HABAKKUK 2 - LEKHARABU INTHENG (BSI)

Habakkuk hneng Rōngpu Ṭong Masôn

¹ Ka-inn ber chunga kake sik eng khana karasa neina ama’n amasôna leh heimo Rōngpu’n hri sik a amanthei sik eng kha kahngâk a ka-en sik.

² Rōngpu’n hiva masônna hi apek eng: “Kabeitak a vōi khat ena teithei achangbâtna sik kamanhmu che rakip kha pi apek inkhat a inthenga mazet roh.

³ Mazet inna da roh, ajârchu hihei huitlungna kha apha la-emak a kae. Tâk apha kha kajōngbei sik jo, khana ke’n kamanhmu che kha hui akatlung sik kae. Jâmtak a akahong apō sik, tâk leihngâk roh; ahei kasōk nger sik kae, sôtmak jo ning.

⁴ Ṭong khachu hi kae: ‘Mikaṭhamak-hei hringmak hei ning, Mikadik-hei chu kahring sik hei, ajârchu anmani’n Pathen antaksena kae.’”

Akadik mak hei Inhmangna

⁵ Nei leh hao hi mikahōn kae. Phâmrai kase in inlensak khan chu chimtor mak, kathi kapōa anmani khoptor mak hei. Khava jâra anbing sik a jât inkhat sōa inkhat antor heia anhlō heia kae.

⁶ Rea akator mak he’n re kator hei hnenga hnōisena leh hōtna anmalâr sik. Anmani’n anti sik, “Nangni’n nanta-akachangmak kha nanlo, kha’num nangni a’nhmang jo chei kae! Nansêr kabat hei rumhrat a sêr nanmanpek male heia heituk kasôt mo nangni akahōi sik chei?”

⁷ Tâk-kha nangni’n hivahi nanmanhret mak hma milak chunga re kator nangni misêr nanhongpûk sik a kha, sêrthōi pekna sik rumhrat a anheitlo sik chei. Nankadōihei kahong sik hei nanratha anman nok sik. Anmani’n ansukset sik jo chei.

⁸ Nangni’n jât katamtak mipuihei nansukset hei, tâk tûnchu nangni’n mi nanthat hei jâra khana vânhnōia mihei leh khōpuihei nanvōk nantha hei jâra khava alakahring hei khan nangni ansukset sik jo chei.

⁹ Nangni inhmang jo chei! Rumhrat a nantachom neinâk vânga nan-innshung nanmanhao khana nan-innhei kha hrungna sik leh hukna sik a nantloa kae!

¹⁰ Tâk nanṭōn mantluk khan nan-innshung sik a inzakna ahei rôn sōt jo; jât katamtak nansuk manhmang heina khan nantak khet chunga inhmangna ahei rôn jo.

¹¹ Innbang sakna hlunghei kapha’num nangni kadōia ka-ông jo hei, innsuktō thingtlōnhei ông rasa kha he’nthông sik.

¹² Nangni inhmang jo chei! Nangni’n mi nantuk nanthat a khōpui nansyem khana nanmi thatna khan khōpui nansaksōt.

¹³ Nangni’n re nantator jât he’n akahnem mak ṭōn tlona inreng heia, anta leisak rakip hmeimalea kakângsō jo. Chunghnung Rōngpu’n khavakha atlosōt jo kae.

¹⁴ Tâk-kha tui-ôngpui shunga tui akasip tlit kapōa raleichung hinum Rōngpu lûrna manhretna khan kasip sik jo.

¹⁵ Nangni inhmang jo chei! Nanhnuk natna vânga nansir nanvenhei nansuk mathlâk heia inzakna nanpek hei; ju inrui kapōhrep a inhek invaia nanmanlôn hei.

¹⁶ Nangni kajana chen kanek a khava phuhlōna khan inzakna’n amakhu sik chei. Rōngpu khet in nangni karâkna kōklei kha asyempek sik chei, khana nangni kajana kha inzakna hongkachang sik jo.

¹⁷ Lebanona ratuhei nantuk manphûr sō jo; tûnchu nangni tuk maphûr sik jo chei kae. Khava ramshahei nanleithat hei; tûnchu ramshahei khan nangni ṭit leh inpirna antapek sik jo chei kae. Hivahi nangni’n mi nanthat jâra khana vânhnōia mihei leh khōpuihei nantuk nanthat hei jâra ahei kasōk sik hei kae.

¹⁸ Limsyemhei hnemna heimo? Hiva hichu mihring tasyem hnâm kae, hivahin nanhnenga akadik mak tei loa heite hritheimak. Akasyempa’n ataksen theina sik hei ṭhatthei mo atlopek, khava akaṭong theimak pathen hrep khan.

¹⁹ Nangni inhmang jo chei! Nangni’n thinghar inkhat hneng nanhri, “Thōi jo roh!” achangmak leh hlungtlang inkhat hnenga nanhri, “Thōi jo roh!” Kut a limsyem in nangni heimo amanthei tor sik chei? Sana leh dangka vâng ankatōm tlit thei, tâk akahring rathla kha neimak.

²⁰ Rōngpu kha a Bek-inn inthenga ka-om; ama hmaikunga raleichunga mi rakip sip ti hei rasoh.