HLAHEI 103 - LEKHARABU INTHENG (BSI)

Pathen Lungsetna

¹ Karathla, Rōngpu kha choi ka-ân roh! Kapum in ama rahming intheng kha choi ka-ân roh!

² Karathla, Rōngpu kha choi ka-ân roh! Khangtuk hrep alungsetna kha mahngi mak roh.

³ Kasetna rakip arangei mandam eng khana kanat rakip um amandam jo eng.

⁴ Thlânna inphut aṭhensōt eng, khana lungset leh marit a mahâmṭhat apek eng.

⁵ Khangdônga ka-om theina sik khana mârhmu kapōa kahratna sik, kahringkhō hi ṭhatna vâng amansip eng.

⁶ Suk manrima ka-om hei ôtuma Rōngpu’n ṭong atan, khana anmani dikna ratha kha apek hei.

⁷ Moses hneng aṭōn mantluk kha amanthei, khana ahratna ṭōntlo kha Israel mihei aman-en hei.

⁸ Rōngpu chu marit leh lungset kae, hnuk kanabei mak leh lungset inthlengmak pui katluk kae.

⁹ Ama’n mi raseiṭhak mak, ahnuk mannat ṭhak mak.

¹⁰ Nichen sik rahōi kasōk kapōhrep a khōdengthei apek mak ning. Achangmak leh nisetna leh niṭhat makna hei intōk a phu hlōmak ning.

¹¹ Raleichunga inphut bōirōk a’nshâng kapōhrep a, ama kaṭit hei chunga alungsetna hi inshâng.

¹² Nisō kha tlaitlâk a inphut a’nkâr kapōhrep a, einihei setna kha’m nihnenga inphut ahlon sōt pek me.

¹³ Apa’n asa alungset kapōhrep a, ama kaṭit hei kha Rōngpu’n alungset hei.

¹⁴ Ama’n eini hi heivânga mo a’nsyem me amanhret; vaiphin nichang kha ama’n amandonsōt.

¹⁵ Eini hichu kahar kapōhrep me kae. Ram reipâr hei kapōhrep a hong indôna kakhang me;

¹⁶ khan chu, thli khan ahongsêm pha, kaṭi jo, tûte’n hmu nôk mak jo hei.

¹⁷ Tâk-kha Rōngpu kajana kaneihei chunga alungsetna kha ahei tik a ka-om ṭhak, khana aṭhatna khan akhang rakip a ajui ṭhak

¹⁸ khavakha aṭongtep kadik a ka-om hei, khana aṭongpek-hei taksentak a kajuihei sik a kae.

¹⁹ Rōngpu’n alen in-ongna kha marvâna amatung; heirakip chunga reng kachang.

²⁰ Akahrat leh ratha kangar marvân ngevahei, aṭongpek kajuihei, aṭong hri katheihei, Rōngpu kha kaja ruh!

²¹ Marvâna ratha kahrat rakip, alungdo katlo asōk nangni’n, Rōngpu kha choi ka-ân ruh!

²² Akutsyem ranhring rakip in avai rônna rakip a Rōngpu kha choi ka-ân ruh! Karathla’n Rōngpu kha choi ka-ân roh!