HEBREWHEI 4 - LEKHARABU INTHENG (BSI)

¹ Tûnchu aleihri châmhngatna kha nichen theina sik ṭongtep kha apek jo me. Khana nangni tûte inkhat in khava ṭongtepsa châmhngatna kha hlut loa a-om makna sik insing thei rih.

² Ajârchu anmani taleithei kapōa, eini’num Ṭong kaṭha kha nithei jo. Anmani’n ṭong kha anthei ravâng anchunga ṭhatthei heite leitlosōt mak, ajârchu ṭong kha anthei pha taksenna leh inṭhōia leirahlâng mak hei.

³ Khava jâra akataksen eini’n Pathen ṭongtep châmhngatna kha nichen jo kae. Hivahi aleihri kapōhrep kha kae, “Kei kahnuk leikana a intepna inkhat kaleinei: Anmani kapek sik hei châmhngatna ram a khan hlut hêrmak hei ning.” Ama’n vânhnōi ralei asyema inphut aṭōn ahongchai joa achang inum hivahi ahria kae.

⁴ Ajârchu ni 7 chungchânga ṭong intheng hmun khat a hing’hin, “Pathen kha aṭōn leitloa inphut ni 7 tluk ning châm inhnga,” ati.

⁵ Hiva mama hi ahri nôk a, “Anmani châmhngatna sik kapek hei ram kha hlut hêrmak hei ning,” ati.

⁶ Hma inkeia Ṭong kaṭha akathei he’n châmhngatna kha leichen tor mak hei ajârchu taksen mak heia kae. Khava jâra akachen sik a milak hnōmpek a leika-om jo hei.

⁷ Pathen in “Tuning” inti kanilak inkhat amantluk a ada ti hi hivahin kadik a amalâr. Kum katamtak sōa ṭong inthenga aka-omsa kha Pathen in David hneng: “Nangni’n tuning Pathen rasa nanthei inchu, nanmalung mansak mak ruh,” ati.

⁸ Joshua’n Pathen ṭongtep châmhngatna kha aleipek jo hei, achang inchu khava sōa Pathen in kanilak chungchânga aleihri nôk mak sik kae.

⁹ Hei-achang inum, ni 7 tluk ning Pathen châm a’nhnga kapōa, Pathen mihei châm inhngatna sik kha laka-om ṭhak.

¹⁰ Ajârchu Pathen kha aṭōna inphut châm a’nhnga kapōa, tu achang inum Pathen ṭongtepsa châmhngatna kachen jo hei kha anṭōn et a inphut châm ala’nhnga sik hei kae.

¹¹ Anmani taksenmak jâra ram shunga akahlutmak hei kapōa eini tûte inkhat akahlutmak kha nichang makna sik, khava châmhngatna kha chenna sik nitor chen a tak intlo rih.

¹² Pathen ṭong chu akahring leh akatlotheitak kha kae, chemjâm lang hnia kangeitō kanek a kangei. Hinahin heirakip a-âttan, nirathla leh anikaching rathla insuktōna khana ru leh rathling insuktōna katlunga a-ât tantora kae. Hivahin mihring malung mandonna leh rangeina a-ensina kae.

¹³ Pathen hnenga a’nthup tor sik heite om mak; akutsyem rakip ahmai kunga inlârpet a inhlangsō pet a ka-om. Khana eini nibing et tintana kha Pathen hneng nilapek nger hi sik kae.

Thempu Kalen Chunghnung Jesu

¹⁴ Khava jâra eini’n nihrisōt jo taksen kha matu manhnet rih. Ajârchu Thempu Kalen chunghnung inkhat Pathen omnakhet katlunga akaketou Pathen Sapa Jesu kha eini’n nineia kae.

¹⁵ Ni-Thempu Kalen hi eini tlâksamna chunga lungset inhret mak changmak. Tâk-kha, eini kapōa ahlam rakip a mathlemna aratō jo, tâk setna heite katlomak Thempu Kalen kha eini’n ninei.

¹⁶ Khava jâra malung ngamna nei rih khana maritna omna Pathen len in-ongna ting jōn rih. Khava hmun a khan ani’nthōpui sik maritna leh lum lona nirangei phatak leh nihmu sik jo.