HEBREWHEI 7 - LEKHARABU INTHENG (BSI)

Melchizedek Thempu

¹ Hiva Melchizedek hi Salem reng leikachang khana Chunghnung Pathen thempu leikae. Abraham in reng manlihei re avatorna rehmun a khana inphut ahe’nle pha, Melchizedek in aleiratōa vâng aleipek,

² khana Abraham in aleichom rakip sôma inkhat ama hneng aleipek. (Melchizedek inti rahming hi inkhat changna, “Omchen kadik Reng,” tina kae; khana ama Salem reng achang jâra, “Chamna Reng,” tina’m kae).

³ Melchizedek nu leh pa chungchânga a’nzetna lekharabu om mak, apu apa inkhatbek thuhming rabu om mak; a’ntetna leh athina inzet lekharabu a’m om mak. Ama Pathen Sapa kapō kae; ahei tik chen a thempu inkhat a ka-om.

⁴ Khava jâra ama heituk a akalen mo nanmanhret jo. Nipa Abraham in rehmun a aheichomsōt rakip sôma inkhat ama aleipek a kae.

⁵ Levi sōn thempu kachang hei kha Israel heia inphut sôma inkhat ṭheina sik Dân in ṭong apek hei, ti chu anmani’m Abraham sōn anchang ravâng anrama miheia inphut anleiṭhei.

⁶ Melchizedek chu Levi sōna ahong kakōn changmak, tâk Pathen ṭongtep kachenpa Abraham a inphut sôma inkhat alo khana mahâmṭhatna aleipek a kae.

⁷ Mahâmṭhat kachenpa kanek a mahâmṭhat akapek pa kha kalen jôk ti hi inkei-chiona sik om mak.

⁸ Thempuhei sik a’nṭhei khachu akathithei mihei taṭhei kae, tâk Melchizedek sik a’nṭhei khachu, ṭong intheng tahri dungjuia akahring ṭhak inkhat taṭhei kae.

⁹ Khana hinga inhri, Abraham in sôma inkhat apek lai khan Levi (asōnhei sôma inkhat kaṭheihei) inum anleipek.

¹⁰ Amichu Levi kha le’ntet mak hi, tâk, hinga inti, Melchizedek in aratōlai khan anpu Abraham taksa shunga khan Levi kha le’nveisa jo.

¹¹ Levihei thempu changna chunga Israelhei hneng Dân kha a’npek kae. Tûn, Levi thempuhei ṭōn kha pui akatluk achang inchu, thempu hrui hlop Melchizedek hrui dungjuia thempu inkhat ahong inlâr sik kha arangei mak sik kae.

¹² Ajârchu thempu kachang kha a’nthleng pha, dân kha’m a’nthleng sik jo kae.

¹³ Khana tûn achungchânga hiva ṭong nihri ni-Rōngpu hi phung hlop mi inkhat kae; ama phung mi inkhatbek in thempu leichang hêrmak hei.

¹⁴ Ama hi Judah phunga ajo’nte mi inkhat kae ti hi kaṭhadek a inhret; khana Moses’n thempu ṭong aleihri lai khan hiva phung hi leimanvei samak.

Melchizedek kapō Thempu lak

¹⁵ Aṭong hi hong inlârchet jo; Melchizedek kapō thempu alak inkhat hong inlâr jo.

¹⁶ Ama mihring dân leh chôndân dungjuia thempu inkhat a’nsyem changmak; tâk inchaitik kaneimak akahring ṭhak ratha hratna vânga inphut kae.

¹⁷ Ajârchu ṭong intheng in ati, “Nang Melchizedek hruia aheitik a thempu inkhat akachang ṭhak sik che kae.”

¹⁸ Khava jâra dân marō kha asirting dasōt jo kae, ajârchu khavakha katlâksam jo khana hmangna kase jo kae.

¹⁹ Ajârchu Moses dân khan heite pui mathluk tor mak. Khana tûnchu akaṭhachet inhōrna inkhat inpek jo, khan vâng khan eini’n Pathen hneng inhnaichet a kahong jo me.

²⁰ Khava chunga Pathen ṭongtep kha’m ka-omsa. Milak he’n thempu anchang lai, khang khava ṭongtepna kha leiom mak.

²¹ Tâk-kha Jesu kha ṭongtepna jâra thempu inkhat ahong kachang kae. Ajârchu Pathen in ahnenga ati, “Rōngpu khan ṭongtepna inkhat ka-ôrtak a anei, khana hivahi thlengmak jo ning; ‘Nang ahei tik a thempu akachang sik che kae.’”

²² Khava jâra hiva in-ang makna hinum Jesu hi akaṭhachet ṭong intepna inkhat a a’ntung amanchang.

²³ Hivahin in-ang makna inkhat ka-om: thempu ralak katamtak leika-om hei, anthi jo jâra anṭōntlo kha manjōm tor mak hei.

²⁴ Tâk-kha Jesu khachu ahei tik a kahring ṭhak, khana thempu ṭōn kha milak inkhat kut a pek sōt mak.

²⁵ Khana ama’n tûnum ahei tik a’m ama inphut Pathen hneng akahong hei sik a hukmanhringna atlo tor, ajârchu anmani sik Pathen hneng akader sik a ahei tik a kahring ṭhak a kae.

²⁶ Khava jâra nirangei anikapek inthluktor Thempu Kalen kha Jesu hi kae. Ama a’ntheng kae. Ama’n setna leh sukṭhena heite neimak; ama mikase heia inphut ahlop a dasōt a ka-om khana marvânhei chunga keitou kachang jo.

²⁷ Ama chu thempu kalenhei kapōtak kha changmak; ti chu ahma inkeia abing setna sik a, khava sō leh mipuihei setna sik a, ani tina inthoina ama’n rangei mak. Ama’n abinga inphesōt a, mi rakip sik vōi khat rōk inthoina inkhat apek jo.

²⁸ Moses dân in pui katlukmak mihei kha Thempu Kalen sik a akadei; tâk dân kahnunga akajōng Pathen ṭong pinna leh inṭhōia intepna khan ahei tik a sik pui katluk a a’nsyem jo Sapa kha akadei.