HEBREWHEI 8 - LEKHARABU INTHENG (BSI)

Ni-Thempu Kalen Jesu

¹ Hinahin eini’n nihrinapen khachu: marvâna Akalûrpen Pathen len in-ongna changting a’n-ong Thempu Kalen inkhat ninei.

² Mihring tamatung changloa Rōngpu tamatung bek-rabûk kadiktak shunga A’nthengpen Hmun a khan Thempu Kalen kachanga ama’n arazen kae.

³ Thempu Kalen rakip Pathen hneng insuk inthengna ran vâng inthoina a-emak leh kutchoi katōk sik a matung hei kae; khava jâra eini Thempu Kalen inum tōk sik heikhat anei nger sik kasōk.

⁴ Jehudihei Dân tarangei kutchoi katōk sik thempu an-om jâra, ama raleichunga aleiom inchu, thempu inkhat leichang mak ning.

⁵ Thempuhei ṭōn leitlo kha kadiktak a chu marvâna omchen alim leh rahle inkhat antamanchu kae. Moses taleitlo omchen kha’m khava kapō kae. A’ntheng Bek-rabuk kha amatung sik pha, Pathen in Moses hneng, “Tlâng chunga manhmuna che rakip kapōtak a syemna sik mantluk roh,” ati.

⁶ Tâk-kha tûnchu, akaṭhachet heikhat sik a intepna chunga a’nhnga achang jâra, Pathen leh amihei kâra aleimantluk ṭongtepna kha akaṭhachet a-e kapōa, Jesu kha anmani kanek a akalen chet thempu ṭōn kha apek jo.

⁷ Ṭongtepna hma inkeia khan ṭhena heite aleiom mak inchu, 2 tlukna hi arangei mak sik kae.

⁸ Tâk-kha Pathen in amihei ṭhena kha ahmu pha hinga ahri: “Kanihei kha jōng katlung jo, Rōngpu’n ati, ke’n Israel mihei leh Judah phunghei intep puina ather inkhat kasyem sik.

⁹ Anpu sōnhei leh intepna kaleisyem kapō kha changmak jo ning, ankut kaleimatua Egypt ram a inphut kaleiṭhōi sōt lai hei kha changmak jo ning. Anmani kanṭong intepna chunga taksenthei leichang mak hei khava jâra ke’n leidon mak hei eng.

¹⁰ Tûnchu, akahong sik pha Israel mihei ka’nteppui sik hei kha hi kae, Rōngpu’n ati: Ke’n anmalunga kadânhei kha kadapek sik hei, khana anmalung shunga kamazet pek sik hei. Kei an-Pathen kachang sik eng, khana anmani kami kachang sik hei.

¹¹ Tûte’num aram a ami changpui hei hneng manthei mak jo ning, ‘Rōngpu manhret roh,’ tia anrama ami changpui hei hneng hrimak jo ning. Ajârchu akasin pena inphut akalenpen katlunga antamanhret sōpet sik jo eng kae.

¹² Ke’n ansetnahei karangei mandam sik hei khana anṭhena hei mandon nôk mak jo hei ning.”

¹³ Intepna ther a’nhri chungchânga hin, Pathen in hma-inkei intepna kha amarō amanchang jo; khana heikhat a’nrō jo khachu a’nset sōa inranga inhmu mak jo ning.