭongtep pek eng jâra khan heituk a hōina kanei jo mo.

¹⁶³ Malei kaseihei kha kahōt hei khana kamater hei, tâk nadân khachu kamadu.

¹⁶⁴ Nadik leh naṭongtan jâra, ni khat a vōisari sasâm kamanpâk che.

¹⁶⁵ Nadân inlungset hei khachu pui katluk a inhukna antanei jo kae, khana heite’num mathlûk tor mak jo hei ning.

¹⁶⁶ Ani kahuksōt sik a kahngâk che kae, Rōngpu, khana naṭongpek dungjuia katlo.

¹⁶⁷ Naman theinahei kha kajui; kamalung pumpuia kamadu hei.

¹⁶⁸ Naṭongpek leh namansena hei kha kajui; khana katlohei rakip kha nahmuhei.

Inthōpuina sik a Derna

¹⁶⁹ Na’nṭangpuina sik a kapeng rasa nahnenga hongtlung rasoh, Rōngpu! Naṭongtep kapōa manhretna eipek roh.

¹⁷⁰ Kaderna che arangei pek roh, Naṭongtep dungjuia eihuksōt roh!

¹⁷¹ Nadânhei namanthei eng jâra ahei tik a kachoi ka-ân sik che,

¹⁷² Nadân chunga khan hla kasak sik, ajârchu naṭongpek kha ṭongtak hei kae.

¹⁷³ Kei huksōtna sik a inrin ṭhak roh, ajârchu ke’n naṭongpek kha kajui.

¹⁷⁴ Nahuk sik eng kha heituk a kahngâk hla jo mo, Rōngpu! Nadân a khan hōina kahmu.

¹⁷⁵ Nang kachoi ka-ânna sik che hringkhō eipek roh; namansena eng khan ahe’nthōpui rasoh.

¹⁷⁶ Kemōng inhmang kapōa kalôn-invai jo eng; khava jâra jōng ina nasōk ajōng enroh, ajârchu nadân kha heisak lo tlomak eng.