DANIEL 5 - LEKHARABU INTHENG (BSI)

Belshazzar Revei

¹ Jân inkhat a hin Reng Belshazzar in aram shunga akalen akahrâng lishing khat hi revei kalentak inkhat aleitloa aleibek hei, khana anmani ju anlei insap a kae.

² Anmani’n ju an-inlai Belshazzar in apa Nebuchadnezzar in Jerusalem Bek-inna inphut ahei choi sana leh dangka thlenghei kha anhei choisōtna sik ṭong aleipek hei. Rengpa’n ami kalen kahrânghei, anuhmeihei, anuhmei manbohei khan khan vânga ju an-ina sik avakalo sik a mi atir jo hei.

³ Inrangtak a sana kōkleihei kha anheichoi manhlut jo hei, khana anmani ankhenga sana kōklei vâng khan ju anlei in jo

⁴ khana sana, dangka, sum-êng, thir, thing khan chu hlung vânga a’nsyem pathenhei kha anleichoi ka-ân heia kae.

⁵ Manhret phâkloa mihring kut inkhat hong inlâra thaihmei kavârtak a andetna reng inna vai inteina banga khan mazet aphut jo. Khana kut khan amazet lai rengpa khan aleihmu.

⁶ Ahmaisō hong kadângper jo, khana kaṭihêr joa amarkhup innok jo.

⁷ Hmitphedôi kachoi, inralak katlo, ârsi lekha kathemhei vaṭhōina sik a ka-ônga mi abek jo hei. Anmani anhong pha, rengpa’n anhnenga ati, “Hiva kutsun hi akateisōt tor khana heitina mo akahrisōt tor mi kha ahrak a sana maṭhi man-or sik khana rengram shunga ratha kanei 3 tlukna kachang sik.”

⁸ Rengpa mansena kaneihei kha ahnengting kava hei, tâk tûte inkhat in lekha inzet kha teisōt tor mak hei khana reng hneng hiva tina kae tia hripek tor mak hei.

⁹ Reng Belshazzar kha amalung inrim hêra ahmaisō kadângper jo, khana ama mikalen mi kahrânghei khan heimo tlo sik ti manhret mak jo hei.

¹⁰ Rengpa leh ami kalen kahrânghei rasa kha athei pha rengnu’n revei innshunga hongkahlut a kae. Ama’n ahri, “Reng Kalûr ahei tik a hringṭhak roh! Namalung hinghrep manrim mak roh, nahmesō inthlengmak rasoh.

¹¹ A’ntheng pathenhei rathla ashunga ka-om mi inkhat narengram shunga ka-om. Napa’n reng aleichanglai, hiva mipa hin lungthim ṭhatna, themna khana pathenhei kapōa singna amalâra kae. Khana napa Reng Nebuchadnezzar in ama kha hnungṭong kasânhei, dôi kachoihei, a’nralak katlohei, khana ârsi lekha kathemhei anlu kaching aleimanchanga kae.

¹² Ama’n akakhe chet tlotorna anei, khana rahmang ṭonghei, ṭong intak leh ṭong in-ip hrisōtna kathem hêr; khava jâra rengpa’n Belteshazzar tia aphō, Daniel intipa kabek sik a mi tir hei roh, ama’n hiva rakip hi heitina mo ahri pek sik che.”

Daniel in Kutsun kha Amale

¹³ Inrangtak a Daniel kha rengpa hneng anheiṭhōi, rengpa’n ahnenga ahri, “Kapa’n Judah ram a inphut rehringa aheiṭhōi Jehudi mi Daniel inti kha nang che mo?

¹⁴ A’ntheng pathenhei rathla nashunga ka-om khana singna themna nanei ti katheia kae.

¹⁵ Hiva a’nzet hi akatei sik leh heimo atina ani inlesōtpek sik a mi inse hei leh dôi kachoihei kha anheiṭhōi hei, tâk anmani’n hivahi heitina mo hmusōt tor mak hei.

¹⁶ Tûn nang in a’nthup kha heitina mo nahmu sōt tor khana a’n-ip kha nahri manchên tor ti hi kathei jo. Nang in hiva kutsun hi nateitora atina kha nahri pek eng inchu, rengpōn mansi sik che, nahrak a sana maṭhi man-or sik che, khana rengram shunga 3 tlukna ratha kanei akachang sik che kae.”

¹⁷ Daniel in amasôn, “Kutchoihei khachu nang sik a inda roh a-emak leh tu mo inkhat hneng pek roh. Reng Kalûr nang sik a kateisōt sik khana heitina mo ti kha kamanthei sik che.

¹⁸ “Chunghnung Pathen in napa Nebuchadnezzar kha rengkalen inkhat aleimanchang khana lûrna leh lenna aleipek.

¹⁹ Ama kha hinghrep leikalen, phung tin jâttin, ṭong rakip a mi rakip in ama anleiṭit a innok hei. Ama’n athat hnōm mi kha athat; amanhring hnōm kha amanhring. Kajana achangmak leh hmesetna apek hnōm kha apek a kae.

²⁰ Achang ravâng ama kha hong inlensak a, ṭong rangei mak a, arahe hong kasea kae, ama kha areng in-ongna inphut inlosōt a kajana aleichen kha inhmang jo.

²¹ Ama kha mihei kâra inphut hnongsōt a ka-om, khana amalung kha shahei malung hong ka-ang jo. Ama ram a shakōrtung hei leh ka-omsap hei, sehratche kapōa phi asâk jo khana achunga radaitui kakhâr sik a heite omlo ramhânga kaje jo. Achaina pena chu Chunghnung Pathen in mihring rengram rakip akhim, vai arôn khana ama’n akadeisōt hei hneng apektor ti hi ama’n aheihnōm jo.

²² “Tâk, asapa nang chu, hihei seng namanhret inum nabinga insinsak mak che.

²³ Marvân Rōngpu kadōia ṭōn natloa a-Bek-inna inphut kōkleihei kha nahei choi manhlut heia kae. Nang in nami kalen leh kahrânghei, nanuhmeihei, khana nanuhmei manbohei leh hiva kōkleihei vânga hin ju nan-inna, nang in khava pathen akahmu tor mak, akathei tor mak, khana heite inhret mak sana, dangka, sum-êng, thir, thing leh hlung vânga a’nsyem pathen kha nanmanpâk a kae. Tâk-kha nang natlona rakip ka-ensui, nathina leh nahringna katinta Pathen kha kajamak che.

²⁴ Khava jâra Pathen in hiva ṭonghei hi inzet sik a kut hi ajōngtir kae.

²⁵ “Amazet kha hi kae: ‘Tei roh, tei roh, te roh, ṭhensōt roh.’

²⁶ Hivahi atina kha hi kae: Tei roh, tina hi Pathen in narengram kani atei jo khana amanbângna sik atlo jo;

²⁷ te roh, tina hi tena kher chunga nang inte jo che khana nang katlasam jo che.

²⁸ ṭhen roh, tina hi narengram hi her hnia inṭhen sik khana Mede leh Persiahei hneng aṭim aṭima inpek sik jo.”

²⁹ Inrangtak a Belshazzar in Daniel kha rengpōn kasen mansina sik leh ahrak a sana maṭhi man-orna sik a asōk-hei hneng ṭong apek jo hei. Khana ama’n Daniel kha rengram shunga 3 tlukna ratha kanei amanchang jo.

³⁰ Khava jântak a khan Babylon reng, Belshazzar kha antha jo;

³¹ khana akum 62 katluk jo, Medehei reng Darius in reng ratha neina kha amatu jo.