DANIEL 12 - LEKHARABU INTHENG (BSI)

Achaina Pha

¹ Pōn innem kasi ngeva khan ahri, “Khava pha nami kahngâk ngeva kalen Michael, he’nlâr sik. Khava sōa jât he’n anhei ombia inphut akaṭhamak tak omchen, inrengna pha kha kahong sik. Khavakha ahong pha, Pathen lekha shunga a’nzet najât mi rakip huk sik hei kae.

² Aleikathi hei kâra mi katamtak kahring nôk sik hei, khana ṭhahrep chu kumleikōa hmaimôkna kha anchen sik jo.

³ Hlamkakei kasinghei khan marvân vârna rakip leh heikasōk sik jo hei. Khana akaṭha tlona sik a mi katamtak hnenga mantheina kaneihei kha ârsihei kapōa ahei tik a ka-om sik jo hei.”

⁴ Ama’n kahnenga ati, “Khana tûnchu, Daniel, lekha kha makhu jo roh, ralei a’nhmangmak kârseng mêrchîkna nam jo roh. Khava shung senga hei omchen mo akasōk sik antia, manhretna sik antloa, mi katamtak in môksek a pha anmanhmang sik.”

⁵ Khava sōa mi 2, tuipang inkhat et a mi inkhat et akangir hei ke’ n kahmu hei.

⁶ Ankâra inkhat khan tuidung chungtinga akangir ngeva hneng ader, “Hiva det-hla ka-om omchen hi a’nchaina sik heituk mo alakasôt sik?”

⁷ Ngeva khan akut 2 marvânting akalânga, Kumleikō Pathen rahminga intepna anei jo. Ama’n hinga ahri kha ke’n kathei, “Hivahi kum 3 leh thla 6 sik kae. Pathen mihei suk manrimna kha a’nchai leh, hihei rakip hi ahei kasōk sik kae.”

⁸ Aṭong hri khachu kathei, tâk-kha heitina mo manhret mak eng. Khava jâra kader, “Tâk-kha Oja, heikhonga mo khahei rakip kha a’nchai sik?”

⁹ Ama’n amasôn eng, “Daniel, nang tûn akase sik jo che kae, ajârchu hiva ṭonghei hi pha a’nchaimak kârseng thup a da sik hei kae.

¹⁰ Mi katamtak manthengsōt sik hei kae. Malung kaṭhamak-hei khachu manhret theimak hei ning tâk khanga ṭhatmak antlo manjōm sik; mikasing rōk he’n anmanhret sik.

¹¹ “Ani tina inthoina manbâng ninga inphut, Ṭit ka-om tak Inrimna pha khana inphut kani 1,290 kathleng sik.

¹² Kani 1,335 athleng katlunga taksentak a aleika-om hei kha mikahōihei kae!

¹³ “Daniel nang chu, achaina katlunga taksenthei chang roh. Nang chu kathi sik che, tâk pha inchai ning khan nang tloman inhlâng sik a kathō sik che.”