DANIEL 1 - LEKHARABU INTHENG (BSI)

Daniel leh Aloihei Thuhminghei ( 1.1—6.28 ) Nebuchadnezzar Inna Retherhei

¹ Jehoiakim in Judah reng achangna kum 3 ahongtluk kum a, Babylon reng Nebuchadnezzar in Jerusalem re aleisō khana khōpui kha aleikake khuma kae.

² Rōngpu’n ama kha Reng Jehoiakim amansura Bek-inn shunga karōi ṭhahrep amanchoma kae. Ama’n ahei surmi ṭhahrep Babylona apathenhei bek-inna aheiṭhōi hei, aheichomsōt karōi kha abek-inn karōi bukna ada hei.

³ Rengpa’n aṭōnpui karôn, Ashpenaz hneng, rehringa anta heisur Israelhei kâra reng innkōshung leh mikalen innkō shunga retherhei kadeisōtna sik ṭong apek jo.

⁴ Anmani kha anhme akaṭha sik, akasing sik hei, kaṭhadek a inchuna kanei, inranga inhret tor, khana taksa nōrna kase, hei kha reng innshunga razenna annei torna sik a kadei sik hei kae.

⁵ Anmani kha ani katai reng inna mihei kapōa thlai leh ju pek sik hei kae, tia reng in ṭong apeksa hei. Hiva manchuna hi kum 3 atluksōa anmani reng hmaikunga a’nlâr sik hei kae.

⁶ Kadeisōt hei kâra Daniel, Hananiah, Mishael khan chu Azariah inveisa hei, ankhenga Judah phung mihei kae.

⁷ Ṭōnpui karônpa khan anmani kha rahming ther aleiphō hei: Belteshazzar, Shadrach, Meshach, khana Abednego tia aleiphō hei.

⁸ Daniel chu reng inna ju leh thlai ina beklanga ataksa mannim mak sik a leikangir jo, khava jâra ama’n Ashpenaz hneng inthōpuina aleider,

⁹ Pathen in Ashpenaz kha Daniel chunga lungsetna amannei jo.

¹⁰ Achang ravâng Ashpenaz in rengpa aleiṭit, khava jâra ama’n Daniel hneng aleihri, “Rengpa’n nangni sik sâk leh in amantluksō jo, khana alak retherhei kapōa nantaksa aṭhatmak inchu ama’n kei athat thei eng.”

¹¹ Khava jâra Daniel in ama ka-ensui sik a Ashpenaz in anganse kot kahngâkpa hneng leh aloi 3 hei hneng kasea aleihri.

¹² Ama’n ati, “Keini ni 10 sō leh a-enmansin roh. Anse-hleina leh tui rōk apek ruh.

¹³ Khava sōa reng inna thlai kasa retherhei leh keini atekâk ruh, khana kanhme heikhong mo akachang nahmu dungjuia ṭong tan roh.”

¹⁴ Ama’n anmani kha ni 10 katlunga enmansinna sik kahnōm jo.

¹⁵ Apha kha ahong tlung jo pha, khava reng inna thlai kasâk rakip hei kanek a antak kaṭhadet jo, ratha anneidet a inhmu jo hei.

¹⁶ Khana inphut kot kahngâkpa khan anmani kha, rengpa’n apek hei thlai kahlanga anse-hleina amansâk jo hei.

¹⁷ Pathen in rether 4 hei kha lekha tinga leh mandonna singna leh themna apek hei. Hiva chunga ama’n Daniel chu hmangtalâr leh rahmang malesōt theina ratha apeksa.

¹⁸ Rengpa’n atep kum 3 kha a’nchai jo pha, Ashpenaz in rether rakip Nebuchadnezzar hneng aleiṭhōi hei.

¹⁹ Rengpa’n anmani ankhenga a’nbekpui hei, khana aralak-hei kanek a Daniel, Hananiah, Mishael khana Azariah he’n ama malung anleimathluk det a kae. Khava jâra anmani kha reng-innpuia mi kachang jo hei.

²⁰ Rengpa’n ṭong ader rakip, a-emak leh ṭong kakhôk aheikeisō rakip, ama rengram pumpuia ṭong kasânhei leh dôi leh ai kathemhei kanek a hiva mi 4 hei hin aṭhen sôm kakhea anmanhret det a kae.

²¹ Persia reng Cyrus in Babylon rea ator mak hma seng Daniel kha reng inna leika-oma kae.