EPHESIANHEI 3 - LEKHARABU INTHENG (BSI)

Jât-hlop hei sik a Paul Ṭōntlo

¹ Hiva jâra, nangni Jât-hlop hei sik a Christa Jesu khum mi, Paul, ke’n Pathen hneng kader kae.

² Nanṭhat chômna sik ṭōn katlo sik a Pathen maritna’n apek eng ṭong hi nanlei thei jo.

³ Pathen in aṭōn mantluk in-ip kha aphôngpek enga amanthei jo eng. (Hiva chungchânga katôitek a kamazet jo,

⁴ khana nangni’n kamazet hi nantei inchu, Christa a a’n-ip ṭong kamanhret kha nanmanhret tor sik a kae.)

⁵ Hmalai chu hiva ṭong in-ip hi mihei hneng leiman theimak, tâk tûnchu Pathen in Rathla vâng khan sânkathemhei leh asonle intheng hei hneng aphôngpek jo hei.

⁶ Khava ṭong in-ip kha hi kae, ṭong kaṭha jâra hin Jât-hlop he’num Pathen mahâmṭhatna shunga Jehudihei leh chen antaneisap jo kae; anmani taksa pumkhat bâk-hei kae khana Pathen in Christa Jesua asyemsōt intepna shunga chen anneia kae.

⁷ Pathen in atlo torna ratha vâng ahlop mônga kutchoi apekna eng khan, ṭong kaṭha sōk inkhat a asyem eng.

⁸ Kei Pathen mihei seng kâra, akasin kâra akasinpen eng kae; kha’num Christa ṭhatna bângtik kaneimak chungchânga ṭong kaṭha kha Jât-hlop hei hneng akarôn sōt sik ṭōn

⁹ khana Pathen ṭōnmantluk in-ip kha heikhong mo ṭōn vânga ahon’rôn sōt sik ti kha mi rakip manhmu theina sik, ṭōn hi Pathen in kei apek jo eng. Heirakip Kasyempa Pathen in, ama ṭōn in-ip hei hi kum kasôttak aleithup heia kae,

¹⁰ Tûna pha hinchu bekrup a inphut, Pathen singna kha hmesō ahlop-hlop a, marvân ram a ratha kaneihei leh ngeva vaikarôn he’n anmanhretna sik a kae.

¹¹ Pathen in alungdo dungjuia kumsôt a sik a aleimantluk ṭōn kha ni-Rōngpu Jesu Christa jâra atlo jo.

¹² Eini’n ama nitaksen jâra ama leh inchunna shunga hlamrinna rakip leh inṭhōia Pathen ângshunga inlensaktak a hluttheina ninei jo.

¹³ Khava jâra, nangni sik a khōdeng katheina chunga hin, nanmalung mathla mak ruh tia kahei ngek chei kae; hihei seng hi nangni sik hnemna kae.

Christa Lungsetna

¹⁴ Khava jâra ke’n Pa ângshunga kamarkhup kathlep a a’nkun eng kae,

¹⁵ ahnenga inphut ralei leh marvân chunga innshung mi rakip in rahming kadik anrahlângna sik a.

¹⁶ Ama Rathla a inphut nanshungting nanhratna sik a alûrna kasip a inphut ratha neina kha apekna sik chei Pathen hneng kader,

¹⁷ khan chu taksen jâra nanmalung shunga Christa’n a-inn asakna sik ke’n Pathen kader. Nangni lungsetna khan innhmun nanneia, rajung nanṭhōna sik a kader,

¹⁸ khachu nangni Pathen mi rakip leh Christa lungsetna hi heituk a akalen leh akasei, a’nshâng leh a’nthuk mo ti nanmanhret torna sik a kae.

¹⁹ Kadik, ama lungsetna chei manhretna nei ruh, pui katluk a manhret thei achangmak inum, khana Pathen chôndân kha pui katluk a akasip chang ruh.

²⁰ Nishunga ṭōnkatlo ṭhakpa ratha hratna vânga khan, niderna heirakip kakhe chet a leh nimandona kakhe chet a akatlosōt tor ama hnenga khan:

²¹ pha rakip a Christa Jesua leh bekrup shunga Pathen kha ahei tik a lûrṭhak rasoh! Amen.