HLAHEI 118 - LEKHARABU INTHENG (BSI)

Rōngpu Retorna Chunga Manpâkna

¹ Rōngpu kha manpâk ruh, ajârchu akaṭha kae, khana ama lungsetna khachu kumleikōa kae.

² Israel mipuihei khan, “Ama lungsetna hi kumleikōa kae,” ti hei rasoh.

³ Pathen thempuhei khan, “Ama lungsetna hi kumleikōa kae,” ti hei rasoh.

⁴ Ama kabek rakip in, “Ama lungsetna hi kumleikōa kae,” ti hei rasoh.

⁵ Ka’nrengna inphut Rōngpu kha kabek; amasôn eng khana amasōsōt eng.

⁶ Rōngpu’n a-ompui eng, ke’n heite ṭitmak ning; tu mo inkhat in heimo amanlotor sik eng?

⁷ ani inthōpui kha Rōngpu kae, khana ka’nrepuihei tor a anka-om kha kahmu sik.

⁸ Mihring chunga in-ngai nek a chu Pathen taksen kaṭha jôk.

⁹ Mihring hlamkakei chunga in-ngai nek a chu Pathen taksen kaṭha jôk.

¹⁰ Kei inrepui he’n ankakebit eng; tâk Rōngpu ratha vâng khan kasuk manhmangsō hei!

¹¹ Arakir rakip a ankatōmbit eng tâk Rōngpu rathahrat vâng khan kasuk manhmang hei!

¹² Anmani’n khōi hei kapōa ankatōmbit eng, tâk rahlingbuk kakâng kapōa inranga kakângvâm hei; Rōngpu rathahrat vâng khan kasuk manhmang hei.

¹³ Ṭit ka-om tak a anbuhlu eng, anleitor jo eng, tâk Rōngpu’n ale’nthōpui eng.

¹⁴ Rōngpu’n ratha kanei leh akahrat a asyem eng; ama’n aleihuk eng.

¹⁵ Pathen mihei pōn-inn shunga retorna, inpâk a aka-ông heiso rangei ruh: “Khavakha akahrat Rōngpu rathahrat tatlo kae!

¹⁶ Rehmun a ama ratha hratna, ama rathahrat vâng khan amantor me!” anti.

¹⁷ Kei thimak ning; khava kanek a, kei kahring sik eng khana Rōngpu tatlo hei kha kahri manthang sik hei.

¹⁸ Ama’n inhnaktak a karâkna aleipek eng, tâk aleimanthi mak a kae.

¹⁹ Bek-inn kekot kha kei sik a amahlang pek ruh; kei akahlut enga Rōngpu kha kachoi ka-ân sik kae.

²⁰ Mikadik-hei rōk hlut torna; Rōngpu kekot kha hi kae.

²¹ Nang kachoi ka-ân che, Rōngpu, ajârchu nang in nathei eng, ajârchu torna kha napek eng.

²² Inn kasak he’n hnemna kase tia antahlonsōt, hlung kha ankhenga kâra akarôn pen hongkachang jo.

²³ Hivahi Rōngpu taleitlo kae; heituk a hmit ena inlak jo mo!

²⁴ Hivahi Rōngpu torna kani kha kae; inpâk rih, hōi rih!

²⁵ Eihuk roh, Rōngpu, eihuk roh! Hmesōna eipe roh, O Rōngpu!

²⁶ Rōngpu rahminga akajōng ama kha Pathen in vâng pek rasoh. Rōngpu Bek-inna inphut nangni vâng kanpek chei.

²⁷ Rōngpu kha Pathen kae. Eini sik a ama akaṭha kae. Nankut a thing bâk matu una, rehōi kha phut jo ruh khana maichâm kimvea injôk jo ruh.

²⁸ Nang ka-Pathen che kae, ke’n manpâkna kapek che; nalenna kha kahri manthang sik.

²⁹ Rōngpu kha manpâk ruh, ajârchu akaṭha kae, khana alungset hi kumleikōa sik kae.