DANIEL 4 - LEKHARABU INTHENG (BSI)

Nebuchadnezzar Rahmang Inhnina

¹ Rn Nebuchadnezzar in raleichunga phung, jât, ṭong rakip hneng hiva ṭong hi aleimanrôn hei: “Marimna chibei!

² Chunghnung Pathen in kahnenga amalâr a’nlak leh det-hlana ṭong hi rangei ruh.

³ “Pathen in amalârpek me ṭōn inlak-hei hi heituk a akalenhei mo! Ama tatlosōt ṭōn inlak-hei hi heituk a ratha kaneihei mo! Pathen in ahei tik a reng kae; ama’n pha rakip a vai arôn sik kae.

⁴ “Ke’n kareng-innpuia kahōitak a, kahaotak a leika-om eng.

⁵ Tâk-kha ke’n kaje pha ṭit ka-om tak rahmang inkhat leh ṭit ka-om tak hmangtalâr kaleinei hei.

⁶ Rahmang kha heitina mo tia ani kahri pek sik a Babylon ram a mi mansena kanei rakip kahnenga anheiṭhōina sik a ṭong kaleipek hei.

⁷ Khan chu hnungṭong kasânhei, dôi kachoihei, a’nralak katlohei, ârsi lekha kathemhei kha anheiṭhōi hei, khana ke’n karahmang kha kahri pek hei, tâk-kha anmani’n rahmang kha hrimanchên tor mak hei.

⁸ Khava pha Daniel kha kahonga kae. (Ama kha kei pathen rahming Belteshazzar tia inbekna jo.) Pathen intheng hei rathla kha ashunga ka-om, karahmang kha ahnenga kahri pek. Ke’n ahnenga kati:

⁹ Belteshazzar, hnungṭong kasânhei lu kachingpa, a’ntheng pathenhei rathla nashunga ka-om ti kamanhret, khana nang in ṭong in-ip rakip namanhretsō. Hivahi karahmang kae; heitina mo ahri pek roh.

¹⁰ “Ke’n kajelai, karahmanga raleichung ṭimtak a thingkung kalentak inkhat kaleihmu.

¹¹ Khava thingkung kha kalen chet kalen chet a bōirōk katlung jo khana ralei mi rakip in anleihmu.

¹² Abōhei kha anhme kaṭhahei, khana akara khan akei makhup a kae, ralei pumpui tasâk khopna kae. Ramsha he’n hiva daihlim hnôia châm inhnga hei, vahe’n abâk a rabu ankeia kae, khana ranhring rakip in akara ansâk a kae.

¹³ “Ke’n rahmang kha kamandona ka-omlai, marvâna inphut ngeva inkhat insing theitak a ajōng ṭum kha kahmu.

¹⁴ Ama’n rasa inhnaktak a ahri, “Thingkung kha phûr ruh, abâk-hei kha tuktan ruh; abōhei kha vōkmaṭhi hei ruh khana akara kha vor kathek hei ruh. Athōia aka-om shahei kha hnongsōt hei ruh khana abâk a vahei kha hnongsōt hei ruh.

¹⁵ Tâk-kha akungmui chu thir leh sum-êng rōk vâng khit una raleia dahlon ruh. Hleipuk a phi kâra dahlon ruh. “‘Tûnchu hiva mipa chunga radaitui tlaraso, ramsha, thingkunghei leh omsap hei rasoh.

¹⁶ Kum 7 katlunga ama mihring malung rônmak ning, tâk shahei malung arôn sik kae.

¹⁷ Hivahi insing theitak a akajōng ngeva ṭong mathlâk kae. Khava jâra Chunghnung Pathen in mihringhei rengram chunga ratha anei khana ama’n akadei, mi katlasamtak hnenga achang inum apektor ti hi mi rakip in manhret hei rasoh.’

¹⁸ “Karahmang kha hi kae,” tia Reng Nebuchadnezzar in aleihri. “Tûnchu, Belteshazzar, hivahi heitina mo ahri pek jo roh. Kareng inna heikhat ani kahri pek lele he’n ahri pek tor mak hei, tâk-kha nang inchu nator, ajârchu a’ntheng pathenhei rathla khan nashunga ka-oma kae.”

Daniel in Rahmang Amale

¹⁹ Hing’hin, Belteshazzar tia’m a’nhret Daniel kha inpirna aneia ṭong heite hrisōt tor mak joa kae. Rengpa’n ahnenga ati, “Belteshazzar, hiva rahmang leh atina khan namalung manrim mak rasoh.” Belteshazzar in amasôn, “Reng Kalûr, rahmang kha nang chunga changloa nang kadōihei chunga akatla chang rasoh.

²⁰ Thingkung kha khang hrep a inshâng bōirōk asunbit, raleia mi rakip in anhmu.

