HLAHEI 109 - LEKHARABU INTHENG (BSI)

Inreng Pha Mi Inkhat Thangkōina

¹ O Rōngpu, kachoi kaân che; sip eitipek mak roh.

² Mikaṭhamak-hei leh malei kaseihei khan anbuhlu eng. kachunga maleisei ṭong anjôm

³ khana kachunga ṭhatmak ṭong anhri, ajâr kasejena anbuhlu eng.

⁴ Ke’n kalungset he’num ansik a derna kanei pek he’num, anmani’n chu an-indōipui eng.

⁵ Akaṭha kha ṭhatmak vâng anmale eng, kalungsetna kha hōtna vâng anmale eng.

⁶ Kei inrepui chunga ṭong tanna sik a ṭongkatan kaṭhamak ajing kadeisōt roh, khana ama khet inrepui inkhat khan maher rasoh.

⁷ Aṭong anjongsui pha leh aṭhena kha hmu hei rasoh; khana rangei mandam aderna kapha aṭhenating inteipek rasoh!

⁸ Ahringkhō kha inchailoi sona; aṭōn hmun kha mihlop inkhat in hlō rasoh!

⁹ Asahei kha pa kase hongchang hei sona, khana anuhmei kha renghmei hongchang rasoh!

¹⁰ Asahei kha inn leh hlei kase, sâk kader kut indo lele hongchang hei rasoh; an-omna inram hleirama inphut hnongsōt chang hei rasoh.

¹¹ Asêr batna hei khan annei rakip chompet hei rasoh, khana anṭōntlo rakip hei kha khōhmehei ta changpet rasoh.

¹² Tûte’num ama kha lungset hêrmak hei rasoh khana aleidahlon pakasehei kha tûte’num donpek mak hei rasoh.

¹³ Ama sōn leh pârhei seng kha thipet hei rasoh, khana arahming kha abâna khanga mahngi cher chang rasoh.

¹⁴ Apu apahei ṭhatmak kha Rōngpu’n mandonsōt rasoh khana anu setna kha rangei mandam hêrmak rasoh.

¹⁵ Rōngpu’n ansetnahei kha mandonsōt ṭhak rasoh, khana anmani kha’m mahngi cher chang jo hei rasoh!

¹⁶ Amapa kha lungset kathem changhnōm hêrmak; sara mi inrenghei leh inthōpui kasehei kha asuk manrim hei khana athat hei.

¹⁷ Ama’n hâksêr sik amadu mi kha, hâksêr chang rasoh! Ama’n vângṭhat pek sik ahōt mi kha, tûte’n vângṭhat pek mak rasoh!

¹⁸ Ama’n hâksêr hi abinga pōn invon kapōa ahmang; ama binga hâksêrna khan tui kapōa ataksa inche rasoh khana thaitui kapōa aru shunga inchepek rasoh!

¹⁹ Khahei khan pōn inkhu kapōa makhu sona, khōnkir kapōa kakō tlit rasoh!

²⁰ Rōngpu, kachunga ṭhatmak ṭong kahrihei leh kei inrepuihei kha khanga karâkna pek hei roh!

²¹ Tâk-kha chunghnung Rōngpu, naṭongtep kapōa kei a’nthōpui roh, khana nalungset kaṭha vâng khan eihuksōt roh.

²² Kei chu sara leh akatlasam eng kae; kamalung ari katlunga atôna kae.

²³ Khōhlei tinga daihlim kapōa kei inhmangvet jo eng; sihling khaiphâr, thli’n asêm manjōng kapōa asêm manjōng jo eng.

²⁴ Busâk tlâksam jâra kamarkhup hei ratha neimak jo hei; kataksa hei hi kakonga, kavun leh karu rōk jo eng kae.

²⁵ Mihe’n anihmu pha leh sem tlona anhmang jo eng. Hnōisetak a anlu ankachuk khum eng.

²⁶ A’nthōpui roh, O Rōngpu ka-Pathen, nalungset inthlengmak jâra khan eihuk roh!

²⁷ Kei kahuksōtpa che kae ti kha, ka’nrepui he’n manhret hei che rasoh!

²⁸ Anmani’n chu anhâksêr thei eng, tâk na’nchu mahâmṭhat napek sik eng, khana anikasuk inrim hei kha mihe’n tor hei rasoh, khana nasōk kei inpâkna amannei roh.

²⁹ Kei inrepuihei kha inzakna’n makhu hei rasoh; inzakna kha zakkō kapōa inhak hei rasoh.

³⁰ Rasa kasōktak a Rōngpu kha inpâkna kapek sik, mipui inchunna shunga khan ama kachoi ka-ân sik,

³¹ ajârchu ama’n sarahei akhâr hei, khana anthina sik a maset ankapek heia inphut ahuksōt hei.