HLAHEI 104 - LEKHARABU INTHENG (BSI)

Vânhnōi Kasyempa Choi ka-ânna

¹ Eh karathla, Rōngpu kha choi ka-ân roh! O Rōngpu, ka-Pathen, heituk a akalen che mo! Lûrna leh lenna’n akatōm che;

² nabinga vâr inkhukhum che. Marvânhei kha Pōn-inn kapōa namazer

³ khana na-inn kha tuihei chunga nasak. Sumtuk kha shakor gâri kapōa nahmanga, thli mathla chunga kachōng che.

⁴ Thli kha naṭong karôn tlângva a nahmang, khō inphe kha nasōk naman chang hei.

⁵ Nang in ralei kha ahmun kahnettak a nada, khavakha inhlinghêr mak jo ning.

⁶ Khava chunga tui-ôngpui kha pōn invonna kapōa nada. khan tlângbunghei kha tui vânga namakhusi hei.

⁷ Tâk-kha nang in tuihei kha narasei hei pha katlân hei; anmani’n naṭongpek naka-ông kha anthei pha inranga kalōngsōt jo hei.

⁸ Anmani hmebung chunga leh phaicham heia kalōng inthla hei, anmani sik a naleisyem pek hmun heia vakatlung hei.

⁹ Raleichung ankachûm nôk makna sik a, antarakan hêrmak sik ramri nasyempek hei.

¹⁰ Phaichama sik a tuihnâr namanpût, khana hmebunghei kâk a tuidunghei namanlōng.

¹¹ Khahei khan ramshahei sik a tui napek hei; khana khan ram shakōrtung he’n antuihre anmanchimna.

¹² Anhnenga thingkung heia khan vahe’n rabu anchôm heia, inhrâm hei.

¹³ Marvâna inphut hmebung chung heia khō namansûr, khana raleichung hi namahâm ṭhatna khan kasip.

¹⁴ Ranhringhei sik a kahar naman hmông, mihringhei tahmang sik a thingkung namankek, khang’khan kara anhongnei theina sik

¹⁵ khana an-inpâkna sik vomhrui ju namasō pek hei, anmalung hōina sik olive thai namasō pek hei, anratha ngarna sik a buhlom namasō pek hei.

¹⁶ Pathen in amankek thingkung cedar khan khōtui katamtak ahmu.

¹⁷ Khana khan vahe’n rabu anchôm, vabang he’n fir thingkunghei lera anrabu ankei.

¹⁸ Sharja hei kha bung inshânga ka-om heia maju, telep-hei khan hlung karea inthup hei.

¹⁹ Thla kathleng manhretna sik a sorthla nasyem, simni’n ahlut sik pha kha amanhret.

²⁰ Jân pha nasyema, khō ahon’thim pha ramsha rakip hei kha hong kasōk hei.

²¹ Pathen tapek ansamsâk kajōnga, Shabakkai tehei kha inhrung hei.

²² Kani ahong sōk pha an-omna inle nôk hei, ankhur shunga khan vakaje ri hei.

²³ Khan chu, mihe’n ṭōn katlo sik a kasōksōt hei khōhlei achangmak lai seng anṭōn kha anvatloa kae.

²⁴ Rōngpu, nang in neinâk hingja nasyem hei! Heituk kasing tak a nasyempet hei mo? Ralei hi naranhring in kasip hei.

²⁵ Tui-ôngpui kha hin ka-om, kalen khana inzertak, khava shunga tei torlo ranhring ka-om hei, akalen leh akasinhei.

²⁶ Khava chunga tuirakōng intôr, ashunga Leviathan kha indei khava naleisyem tuipui khōhripa kha.

²⁷ Ankhengpet a anvon aṭâm pha leh sâk sik napekna sik a nahnenga inhngaipet hei.

²⁸ Nang in napek hei kha, anmani’n ansâk; nang in sâk leh in napek hei, khana anmalung katlâi.

²⁹ Nang in na’nhesōt pha leh kaṭi hei; khana nakaphuk kha nalomale pha kathi ri jo hei khana anhongsōk inphutna vaiphina inle nôk jo hei.

³⁰ Tâk-kha nang in kaphuk napek hei leh anmani hong insyem hei; nang in raleia hringkhōther napek a kae.

³¹ Rōngpu lûrna kha ahei tik a omṭhak rasoh! Akutsyemhei chunga Rōngpu kha inpâk rasoh!

³² Ama’n ralei hi ajōng en pha khavakha innok; tlângbunghei kha aheitôn pha hmeikhu hong kasōk.

³³ Kahringkhōa ke’n Rōngpu hneng hla kasak sik; kahring lai seng ka-Pathen choi ka-ânna hla kasak sik.

³⁴ Kahlasak a khan ama tlaina chang rasoh, ajârchu kei inpâkna hi ama a inphut kae.

³⁵ Raleia inphut mikaset-hei kha suk manram chang hei rasoh; mikaṭhamak-hei kha om hêrmak jo hei rasoh. Eh karathla, Rōngpu kha choi ka-ân roh! Rōngpu kha choi ka-ân roh!