HEBREWHEI 9 - LEKHARABU INTHENG (BSI)Ralei leh Marvâna Kamukna 1 Intepna hma inkeia khan kamukna sik dânhei leh kamukna sik ralei hmun kha leika-om hei. 2 Avâng intonga rabuk inkhat le’ntung, khavakha Hmun Intheng inti. Khava shunga khan thaihmei matungna, dokhâng leh Pathena a’ntōk buhlom ka-om. 3 Inhni tlukna pinden shung intonga Rabuk kha Hmun Inthengpen inti. 4 Khava shunga khan marim katui ro mankhutna, sana maichâm leh Intepna Bôm sana vâng a’ntōm inkheng ka-om. Khava Intepna Bôm shunga khan marvân thlaisâk manna dana sanabe, Aaron khōnghre abō kacher leh intepna ṭong inzet hlungpek 2 ka-om. 5 Thingrakōng chunga khan Pathen a-om manhretna mathla kanei he’n, set rangei mandamna hmun chunga khan anmathla anzer khuma ka-om hei. Tâk-kha tûn hihei rakip bân kaneitak a hri manchênna sik pha changmak jo. 6 Khava neinâk-hei kha hing’hin anta leimantluk hei kae. Rabuk vâng intong shunga khan ani tina thempuhei kha anṭōn katlo sik a kahlut ṭhak hei, 7 tâk Rabuk shung intong den a khan chu, kum khat shunga vōi khat rōk Thempu Kalen rōk kha kahlut a abinga sik leh mipuihei sik, manhret loa anset tlona chunga mipui kahlang kathlenga thisen achoia Pathen hneng avatōk a kae. 8 Rabuk vâng intong den kha alangirlai seng Hmun Inthengpen jōnna sik hlam kha ala’nkhâr kae tia, hiva ṭōn mantlukna heia inphut Rathla Intheng in inchêntak a amantheia kae. 9 Hivahi tûn pha sik a alim manhmuna inkhat kae. Ti chu Pathen hnenga tōkna leh ranhring vâng inthoia Pathen kamukna hei hin, a’nmukpa malung kha pui mathluk tor mak, 10 ajârchu anmani’n sâk leh in vâng khana manthengna nitna katamtak vâng rōk antatlo kae. Khahei kha Pathen in heirakip asyem manṭhat nôk mak kârsenga sik rōk a avâng pônga hmang sik dânhei kha kae. 11 Achang ravâng hinna ka-om akaṭhasa jo hei chunga Christa kha Thempu Kalen inkhat a kajōngdek jo. Ama ṭōn razenna rabuk kha akalen chet leh pui katlukdet kae; mihring kut vâng a’nsyem rabuk changmak, ti chu, hivahi a’nsyemsōt vânhnōi ṭhen inkhat changmak. 12 Christa kha rabuk shunga Hmun Inthengpen kha vōi khat rōk ahlut pha khan, ama’n ke leh sehrat thi inthoina tōk sik a choimak, ama thisen khet kha achoia, eini sik kumsôt hringna ajōng rôn. 13 Khana, ke leh sehratche thisen khana sehratte ro manvâm ravut vâng khan bekdân dungjuia a’nthengmak mihei kha akathek khum heia kae. Khana bekdân dungjuia an-intheng makna kha alosōt a amantheng heia kae. 14 Hivahi adik inchu, Christa thisen rarap khan chu heituk akakhe chet a ṭōn achai sik jo mo! Kumsôt Pathen Rathla a inphut Christa kha pui katluk tōkna kachanga Pathen hneng abinga inpek sōt jo. Akahring Pathen kha nirazen theina sik, athisen khan eini mandon ṭhen theina kha hnemna kase bekdâna inphut amantheng pek sik me. 15 Khava jâra Pathen tabek mihei khan Pathen intepna kumsôt mahâmṭhatna kha anchen theina sik, intepna ther ṭōn intluk kha Christa hi kae. Hivahi kaethei ajârchu hma-inkei intepna thōia khan mihei tlosetna inphut ajōng kasōk thina inkhat kha leika-om jo. 16 Akathi inkhat lungdo tlopek sik chunga, ṭong lungdo akadahlon mi kha kathikhet jo ti manchên nger hi sik kasōk. 17 Ajârchu ṭong lungdo kadahlon mi kha ahring lai seng aṭong dahlon kha heite hnemmak; athisōtōa ṭōn vânga tlopek thei kae. 18 Khava jâra intepna hma-inkei kapha kha’m thisen anhmang rōk leh ṭōntlo theina kha hong kae. 19 Hmapena, Dân shunga ṭongpek ka-om rakip kha Moses’n mihei amanthei heia kae. Khava sōa sehratche leh ke thisen kha aloa tui leh amanheia sahme kasen leh hyssop phibur vâng Dânrabu kha leh mi rakip akathing thlōn heia kae. 20 Ama’n ati, “Hivahi Pathen in nantajui sik a ṭongpek aleipek chei khava intepna chunga mêrchîk katatna thisen kha kae.” 21 Khang tlit a khan A’ntheng Rabuk leh kamukna a’nhmang neinâk rakip hei chunga thisen kha Moses’n aleikathing thlōna kae. 22 Kadik, Dân dungjuia neinâk rakip hi thisen in amantheng khana thisen nisunthlōn rōk leh set rangei mandamna kha ka-om. Christa Intōksōtna’n Set Ahlon sōt 23 Khava marvân chunga neinâk lim kapō hei kha khanga mantheng sik anrangeia kae. Achang inchu marvân chunga neinâk-hei rarap khachu akaṭhachet inthoina anrangeia kae. 24 Ajârchu akadik inkhat lim alo, mihring kut vânga insyem Hmun Inthenga khan Christa kha akahlut changmak. Ama marvân chungkhet a Pathen hmaikunga eini kahlanga kasea tûnhin ava’nlâr jo kae. 25 Jehudihei Thempu Kalen kha Hmun Inthengpena khan akum kataia vōi khat ran thisen leh inṭhōia kahlut a kae. Tâk-kha Christa kha abinga a’ntōk sōtna sik ave-avea hlutmak, 26 khanga achang inchu, vânhnōi ralei insyembia inphut ave-avea inrimna aleide jo akachang sik kae. Kha changloa, tûnchu pha rakip a’nchai sik ting, ama intōksōtna hin setna rakip a’nthengna sik ahei tik a sik a vōi khat rōk ava’nlâr kae. 27 Mi rakip vōi khat alakathi nger sik kae, khava sō leh Pathen in aṭong atan sik kae. 28 Khava kapōa Christa kha’m mi katamtak setna kalosōt sik a vōi khat inthoina le’ntōksōt jo. Ama vōi 2 changna, setna chunga ensuina sik changloa, ama kahngâk ṭhak hei kahuk inhring sik a, alajōng inlâr nôk sik kae. |
Komrem Revised Bible - LEKHARABU INTHENG
Copyright © Bible Society of India, 2015.
Used by permission. All rights reserved worldwide.
Bible Society of India