COLOSSIANHEI 3 - LEKHARABU INTHENG (BSI)

¹ Nangni Christa leh inṭhōia akahring sik a keimathōi jo chei kae, khava jâra Pathen changtinga Christa’n areng in-ongna chunga a’ntungna marvâna neinâk-hei chunga nanmalung manhlut ruh.

² Khava hmun a neinâk-hei chunga nanmalung datlit ruh, hiva ralei neinâk-hei chunga damak ruh.

³ Ajârchu nangni kathi jo chei, khana nanhringkhō kha Pathen hneng Christa leh inṭhōia a’nthup jo kae.

⁴ Nangni hringkhō kadiktak kha Christa kae khana ama ahon’lâr pha leh nangni’m ama leh ho’nlâr sik chei, khana alûrna nan chensap sik jo!

Hringkhō Marō leh Ather

⁵ Nanshunga ṭōnkatlo raleichung tamadu leh tarangei hei khachu nantathat nger sik hei kae, khahei khachu: jông leh kik katlo, omchen kase, hur leh êm, ṭhatmak maduna, khana phâmrai kase, (phâmrai kase hi limsyem kamukna inkhat kae) hihei seng hi kae.

⁶ Hihei jâra hin aṭong kajuimak hei chunga Pathen hnuk natna ajōng katlung sik kae.

⁷ Nangni’m pha khat a khahei kha’n nanhringkhō anleimatu lai chu, khava maduna dungjuia leikahring cheia kae.

⁸ Tâk-kha tûnchu hihei rakip leh a’nṭhen sik chei kae, khachu: hnuknat, maduna, in-enkadana malungrôn. Mi manzakna a-emak leh ṭong kange nanbeia akasōk hêrmak sik kae.

⁹ Inkhat leh inkhat maleisei intlo mak ruh, ajârchu nantak marō leh a-omchen ngai kha nantahlonsōt jo kae,

¹⁰ khana taksather a’nvon jo chei kae. Hivahi pui katluk a ama manhret theina sik, aka-Syempa Pathen in ama ralim shunga amanther ṭhak, mither kha kae.

¹¹ Khava jâra, Jât-hlop leh Jehudi, vuntan leh vuntanlo, mikase, akatlasam, sōk leh masōhei, heite in-ang makna om mak; tâk Christa kha heirakip kae, heirakip a Christa kha kae.

¹² Nangni Pathen mi chei kae; atâ kachang sik a alungset chei khana akadei jo chei. Khava jâra lungsetna, lum lona, insinsakna, nunkahōi leh dehratna kha a’nvon nger sik chei kae.

¹³ Nangni tu mo inkhat in mi inkhat chunga inphinna anei pha, dehrat ruh khana inngei indam ruh. Rōngpu khan arangei mandam chei kapōa, nangni khat leh khat a’nngei indamtō nger sik chei kae.

¹⁴ Hiva rahōi sōkna rakip a hin, heirakip pui katluk a akakhit inchun, lungset kha besa ruh.

¹⁵ Christa tapek chei mōngna kha ṭong mathlakna chunga nanhlam kakei sik kae; ajârchu Pathen in taksa pumkhat a abek manchun chei kha hiva mōngna hin kae. Khana manpâk them ruh.

¹⁶ Christa ṭong kha aṭhatna rakip leh nanmalung shunga aka-om sik kae. Khat leh khat singna rakip vâng inse intheitō ruh. Inpâk hla, bek hla, hla intheng hei sak ruh; nanmalunga Pathen manpâk leh inṭhōia hla sak ruh.

¹⁷ Heirakip nanta hri leh nantatlo kha, ama inphut Pa Pathen kha manpâkna, Rōngpu Jesu rahminga nantatlo sik kae.

Hringkhōther shunga Inkhat leh Inkhat Inmatna

¹⁸ Nupuihei, nanpuise hei ṭong jui ruh; ajârchu hivahi nangni Christianhei tatlo sik kha kae.

¹⁹ Puisehei, nannuhmeihei lungset hei ruh, khana anchunga nanhnuk manse mak ruh.

²⁰ Naipanghei, nannu nanpahei ṭong nantajui ṭhak sik hi Christian nangni ṭōnhlam kae, ajârchu khava khan Pathen amantlaia kae.

²¹ Nu leh pahei, nansahei anhnuk manthakpek mak hei ruh, akinchu anmalung katla khâk sik,

²² Sōk-hei, heirakip a ralei mihring changna nankapu hei ṭong jui ruh, anmanṭhatna chei madu jâra anhmaikung rōk a tlona changloa, Pathen kha kajana nei jâra malung inthengtak a tlo ruh.

²³ Nantlona rakip a, mihring sik a ṭōn a’ntlo changloa, Rōngpu sik a ṭōn a’ntlo kapōa malung kahluttak a tlo ruh.

²⁴ Rōngpu khan amihei sik chen amantluk tloman kha nangni apek sik chei, mandonsōt ruh. Ajârchu razenna nantatlo akapu kadiktak kha Christa hi kae.

²⁵ Khana ṭōn kadikmak katlo mi kha atloṭhe dungjuia a’npek male sik kae; ajârchu Pathen in mi rakip a’n-angtling dân vânga ṭong atan kae.