HLAHEI 105 - LEKHARABU INTHENG (BSI)

Pathen leh Amihei

¹ Rōngpu hneng inpâkna pek ruh, alenna kha phôngsōt ruh. aṭōn tlohei kha jât-hei hneng manthei hei ruh.

² Ahnenga choi ka-ânna hla sak ruh; aṭōntlo inlak-hei kha manthei hei ruh.

³ Ama ta nichang jâra inpâk ruh; ama inmuk rakip inpâk ruh.

⁴ Inthōpui rangeia Rōngpu hneng se ruh; ama kha kamuk ṭhak ruh.

^5-6 Asōkpa Abraham sōn leh pâr nangni; akadeisōtpa Jacob sōn leh pâr nangni: Pathen ṭōn-inlak leitlo hei kha leh aṭong leitanna hei kha mandon ruh.

⁷ Rōngpu hi ni-Pathen kae; aṭongpek-hei kha vânhnōi rakip sik a kae.

⁸ Aṭong tepna kha ahei tik a ajui ṭhak sik, a’ntepna kha khang 1,000 hei sik a kae.

⁹ Abraham leh anlei inhnōmna kha ajui sik Isaac hneng a’ntepna kha ajui sik.

¹⁰ Rōngpu’n Jacob leh intepna aleinei, khavakha kumleikōa aka-om ṭhak sik kha kae.

¹¹ Ama’n aleiti, “Ke’n Canaan ram kapek sik che. Khavakha nang chen kachang sik jo.”

¹² Pathen mihei kha katlôm hei khana Canaan ram a khōhmehei kae.

¹³ Anmani kha ram inkhat a inphut inkhat a rengram inkhat a inphut inkhat a kalôn lele hei.

¹⁴ Tâk-kha Pathen in anmani kha tûte mansuk manrim mak hei; anmani hrungna sik a, ama’n renghei kha aleirakôk hei:

¹⁵ Ama’n ati, “Kakadeisōt sōk-hei kha tônmak hei ruh; kasân kathemhei kha heite manlomak hei ruh.”

¹⁶ Rōngpu’n anrama ṭâm amathlâk, khana sâk leh in rakip alosōt pek hei.

¹⁷ Tâk-kha ama’n mi inkhat anhmating aleitir, sōk kapōa ale’njōrsōt jo Joseph kha kae.

¹⁸ Ake thirhrui vâng ankhit karâkpek, khana arînga thir rîngke anman-or,

¹⁹ amak hma aleihri hei kha hui atlungsō mak lai seng aleithōk. Rōngpu ṭong khan ama kha kadik tia amalâr.

²⁰ Khava sōa Egypt rengpa khan ama kha amasō jo; jât-hei vaikarônpa khan amasō jo.

²¹ Ama kha avai karôn sik a ngansena anei jo, khana aram pumpui chunga vai karôna asyem jo,

²² Rengpa ṭōnpui karônhei leh ama inse hei chunga rakôk torna ratha kha apek jo.

²³ Khava sōa Jacob kha Egypt ram a leikase jo, Khava ram a khan ka-om jo.

²⁴ Khana khan Rōngpu’n amihei kha sa leh nai katamtak amannei jo hei. Khana an-inrepuihei kanek a amanhrat jôk jo hei.

²⁵ Ama’n amihei kha Egypt mihei tahōt sik amanchang jo hei. khana asōk-hei chunga hnōisena amannei jo hei.

²⁶ Khan chu ama’n asōk Moses leh Aaron kha akadeisōt heia aleitir hei.

²⁷ Anmani’n Pathen ratha hratna ṭōn anleitlo, khana Egypt ram a ṭōn-inlak anleitlosōt.

²⁸ Ama’n khava ram a khan khō inthim aleitir, tâk Egypt sahe’n aṭong kha leijui mak hei.

²⁹ Antuidung hei kha thisen amanchang pek hei, khana annga rakip hei kha athatsō pek hei.

³⁰ Anramshung kha uṭok hei amansip pek hei, anreng khōpui shung katlunga khan kasip sō hei.

³¹ Pathen in mathōihei leh thōidihei omna sik a ṭong apek a anram pumpui kha kasiptak jo hei.

³² Khōsûr sik kahlânga anrama khan kahre leh khō inphe ajōngtir jo.

³³ Anvomhrui thei leh antheichang hei kha asuk mansetpek jo hei; khana thingkung rakip avōk mathlekpet jo hei.

³⁴ Ama’n ṭong apek a anramshung kha, khâikhu tei torlo kasiptak jo;

³⁵ khahei khan ram shunga akakek rakip ansâksō jo; ansachi hei ansâksō jo hei.

³⁶ Ama’n Egypt innshung rakip a ansa pase upa rakip athatsō pek jo hei.

³⁷ Khava sōa Israelhei kha aṭhōisōt jo hei; anmani’n sana leh dangka hingja an-inrôn khana ankhenga kadam hei khana kahrat hei.

³⁸ Egypt mihe’n anleiṭit hei khana andahlon hei pha anning leikaṭha.

³⁹ Amihei chunga sumtuk aman om pek hei, khana jân a anvâr sik a hmei apek hei.

⁴⁰ Anmani’n sâk sik ander pha leh vakanim ajongpek hei. anmalung chimtheina sik a marvâna inphut sâk leh in ajōng pek hei.

⁴¹ Hlungpui kha amahlang pek hei khana khan tui hong kasōk tuidung kapōa nêrdiram a kalōng jo.

⁴² Asōkpa Abraham hnenga inthengtak a a’ntepna kha ahong mandonsōt jo.

⁴³ Khava jâra akadeisōt mipuihei kha aleiṭhōisōt jo hei, khana anmani’n kahōi leh inpâk a hla anleisak jo.

⁴⁴ Ama’n anmani kha mihlop-hei ram kha aleipek hei; khana anhleihei kha’m amanlo hei,

⁴⁵ khang’khan ami he’n ama dân anjui theina sik, aṭongpek rakip anjui theina sik a atloa kae. Rōngpu kha choi ka-ân ruh!