HAGGAI 2 - LEKHARABU INTHENG (BSI)

Bek-inn Ther Alûrje

¹ Khava kumtak a thla 7 tlukna ni 21 ning, Rōngpu’n vōi khat nôk sânkathem Haggai ahmanga ṭong ajōng hri.

² Ama’n Haggai kha Judah vaikarôn Zerubbabel, Thempu Kalen Joshua khana mipuihei hnenga avahri sik kha amanthei jo,

³ “Nankâra tu inkhat in Bek-inn lûrje kha tûn katlung ala’ndonsōt laka-om chei mo? Tûnchu nanhmit enna heimo apō jo? Hivahi heite’m pōhêr mak jo ning.

⁴ Tâk-kha nangni tûte inkhatbek malung tlâkna neimak ruh. Ṭōn kha tlo ruh, ajârchu ke’n ka-ompui chei.

⁵ Nangni’n Egypt a inphut nanhong sōk pha, nangni ka-ompui ṭhak sik chei tia ṭong le’ntep eng. Tûnnum ke’n ka-ompui chei, khava jâra ṭit hêrmak ruh.

⁶ “Sôt lolaia, ke’n marvân leh ralei, tuipui leh tlâng hi kakanok manhling sik jo.

⁷ Jât rakip kahlon mathla sik hei, ankarōi seng hivahin heichoi sik kae, khana Bek-inn kha karōi in kasip sik jo.

⁸ Vânhnōia sana dangka rakip kata kae.

⁹ Bek-inn ther kha amarō kanek a akalûrchet sik kae, khana khan kamihei kha khangsōtna leh mōngna kapek sik hei.” Akahratpen Rōngpu’n ahri jo.

Sânkathem in Thempuhei A’nbekpui

¹⁰ Darius in rengkalen achangna kum 2 tlukna thla 9 changna ni 24 ning, Chunghnung Rōngpu’n sânkathem Haggai hnenga ahei hri nôk.

¹¹ Ama’n ahri, “Hiva ṭongder chunga hin mi mansena anneina sik a thempuhei kha der hei roh:

¹² Ti chu, tu mo inkhat in manthengsōt jo ran hme kha inthoina tōkna inphut apōn hmora akasûna achoi jo. Khana apōn khan buhlom, a’nsōngsa thlai, vomhrui ju, olive thai achangmak leh hei-hei sâk thei achanga amantôn inchu, khava pōn tônna khan khahei seng kha a’ntheng thlai amanchang sik hei mo?” Khava ṭong kha ander hei pha, thempu he’n anmasôna, “Changmak,” anti.

¹³ Khava sōa Haggai in ader nôk hei, “Ti chu mi inkhat in mi kathi taksa avatôn jâra ama kha intheng mak jo. Ama khan khava sâk thei inkhat kha avatôn jo’nchu, atônna jâra khan neinâk kha amantheng mak sik mo?” Thempuhei khan anmasôna, “Ôk,” anti.

¹⁴ Khava sōa Haggai in ati, “Khava kapōhrep a hiva jât mihei leh hmuchi kara antakeisō rakip chunga’m akachang sik kae, achang jâra maichâma a’ntōksōt rakip akabōkpet kae.”

Rōngpu ’n Mahâmṭhat Pek sik a A’ntepna

¹⁵ Rōngpu’n ahri, “Nanchunga heimo kasōk nanmanhret phâk mo? Bek-inn sakmanther nanphut mak lai,

¹⁶ nanhmuchi manbukna kilograme 200 akalōk sik a kase sik chei, tâk-kha 100 rōkte leika-om sik. Jubea inphut litre 100 kalōk sik a kase sik chei, tâk 40 rōk nanhmu sik.

¹⁷ Nangni’n mankek sik a nantlona rakip manhmangsōna sik a thli kalum leh kahre kahei tir, kha’num nanmalung thleng dekmak chei.

¹⁸ Tuning chu Bek-inn sak manchai ning, thla 9 tlukna ni 24 tluk ning kani jo kae. Tuninga inphut heimo kasōk sik kha enruh.

¹⁹ “Hmuchi aleiom mak jo tâk inum, khana vomhrui thei, theipōng kung, kapothei, khana olive thei ala’nra mak inum, tuna inphut ke’n vâng kapek sik chei kae.”

Zerubbabel hneng Rōngpu Intepna

²⁰ Khava ning bât, thla shunga ni 24 tluk ning vōi 2 tlukna ṭong Rōngpu’n Haggai hneng apek a kae,

²¹ Judah ram vaikarôn Zerubbabel sik a kae: “Kei hi marvân leh ralei kanok sik a ka-om jo eng,

²² rengramhei kasuk mathlak sik hei khana anratha neina kamanbâng sik hei. Shakor gârihei khana akatôrhei kamalet sik hei; shakorhei kathi sik hei, khana achunga akachōng hei kha khat leh khat inthat sik jo hei.

²³ Khava ning khan kasōk Zerubbabel, ke’n kathōisōt sik jo che, karahminga vai karôn sik a kakadei sik jo che. Kakadeisōt kha nang che kae.” Chunghnung Rōngpu’n ahri jo.