²¹ Hiva thingkung bō hei kha anhme kaṭha, khana ralei pumpui tasâk sik katluk a akara inra. Ramsha he’n ahnōia châm inhnga hei, khana vahe’n abâk a rabu anchom.

²² “Reng Kalûr, a’nshâng leh akangar thingkung kha nang che kae. Nang kha inshângrei chea bōirōk nasunbit, khana nang ratha neina kha raleichung pumpuia katlung sō.

²³ Reng Kalûr nang in khanga na-enlai marvâna ngeva inkhat kajōnga ahri, ‘Thingkung hi phûr ina suk manhmang ruh, tâk akungmui chu ralei shunga dahlon ruh. Hiva kimvea thir leh sum-êng hrui vâng khit ruh, hleipuk a phihei leh da hei ruh. Hiva mipa chunga radaitui tla rasoh, khana ramshahei leh kum 7 omsōm hei rasoh.’

²⁴ “Reng Kalûr, narahmang tina khachu hi kae, khana hivahi A’nshângpen Pathen in nachunga ahong kasōk sik kha amalâr kae.

²⁵ Nang hi mihringhei kâra inphut hnongsōt sik che kae khan ramshahei leh kalengsap sik chei. Kum 7 sehratche inkhat kapōa phi nasâk sik, ramhânga karek sik che, khana nachunga radaitui katla sik. Chunghnung Pathen in mihring rengram rakip chunga vai arôn, khavakha ama’n akadeisōt mi inkhat hneng apektor ti kha kahnōm sik jo che.

²⁶ Ngeva khan thingkungmui kha raleia dahlon sik a ṭong aleipek. Hiva tina chu Pathen in ralei pumpui chunga vai arôn ti hi nahnōm pha nang avea reng hongkachang nôk sik che.

²⁷ Kha achang jâra, Reng Kalûr, kaṭong jui roh. Set-tlo bâng jo roh, akadik kha tlo roh, khana sarahei hneng lungset them roh. Kha achang inchu injônjet a kakhang sik che.”

²⁸ Hiva rakip hi Reng Nebuchadnezzar chunga kasōk jo.

²⁹ Thla 12 kahnung bât a, ama’n Babylona areng innchunga ase lelelai.

³⁰ Ama’n ati, “Enruh Babylon hi heituk a akalen jo mo! Karatha neina, katorna khana kalûrna leh kaja ka-omna kha malârna sik a kasyemsōt kae.”

³¹ Hiva ṭong hi abeia ahrisō mak lai, marvâna inphut rasa inkhat in ajōng hri, “Reng Nebuchadnezzar, kaṭong hri rangei roh! Nareng ratha neina tûnchu nanga inphut inlosōt jo.

³² Nang mihringhei kâra inphut hnongsōt sik che kae. Ramshahei kâra aka-om sik che kae, kum 7 sehratche kapōa phi nasâk sik kae. Khava pha Chunghnung Pathen in rengram rakip chunga vai arôn khana khavakha ama’n amadu mihei hneng apektor ti hi nang in nahong manhret sik.”

³³ Ṭong kha inrangtak a hongkadik jo. Nebuchadnezzar kha mihringhei kâra inphut anhnongsōt a sehrat kapōa phi asâk jo. Radaitui achunga katla jo, khana asam in marhmu hme kapōa kaseia amatin kha vahei matin kapōa kaseia kae.

Nebuchadnezzar In Pathen Achoi ka-ân

³⁴ Rengpa khan ati, “Kum 7 a’nchaisō leh chungting bōirōk ka-en, khana kamalung hong kavâr jo. Ke’n Chunghnung Pathen kha kachoi ka-ân khana ahei tik a akahring ṭhak ama hneng kajana leh lûrna kapek a kae. “Ama’n aheitik a vai arôn sik, khana arengram phat rakip a ka-om ṭhak sik a kae.

³⁵ Ama’n ralei mihei heite kaemak kapōa a-en hei; marvâna ngevahei leh raleia mihringhei ama ratha neina thōia ka-om hei. Tûte inkhat in ama lungtup chunga inrepui tor mak hei. a-emak leh ama ṭōntlo chunga ṭongder nei tor mak hei.

³⁶ “Ke’n lung vârna kahong nei pha, kei kajana, kei lûrna, khana karengram lûrna kha kahnenga inpek male eng. Kei ṭōnpui karônhei leh kami kahrâng he’n kei anleirahlâng eng, khana kareng ratha neina leh kajana hmalaia kanek a akakhe chet kha inpek jo eng.

³⁷ “Khana tûnchu, Nebuchadnezzar ke’n marvân Pathen kha choi ka-ânna, kajana khana lûrna kapek jo. Atlo rakip kha akadik leh akaṭha rōk kae, khana inlensaktak a akatlohei kha thōi amathlaktor heia kae.”