HLAHEI 102 - LEKHARABU INTHENG (BSI)

Khōdeng Kathei Khangdông Inkhat Derna

¹ O Rōngpu, kaderna arangei pek roh, khana inṭangpui sik a ka-ôngna kha athei pek roh!

² Khōdeng kathei pha keia inphut a’nhesōt pek mak roh! Arangei pek roh, khana kabek che pha inrangtak a ajōng masôn roh!

³ Kahringkhō hi hmeikhu kapōa hong inhmang jo; khana kataksa hi hmei kapōa hong kakâng jo.

⁴ Kahar kachâr kapōa anivōk mathlâk jo; busâk hnōmna malung kha’m neimak jo eng.

⁵ Kare kasōk a inkōi eng; kei heite’m changmak eng, kavun leh karusai rōk eng kae.

⁶ Nêrdiram a va ka-ang jo eng, innram hleirama simbu ka-ang jo eng.

⁷ Kaje ravâng kaharṭhak eng, innchunga ka-om va sangkhat ka-ang jo eng.

⁸ Sûn nilun ka’nrepui he’n inzakna anpek eng; khava ani inhnōisō hei khan karahming hâksêrna anhmang.

^9-10 Nahnuknat leh nahnuk khôk jâra, ravut kha kabu kachang jo, khana katui in kha kahmit rathli leh inchôm jo. Nang in nahrut eng khan nahlon sōt jo eng.

¹¹ Kahringkhō hi khōhleia daihlim ka-ang jo; kei hi kahar kachâr ka-ang jo eng.

¹² Tâk-kha O Rōngpu nang chu kumleikō reng che kae; akhang rakip in nang anmandonsōt sik che.

¹³ Nang hong kathōisōt sik chea kha Zion kha lungset a narôn sik; amanu lungsetna sik pha kha hong katlung jo; hivahi aphatak jo kae.

¹⁴ Amanu kha anleisukset jo’num nasōk he’nchu anlungset; amanu kha inhmanga aleiom jo’num anmani’n lungkhamna annei.

¹⁵ Rōngpu kha jât rakip in anṭit sik; raleichung reng rakip in arathahrat kha anṭit sik.

¹⁶ Rōngpu’n Zion kha asakther nôk pha, alenna kha amalâr nôk sik.

¹⁷ Ama’n adahlon mipuihei karesō athei pek sik hei. khana anderna kha arangei pek sik hei.

¹⁸ Ala’nte mak mihe’n anhongchoi ka-ân theina sik, akahong khang sik a Rōngpu ṭōntlohei kha mazet ruh,

¹⁹ Rōngpu’n ahmun intheng inshânga inphut a ajōng ensuk, marvâna inphut raleichung ajōng en.

²⁰ Hlung kurkhum a ka-om hei inkōi rasa aleithei khana akathi sik a maset kachen hei kha amasō hei.

²¹ Kachanga ama rahming kha Ziona inphôngsōt sik. Khana Jerusalema anchoi ka-ân sik.

²² Phung leh jât-hei leh rengram he’n inchun heia Rōngpu kha anhong kamuk sik.

²³ Kasinlai Rōngpu’n akatlasama aleisyem eng; kahringkhō amanbongpek eng.

²⁴ Eh! Pathen, kater mak hma tûnhin alosōt mak hi roh. O Rōngpu, nang chu ahei tik a kahring ṭhak che;

²⁵ tenlai khan ralei hi naleisyem. khana nakutkhet in marvânhei kha naleisyem hei.

²⁶ Khahei seng kha inhmang sik hei, tâk nang chu ka-om ṭhak sik che; khahei khachu pōnse hei kapōa inhler sik hei. Pōnhei kapōa nalathleng sik hei, khana inhmang sik hei.

²⁷ Tâk-kha nang chu nangaia ka-om ṭhak che, khana nahringkhō kha inchaitik om mak.

²⁸ Kanvonchoi hei kha huk a ka-om sik hei, khana nang hrungna shunga ansōn anpârhei kha inhukna anchen sik.