HLAHEI 106 - LEKHARABU INTHENG (BSI)

Amihei Hnenga Rōngpu Ṭhatna

¹ Rōngpu kha choi ka-ân ruh! Rōngpu kha manpâk ruh, ajârchu ama hi akaṭha kae; alungsetna hi kumleikōa kae.

² Aṭōntlo kalenhei kha tu’n mo ahri tor sik? Tu’n mo katluk hrep a achoi ka-ântor sik?

³ Akadik a katlo ṭhak, aṭongpek kajuihei kha akahōi hei kae.

⁴ Rōngpu, namihei na’nthōpui hei pha leh ajōng mandonsōt roh; nahuksōt hei pha kha leh ke’m eimanveisa roh.

⁵ Namihei hongkhang sōtna eiman hmu roh, namihei inpâkna kha ke’m eiman chensa roh, nami kachang hei hōina leh inlensakna khan eimanveisa roh.

⁶ Kanpu kanpahei taleitlo kapōa keini’n setna kantlo jo; keini akadik mak leh akaṭhamak leikachang jo ung.

⁷ Egypt a kanpu kanpa he’n Pathen ṭōn leitlo inlak kha leimanhret mak jo hei; hmun katamtak a alungsetna aleimanhmu hei kha anleimahngi jo, khana Tuipui Kasen a khan Akahratpen kha anleidōi jo.

⁸ Tâk-kha aratha hratna manhmuna sik a, aṭong leitepna dungjuia alei huksōt hei.

⁹ Ama’n Tuipui Kasen kha, ṭong apek a hong kachâr jo; khana amihei kha tlâng kachâra re amanke jo hei.

¹⁰ Anmani kha ankahōt heia inphut ahuksōt hei; an-inrepui heia inphut akeisōt hei.

¹¹ Tâk-kha an-inrepuihei khachu tui kha amanvursi hei, inkhatbek um hringmak jo hei.

¹² Khana inphut aṭongtep kha ami he’n antaksena, ama choi ka-ânna hla ansak jo.

¹³ Tâk-kha aṭōn leitlo kha inrangtak a anleimahngia, ama mansena hngâk lo jen a le’nhling jo hei.

¹⁴ Nêrdiram a ngeituina hingja anleinei jo; khana Pathen kha enmansinna anleinei jo;

¹⁵ achang jâra Pathen in antader hei kha aleipek hei, tâk ankâra khan ṭit ka-om tak hrise ajōngtir peksa jo hei.

¹⁶ Khava nêrdiram a khan Moses leh Aaron, Pathen sōk intheng hei chunga khan thangsetna anleinei jo.

¹⁷ Khava sōa ralei kakik khōia Dathan kha amade jo khana Abiram leh a-innshunghei kha’m avûmsi jo hei;

¹⁸ ankahnung kajuihei chunga hmei jōngkatla a mikaṭhamak-hei kha amankânghlon sō jo hei.

¹⁹ Sinaia sana vâng sehrat chete lim ansyema, khava limsyem kha ankamuk;

²⁰ Pathen lûrna kha khava ranhring phi kasa lim kha leh anthleng jo.

²¹ Aratha neina vâng Egypt ram anhei kahukpa Pathen kha anleimahngi jo.

²² Khana khan heituk a ṭōn-inlak mo aleitlo jo! Tuipui Kasen a heituk det-hla ka-om mo aleitlo jo!

²³ Pathen in amihei kha suk manhmang jo hei rong aleiti pha, asōk kadeisōt Moses khan Pathen hmaikunga kangira ankasuk inhmang sik ahnuknat kha aleitinga kae.

²⁴ Khava sōa ram kahōi kha leimadu mak jo hei, ajârchu Pathen ṭongtep kha leitaksen mak hei.

²⁵ Anpōn-inna khan ka-om heia Pathen hneng leikachōr hei khana Rōngpu ṭong kha rangei mak jo hei.

²⁶ Khava jâra anmani kha nêrdiram a amanthi sik hei kae tia ka-ôrtak a ṭong inhnak aleipek hei

²⁷ khana ansōn anpârhei kha jât-hlop hei kâra inchek heia, mihlop-hei ram a amanthi jo hei.

²⁸ Khava sōa Pathen mihei kha Peor a Baal kamukna inveisa jo hei. akathi pathenhei hnenga inthoina tōkna kha anleisâk jo.

²⁹ Anṭōntlo khan Pathen hnuknat kha anmanhnak chet-chet jo, Khana ṭit ka-om tak hrise kha ankâra hong ka-om jo.

³⁰ Tâk-kha Phinehas kha kangirsōt a set katlohei kha karâkna apek hei, khana hrise kha kabâng jo.

³¹ Khana inphut aṭōntlo kha ama mandonsōtna anhongnei jo; khana ahei tik a anneiṭhak sik jo.

³² Meriba tuipûtna ami he’n Rōngpu kha ahnuk anmannat pek jo, anmani jâra Moses khan malung inrengna aleinei.

³³ Moses kha khang hrep khan ahnuk anmannat jo, mandon phâkloa ṭong aleihrisōt jo.

³⁴ Anmani’n Rōngpu ṭong pekna hei kapōa jât-hlop hei kha leithat mak jo hei,

³⁵ tâk jōr macheng inlotō heia, jât-hlop hei beklangting jôk anjui jo.

³⁶ Pathen mihei khan limsyem kha ankamuk jo, khana an-inhmangna kha anheirônsōt.

³⁷ Canaana limhei hneng inthoina sik a ansanuhei leh ansapahei kha antōksōt hei.

³⁸ Khō inhret mak sahei kha anleithat hei, khava mi thatna khan anram kha anmanbōk jo.

³⁹ An-omchen khan anbinga innim jo hei khana Pathen hneng taksenthei changmak jo hei.

⁴⁰ Khava jâra Rōngpu kha amihei chunga ahnuk kana jo; khana amater jo hei.

⁴¹ Jât-hlop hei ratha hratna thōia adahlon jo hei, khana ankadōihei khan anchunga vai anrôn jo.

⁴² Ankadōihei khan khōdeng anleimanthei jo hei. heirakip a anvai rônna thōia anda jo hei.

⁴³ Pha katamtak Rōngpu’n ahuksōt hei, tâk anmani’n ama dōina sik rōk anjonga khana setna a katla inhlut chet-chet heia kae.

⁴⁴ Achang jo’num anmani’n an-ông pha leh Pathen in athei pek hei, an-inrengna kha amanhret pek hei.

⁴⁵ Anmani jâra khan aṭongtep kha ahong mandonsōt, khana alungset len jâra anchunga amalung athleng nôk.

⁴⁶ Anmani kasuk inrim hei kha, anmani sik a malung natpuina amannei hei.

⁴⁷ O Rōngpu, kan-Pathen, ahuk roh, jât-hlop hei kâra inphut keini aṭhōi male nôk roh, keini’n narahming kha kanchoi ka-ân theina sik leh kanmanpâk theina sik che.

⁴⁸ Israelhei Pathen, Rōngpu kha choi manshâng ruh; tûnum ahei tik a’m choi ka-ân ruh! Mi rakip in, “Amen!” ti hei rasoh. Rōngpu kha choi ka-ân ruh!