EZRA 1 - LEKHARABU INTHENG (BSI)

Cyrus in Jehudihei Ani’nlena sik Ṭong apek

¹ Persiahei reng Cyrus in vai arôn kum hmakakeia Pathen in Jeremiah hneng aleiphôngsōt ṭong kha kadiktak a asōkna sik. Cyrus in athōia ṭongpekhei hi amasōa khana lekha vânga atira aram shung hmun rakip a inphôngtak a anteisōtna sik Pathen in akanot jo.

² “Hivahi Persia Rengkalen Cyrus ṭongpek kae. Marvân Rōngpu Pathen in raleichung pumpuia vaikarôn amanṭang jo eng khana Judah ram Jerusalema ama sik bek-inn kasak sik a ama’n anganse jo eng.

³ Ama mihei nankhenga Pathen in ompui chei rasoh. Nangni Jerusalema a’nle cheia Jerusalema antakamuk Pathen, Israel Pathen, Rōngpu Bek-inn kha nantasâk manther sik kae.

⁴ Miram a sura ka-om ami changpui inkhat in a’nlehnōm inchu, asir avena ka-om he’n anta’nthōpui sik kae. Sana dangka, sâk leh in khana ranhring phur antamantluk pek sik, inṭhōia Jerusalema Pathen bek-inna tōk sik antapek sik kae.”

⁵ Khava sōa Judah leh Benjamin phunga alu kachang hlamkakei, thempu leh Levihei khana Pathen in malung mathokna apek hei kha akase sik a leh Jerusalema Rōngpu Bek-inn sakna sik a intluk jo hei.

⁶ Ansir anvena mihe’n neinâk katamtak anpek heia anbôm hei: dangka be leh bûr, sana, thlai, ranhringhei phur mantlukna, neinâk mankatam ralak, khana Bek-inna tōk sik neinâk-hei.

⁷ Reng Nebuchadnezzar in Jerusalem Bek-inna inphut aleilosōt khana apathenhei bek-inna aleida kōklei leh tuileng hei kha Cyrus hnenga aleipek male hei.

⁸ Ama hin Judah ram a vaikarônpa Sheshbazzar talei hmusōt khava be leh bûr hei kha Mithredath, apui karôn reng karōi katinta hnenga apek jo hei,

^9-10 neinâk-hei khachu: tōksōtna sana thlengkam 30 tōksōtna dangka thlengkam 1,000 thlengkam aralak-hei 29 sana thlengkam kasin 30 dangka thlengkam kasin 410 aralak be leh bûr 1,000

¹¹ Sheshbazzar leh rehring sura ka-om he’n Babylona inphut Jerusalema an-inle pha ama’n aleirôn seng kha akhenga sana leh dangka, bube, anbe khana alak neinâk 5,400 hei hi kae.