DANIEL 3 - LEKHARABU INTHENG (BSI)

Sana Lim Kamukna sik Nebuchadnezzar Ṭongpek

¹ Rn Nebuchadnezzar in metre 27 inshâng khan chu metre 3 kapō avai, sana limsyem inkhat aleinei, hiva limsyem hi Babylon ramṭhen shunga aka-om Dura inti phaichama aleimatunga kae.

² Khava sōa reng in ṭōnpui karôn rakip anhong intûpna sik a ṭong apek jo hei– rengsa, vaikarôn, vaikarônhei hnōidet, ṭōn nganse hei, sêr leh sum katinta, ṭong katan, ṭong pekna kaneihei leh ramṭhen shunga ṭōnkarôn rakip. Anmani kha reng Nebuchadnezzar in aphunsōt limsyem kha tōksōtna rōia ahong katla sik hei kae.

³ Khava ṭōnpui karôn rakip kha milim tōksōtna rōia khan anhonga milim hma a khan anngir pha,

⁴ rasa inhnaktak inkhat ka-ônga ahri, “Phung leh jât rakip khana ṭong rakip a mihei!

⁵ Nangni’n pengkun rasa nanthei sik, inṭhōia bunglir, ṭingṭang, sitar leh serângdâr rasa hei khan anheijui sik; khava sōa aralak rasa rakip inhring rasa nanthei sik. Mahring rasa nantheilim bât leh nangni a’nkun sik chei khana Reng Nebuchadnezzar in aphunsōt limsyem hi nantakamuk sik kae.

⁶ Tu inkhat a’nkunmak khana a’nmukmak kha hmeipui shunga hlon mathlâk sik kae.”

⁷ Khang’khan mahring rasa kha antheilim leh, jât, phung leh ṭong rakip a mihe’n inkun jo hei khana Reng Nebuchadnezzar sana limsyem matungsōt kha ankamuk jo.

Daniel Loi 3 hei Ṭong Juimak jâra Masetna

⁸ Khava sōa chu Babylon mi ṭhahrep in Jehudihei masetna sik pha kha anlo jo.

⁹ Anmani’n Reng Nebuchadnezzar hneng anhri, “Reng Kalûr, ahei tik a hringṭhak roh!

¹⁰ Reng Kalûr nang in ṭongpek namasō, mahring rasa a’ntheilim bât leh mi rakip a’nkun sik hei khana sana limsyem kha antakamuk sik kae nati,

¹¹ khana tu inkhat a’nkunmak khana sana limsyem inmukmak mi kha hmeipun shunga hlon mathla sik kae nati.

¹² Babylon ramṭhen karôn sik a nang in namatung Jehudi ṭhahrep – Shadrach, Meshach khana Abednego hei kha Reng Kalûr naṭong kajuimak hinahin ka-om jo hei. Anmani’n na-pathen kha kamuk mak hei khana namatungsōt limsyem a khan inkun mak hei.”

¹³ Khana, rengpa kha ahnuk kana hêr jo khana mi 3 hei kha ahmai kunga heiṭhōina sik a ṭong apek jo hei.

¹⁴ Ama’n anhnenga ahri, “Shadrach, Meshach, khana Abednego nangni’n ka-pathen kamuk sik leh kamatungsōt limsyem hneng inkun sik hnōm mak chei ti hi akadiktak mo?

¹⁵ Tûnchu, nangni’n pengkun, bunglir, ṭingṭang, sitar, serângdâr khana aralak inhring rasa nanthei pha, inkun inna limsyem hi kamuk ruh. Nankamuk mak inchu, nangni inranga hmeipun shunga hlon mathlak sik chei kae. Nankahuk inhringtor pathen lak ka-om tia nantamandon mo?”

¹⁶ Shadrach, Meshach, khana Abednego he’n anleimasôn, “Reng Kalûr, keini’n kanbinga inhuksōtna sik tlomak ning.

¹⁷ Kantarajen Pathen in keini hmeipun a inphut khana naratha neina inphut anihuk tor ung inchu, ama’n ajōng tlo sik.

¹⁸ Ama’n atlo mak inum, Reng Kalûr keini chu napathen kha kamuk mak ning, khana nang in namatungsōt milim hnenga inkun mak ning.”

Daniel Loi 3 That sik a Ṭong Mathlak

¹⁹ Khava sōa Nebuchadnezzar kha ahnuk kana inkhâmtor mak jo, khana ama’n Shadrach, Meshach, Abednego chunga hnuknat pum a a-en heia ahmai kasensō jo. Ahnuk kana jo. Khava jâra ama’n hmeipun kha hma a kanek a vōisari kakhe chet a manlumna sik ṭong apek jo hei.

²⁰ Khana ama’n aremihei kâra akahratpen hei hneng mi 3 hei kha khit a hmeipun shunga hlon mathlâna sik ṭong aleipek hei.

²¹ Khava jâra anmani ankhit jo hei, pui katluk a pōn leh der invon hei, zakkō, pōnsi, lukhu, khana heirakip hmeipun shunga anhlon mathlak jo hei.

²² Hmeipun kha inhnaktak a manlumna sik Rengpa’n ati jâra hmeimale khan hmeipun shunga mi kaṭhōi inhlut remihei kha akânghlon jo hei.

²³ Khava sōa a’nkhit a ka-om Shadrach, Meshach, Abednego hei kha hmeipun shunga katla jo hei.

²⁴ Manhret phâkloa Nebuchadnezzar khan inlak asak hêra kangirsōt jo. Aṭōn karônhei kha ader hei, “Eini’n mi 3 nikhit heia hmeipun shunga nihlon mathla hei changmak a mo?” Anmani’n anmasôn, “Kadik, Reng Kalûr, khanga nitlo.”

²⁵ Ama’n ader hei, “Khan chu heisa mo mi 4 hmeipun shunga akase lele kahmu hei? Anmani inkhit mak hei, antak intônna heite inhmu mak, khana manlinapa son ngeva apōa kae.”

Mi 3 Masōna khana Ṭōnhmun Kalen Pekna

²⁶ Khava jâra Nebuchadnezzar in hmeipun omna kot a kasea abek a, “Sadrakh! Meshach! Abednego! Chunghnung Pathen sōk-hei! Heisōk ruh!” Inrangtak a heikasōk heia kae.

²⁷ Rengsahei, vaikarônhei, vaikarôn kahlanga inṭang hei, alak rengpa ṭongkarôn rakip hmei in akâng tor mak mi 3 hei ka-en sik a intûp jo hei. Anmani ansam leh anpōn leikângmak, khana antak chunga hmei marim semak a kae.

²⁸ Rengpa’n ahri, “Shadrach, Meshach, khana Abednego hei Pathen manpâk ruh! Ama’n angeva ajōng tira ama inzen leh akataksen mihei hi ahuksōt hei kae. Anmani’n kaṭong pek juimak hei khana an-Pathen tei loa pathen ralak hneng inkuna kamuk sik kanek a anhringkhō inrimna jôk kha anthōk.

²⁹ “Khana tûnchu ke’n ṭong pekna kanei kae, tu jât, phung, ṭong achang inum Shadrach, Meshach, Abednego hei Pathen kajaloa ṭongkahri mi kha akut, ake dorthlek sik, khana a-inn suk manhmanga da sik kae. Hiva kapōa akahuksōt tor pathen lak om mak.”

³⁰ Khana rengpa’n Shadrach, Meshach khana Abednego hei kha Babylon ramṭhen shunga ṭōnhmun kalen chet apek jo hei.