HLAHEI 10 - LEKHARABU INTHENG (BSI)

Ṭongtan Dikna sik Derna

¹ O Rōngpu, heisa mo akahlatak a aka-om che? Kanbōi pha heisa mo a’nthup che?

² Mikaṭhamak kha inlensak misarahei anmanrim hei; anchâng doa khan anman-ôk hei.

³ Mikaṭhamak he’n anṭhatmak maduna kha an-inlensak pui; mi inphâm he’n Rōngpu kha anhōt khana anhâksêr.

⁴ Mikaṭhamak he’n Rōngpu kha heite sakmak hei; Pathen hichu heite khôkmak tia inlensak pum a anmandon.

⁵ Mikaṭhamak he’n antlona rakip a hme ansō. Anmani’n Pathen ṭong tanna kha manhret phâkmak hei; an-inrepuihei kha anhner anpher thlōn hei.

⁶ Anmani’n anbinga anti, “Kei thōi tlâkna nei hêrmak ning, inrengna ratō hêrmak ning.”

⁷ Anbeisō kha hâksêrna hei, maleiseina hei, khana mi maṭhitna kasip hei; anmani ṭongse hrina leh akaṭhamak ṭonghrina inrang hei.

⁸ Anmani khōte heia inthup heia; ṭhenakase hei thatna sik a anhlō hei. Inthōpui kase hei suk manrimna sik a an-en mathlip hei;

⁹ an-inthupna hmun a shabakkaihei kapōa anhlō hei, Sarahei kha anhlō hei; anchâng kam a anman-ôk hei khana ankeisôn hei.

¹⁰ Inthōpui kasehei kha ankahnur rachi hei, khana anratha neina khan antorcher hei.

¹¹ Mikaṭhamak he’n anbinga anti, “Pathen in heite donmak! Ahmit akathim jo, ahmu hêrmak jo ning.”

¹² O Rōngpu mikaṭhamak heiso karâkna pek hei roh! Khōdeng katheihei kha mandonsōt hei roh!

¹³ Mikaṭhamak-hei khan heikhong mo Pathen kha antateitôm sik, khana anbinga, “Ama’n kei karâkna apek mak ning,” antati tor sik?

¹⁴ Tâk-kha bōina leh khōdeng theina kha nang in nachîk a nahmu, khana inthōpuina sik ahei tik a intluk ṭhak che. Inthōpui kasehei khan nahnenga ho’npek inhlut hei; inthōpui inngei hei kha ahei tik a nabôm hei.

¹⁵ Mikaṭhamak leh malung kadikmak hei ratha neina kha vōktanpek hei roh, dikmak antlo jâra karâkna pek hei roh khavakha avea antlo nôk makna sik a.

¹⁶ Rōngpu chu are-rea reng kae; pathen ralak inmuk hei chu aram a inphut inhmang sik hei.

¹⁷ O Rōngpu, a’nsinsak hei derna nathei pek sik hei; nang in anmani vak neina napek sik hei.

¹⁸ Nang in nu leh pa kasehei leh suk manrim hei ṭap rasa nathei pek sik hei; khana akathithei mihring he’n ṭit-inpirna avea antlo makna sik anmani ôna ṭong natan sik.