EZRA 9 - LEKHARABU INTHENG (BSI)

Jehudi Kachangmak hei leh Jōr Inlona Ezra’n Amanhret

¹ Hiseng hei hi antlosōa, Israel hlamkakei ṭhahrep kahong heia kahnenga anhonghri ti chu, mipuihei, thempuhei khana Levi he’n anta’n hnaipui ram a mihei, Amon, Moab, khana Egypt achangmak leh Canaan, Hit, Periz, Jebush khana Amor heia inphut anhlop binga om mak hei. Hiva mihei tatlo mater ka-om tak omchen kapōa anmani’num antloa kae.

² Jehudi he’n jât-hlop mihei nuhmei an-ompui hei, khava jâra Pathen mi intheng hei kha kachok jo hei. Hlamkakei leh vaikarônhei kha apuipena akasukṭhe hei kha kae.

³ Hivahi kathei pha, kapōnsi kakeihler hei, kasam leh kamakha hme kaphôi, kachâmtak a le’n ong eng.

⁴ Khōhleia ran inthoina pha ahong tlung mak kârseng inrengtak a le’n ong eng, khana khava rehringa ahong inle hei setna chungchânga Israel Pathen in aleihri jâra ṭit leh inpirna akanei mipui rakip he’n kakimvea hong intûp hei.

⁵ Khōhleia inthoi-insân pha ahong tlung pha, kachâmtak a kalei omna inphut heikathōi eng, a’nhler pōn leh der kalasi ṭhak a, kamarkhup kathlep a, Rōngpu ka-Pathen hneng kakut kakalânga kaleidera kae.

⁶ Ke’n kati, “Eh Pathen, na-âng shunga kalu chung manhnget sik inzak hêr eng. Kansetna hei kha kanlu atlumbit a inbuk jo hei; marvân inshâng kapōa inshâng jo.

⁷ Kanpu kanpa heia inphut tûn katlunga, nami keini kaset hêr jo ung. Kanṭhena jâra kanrenghei, kanthempu hei miram renghei kut a leikatla jo hei, keini anleithasōt ung, anleichom ung, khana rehringa anleisur jo ung. Khana tuna kanka-om kapōa hin inzakna katluk set a kanleichen jo.

⁸ Tûn pha bongkhat sik a, O Rōngpu kan-Pathen, keini nalungset unga, kansōk changna inphut namasōsōt ung khana hiva hmun inthenga inhuk a nada ung. Kansōk changna inphut namasō unga hringkhōther napek jo ung.

⁹ Keini sōk leikachang ung, tâk kansōk changna khan adahlon mak che. Nang in Persia rengkalen kha lungset namanrôn ung khana akahring sik a leh suk manhmanga aka-om jo nabek-inn akasyemther sik a khana Judah leh Jerusalema inhukna kajong sik a nahnōm pek ung.

¹⁰ “Tâk-kha tûnchu, Eh Pathen, heirakip asōksōa hin keini’n heimo kantati sik jo? Keini’n ave nôk a ṭongpek-hei kha jui nôk mak jo ung,

¹¹ nang in nasōk sânkathem heia inphut nahei pek ung ṭongpek-hei kha. Anmani’n anleimanthei ung, kantahlō sik ram kha akachok kae, ajârchu khava ram a aleika-om mihei kha ram rakir inkhat a inphut inkhat katlunga mater ka-om hei, omchen kabōk rōk vânga leikasip heia kae.

¹² Anmani’n kanhnenga anleiti, ti chu ram a khan kahōia ni-om hnōm inchu khana ahei tik a nisōn-nipâr hei hnenga pek sik a nimadu’nchu keini leh anmani jōr a’nlo hêrmak sik ung kae.

¹³ Keini setna leh ṭhena jâra karâkna kanchensō katlunga, kan-Pathen nang in kanrahōi kasōk hrep kanek a akatlômdet vânga karâkna napek ung khana akahring sik a nalahnōm pek ung ti hi kanmanhret a kae.

¹⁴ Khan chu, heikhong inmo naṭongpek hei kha avea donloa aka-om tor sik ung khana mikaṭhamak-hei leh jōr inlona kantanei nôk sik? Keini’n khanga kantlo’nchu nahnuk kana hêr sik a kha tûte hringmak jo ni’ung.

¹⁵ Rōngpu Israelhei Pathen, nang chu akadik che kae, tâk-kha keini hi nalamanhring unga kae. Nahnenga kanṭhena hei seng kanphông; nang omna heihlutna sik ratha neimak jo ung. ”