ESTHER 3 - LEKHARABU INTHENG (BSI)

Haman in Jehudihei Suk manhmangna sik Lungthim Atlo

¹ Pha bongkhat kahnunga Reng Xerxes in arahming Haman inti pase inkhat vaikarôn akalenpen ṭōnhmun a amanke jo; Haman kha Agag sōn leh pâr khana Hammedatha sapa kae.

² Rengpa’n aṭōn karôn rakip hnenga anmani’n Haman hnenga anmarkhup antathlep a a’nkun heia kajana anpekna sik a ṭong aleipek hei. Khanga tlo sik a akahnōm mak Mordecai tei loa, anmani ankheng in khanga anleitlo jo.

³ Reng ṭōnkarôn alak-hei khan heisik a mo rengpa ṭongpek ajuimak tia anleider;

⁴ ni khat bânna ni khat ahrina sik a aleider, tâk ama’n leirangei mak hei. Ama’n ahri manchên pek hei, “Kei Jehudi inkhat eng kae khana Haman hnenga inkuntor mak ning,” ati. Khava jâra anmani’n Haman hnenga hiva ṭong hi anleihri pek jo, ama’n Mordecai omchen hi de-hnâm mak ning tia an-en mathlip jo.

⁵ Mordecai in ahnenga amarkhup athlep a inkun mak ning ti hi amanhret pha, Haman kha ahnuk kana hêr jo,

⁶ khana ama’n Mordecai hi Jehudi kae ti hi amanhret pha, Mordecai rōk karâkna pek sik kanek a kakhea tlona sik amandon jo. Persia ram shunga Jehudi rakip thatna sik a lungthim atlo jo.

⁷ Reng Xerxes vai rônna kum 12 tlukna ahma inkeipen Nisan, Tebe thla a Haman in aṭōn mantluk kha tlosōt theina sik, kani leh thla kadeina sik a vâng-enna sik a ṭong aleipek hei (“purim,” hi anmani anbek hei tina kae). Thla 12 tlukna Adar, Diva thla a ni 13 tluk ning kha indeisōt jo.

⁸ Khava jâra Haman in rengpa hnenga amanthei, “Narengram shunga hmun rakip a a’nchek chaia ka-om phung inkhat ka-om hei khana ramṭhen rakip a inhmu hei. Anmani’n mi ralak-hei chôndân leh a’n-angmak omchen kachôn hei. Khava chunga, rengram dân um juimak hei, achang jâra anmani hi en-hnâm heia ṭha nasak sik changmak hei.

⁹ Reng Kalûr maduna achang inchu, anmani kha thatsōtna sik ṭong masōna inkhat nei roh. Khavakha natlo’nchu, narengrama inrônna sik a dangka kilograme 3,40,000 reng sêrkōk a kaheida manhlut tor sik a kae.”

¹⁰ Rengpa khan ṭong masōna heikhat a mêrchîkna akatatri khana invairônna ṭongpekna inkhat a ahmang ri akutkhi kha alosōt a, Jehudihei inrepui, Agag sōn leh pâr, Hammedatha sapa Haman hnenga apek jo.

¹¹ Rengpa khan ahnenga ati, “Mihei leh ansêr ansum rakip nangta kae, nang in namadu hrep a tlo hei roh.”

¹² Khava jâra ahma inkeipen thla a 13 ning Haman khan reng lekha inzet hei seng abek heia ṭong masōna kha rengram shunga ale’nhmang ṭong rakip vânga leh lekha mazetna ngai dungjuia anmalesōtna sik khana ratha kanei, vaikarôn leh ṭōnkarôn rakip hnenga antirna sik a ahri pek hei. Hivahi rengpa rahminga anleimasō, khana akutkhi kha achunga anlei katet joa kae.

¹³ Hiva ṭongphông hi ṭongkarôn he’n arengram shunga ramṭhen rakip a anchoi jo. Khava shunga mantheina khachu Adar, Diva thla 13 ning, ni khat shunga, Jehudihei khangther leh kater, nuhmei leh naipang thatpet sik hei kae tia ka-om. Anmani kha lungsetna kasea that sik hei khana ankarōihei chomsōt sik hei kae.

¹⁴ Akani kha ahong tlung jo pha, mi rakip inrinna anneina sik a, ṭong phôngna shunga aka-om ṭong kha ramṭhen rakip a mipui hnenga manthei sik hei kae.

¹⁵ Rengpa ṭongpek dungjuia khava ṭong masō kha reng khōpui Susa a mipui hnenga anleiphông khana ṭongkarôn he’n khava ṭong kha ramṭhen rakip a anleirôn. Susa khōpui kha inhmakban a a-omlai khan rengpa leh Haman chu in-ongsap heia ju anlei inna kae.