EZRA 3 - LEKHARABU INTHENG (BSI)

Kamukna Avea Antaphut

¹ Thla 7 tlukna Israel mi rakip ama ama khōpui et a ka-om jo hei. Khava sōa Jerusalema ankhenga le’ntûp hei,

² khana Jehozadak sapa Joshua, aloi thempuhei, Shealtiel sapa Zerubbabel, khana ama u leh naihei leh Pathen mipa, Moses Dân shunga a’nzet dungjuia ro-inthoina tlotheina sik a Israel Pathen sik maichâm inkhat ansak manther jo.

³ Rehring sura ahong inle mihe’n khava ram a aleika-om mihei kha anṭit he’num, maichâm kha hma aleiomna hmun a ansak nôk a kae. Khava sōa anmani’n jîngkâr khōhlei ro-inthôi tōkna kha avea anphut nôk a kae.

⁴ Dân dungjuia Rabuk Kût kha anleitlo; ani tina inthoina arangei hei tōksōtna annei;

⁵ khava chunga ani tina ran apum a romanvâm inthoina a’ntōksōt hei khana Thlather Revei tōk sik hei khana injônjet a Rōngpu kamukna mipui intûpna rakip a leh Rōngpu hnenga malunga pekna kanei hnōm he’n tōkna annei hei.

⁶ Mipui he’n Bek-inn sakna kha anlaphut mak inum, thla 7 tlukna kani hma-inkei ning Rōngpu hnenga ro-inthoina anleiphut jo.

Bek-inn Sakmanther Antaphut

⁷ Mipuihei khan hlung ṭōn leh thingṭōn katlohei sik a sêr anleipek hei khana tui-ôngpuia inphut Joppating heitôr sik Lebanona cedar thing leh thlengsōt sik a Tyre leh Sidon khōpuia sâk leh in, olive thai anleitir hei. Hiva rakip hi Parsia rengkalen Cyrus hnōm pekna thōia anleitlo.

⁸ Khava jâra Jerusalem Bek-inn hmun a anhong inlena thla hni tlukna, ṭōntlo kha anleiphut jo. Zerubbabel, Joshua khana aralak anram mihei seng, thempuhei, Levihei, Jerusalema ahong inle rehring sur hei seng ṭōn tlona le’nveisa hei. Levi mi kum 20 leh achung hei seng kha Bek-inn sak mantherna ka-ensuia anlei manṭang hei.

⁹ Levi mi Jeshua khana asahei leh a-innkōhei seng, khana Kadmiel leh asapahei (Hodaviah phungṭhen hei) seng um Bek-inn sak mantherna ṭōna le’nṭangpet hei. (Anmani kha Henadad phungṭhena Levi he’n anlei inthōpui hei).

¹⁰ Bek-inn innhmun andeng manphut jo pha, thempu he’n anret an-insia ankut a pengkun an-inchoi khana Asaph phungṭhena Levi he’n sumkutben anchoia kangir hei. Reng David pha a inphut mantheina dungjuia Rōngpu anchoi ka-ânna kae.

¹¹ Anmani’n Rōngpu manpâkna hla ave-avea anmalet a hinga ansak: “Rōngpu kha kaṭha, Israel alungsetna kha kumleikōa kae.” Mi rakip in antor chenna kapeng heia Rōngpu kha anmanpâk, ajârchu Bek-inn sakna sik innhmun andeng manphut jo.

¹² Thempu upahei, Levihei, phungṭhen upa katamtak he’n hmalaia Bek-inn kha anleihmu, anmani’n innhmun dengna kha an-ena kaṭap heia in-ôi hei. Tâk-kha alak he’nchu inpâk heia kapeng heia kae.

¹³ Tûte inkhat in inpâkna ôngna leh ṭapna karesō kha ṭhentor mak hei, ajârchu kare rasa hei kha inhnak hêra akahlatak a inphut intheitora kae.