COLOSSIANHEI 1 - LEKHARABU INTHENG (BSI)

¹ Pathen manṭhatna dungjuia Christa sonle inkhat kachang Paul leh nisōpui Timothya inphut,

² Colossaea Pathen mihei Christa leh inchunna shunga taksen ka-om sōpuihei hneng kantahei mazet kae: Ni-Pa Pathen in maritna leh lung mōngna pek chei rasoh.

Manpâkna Derna

³ Keini’n nangni sik kander pha, ni-Rōngpu Jesu Christa Pa Pathen hneng ahei tik a manpâkna kanpekṭhak a kae.

⁴ Ajârchu nangni’n Pathen mi rakip nantalungset leh Jesu Christa a nantaksenna kha kantheia kae.

⁵ Hma inkeitak a Ṭong kaṭha, akadik ṭong nanhnenga ahong pha khan inhōrna apekna chei kha nanthei jo. Khava jâra marvân chunga nangni sik a injentak a aleika-om sik a inhōrna nantanei chunga khan nantaksenna leh lungsetna hei hi’m a’nhnga hei kae.

⁶ Nangni kâra hma inkeipen kania Pathen maritna nantaleithei a’nchênkhet nantamanhret kapōa, ṭong kaṭha hin vânhnōi pumpuia mahâmṭhatna ajōng rôn ṭhak a inthangsō joa kae.

⁷ Hiva Pathen lungsetna hi keini kahlâng kathlenga Christa sik a ṭōnkatlo taksenthei kachang kansōk changpui Epaphras a inphut nanleitheia kae.

⁸ Rathla’n lungsetna apek chei kha ama’n kanhnenga ahri pek jo ung.

⁹ Khava jâra keini’n nangni ṭong kanthei lim a inphut derna kanneipek ṭhak chei. Arathla tapek chei manhret theina leh singna rakip leh inṭhōia alungdo manhretna kha amansipna sik chei keini’n Pathen hneng kanderpek ṭhak cheia kae.

¹⁰ Khana inphut ahei tik a Rōngpu malung tlaina ṭōn nantlo sik khana alungdo dungjuia kahringthei sik jo chei. Khana Pathen manhretnating kakhang sik chei khana nanhringkhōa ṭōn kaṭha rakip kara kanei kachang sik jo chei.

^11-12 Nangni’n heirakip nande mansôt torna sik ama lûrna ratha hratna inphut akajōng ratha neina rakip vâng khan nangni manngar chei rasoh. Vâr khōpuia Pathen in amihei sik a amantluk chen kanei sik a rahōi kasōk a nankasyem Pathen kha ningṭhat pum a inpâkna pek ruh.

¹³ Ama’n eini khō inthim ratha hratna inphut ahuksōt jo me, khana asapa marit rengram shunga kahringa aṭhōi manhlut jo mea kae,

¹⁴ ama’n eini nining nihnōma amasō jo me, ti chu nisetnahei arangei mandam jo.

Christa leh Aṭōntlo

¹⁵ Hmutheilo Pathen kha hmutheia Christa kha kae. Ama kha Sapa hma inkeipen, neinâk insyem rakip kâra chung katōngpen kha kae.

¹⁶ Ama vânga Pathen in marvân leh raleichunga heirakip, hmuthei leh hmutheilo rathla ratha neina, rōngpuhei, vaikarôn leh ṭong kanei rakip asyema kae. Pathen in vânhnōi ralei hi ama sik a, ama vânga asyem kae.

¹⁷ Christa kha heirakip a-om mak hma leika-om, ama leh inchunna thōia heirakip anhmun et a ka-om hei.

¹⁸ Ama hi ataksa, bekrup lu kha kae; ama hi ataksa hringna kung kha kae; ama’n heirakip chunga hma inkeipen hmun kha achen theina sik, thina inphut keimathōi Sapa hma inkeipen intet kha kae.

¹⁹ Ajârchu Sapa khan abing chunga Pathen changna omngai pui katluk a anei sik hi Pathen manṭhatna jâra kae.

²⁰ Khana Sapa jâra vânhnōi ralei pumpui ahnenga aṭhōi male nôk sik hi Pathen manṭhatna kae. Thingrake chunga Asapa thisen vâng khan Pathen in malung daina asyema khana marvân chunga leh raleichunga heirakip ahnenga aṭhōi male nôk heia kae.

²¹ Pha khat a nangni’n ṭōn kaṭhamak nanleitlo khana nanmandon jâra Pathen inrepui leikachang cheia le’nkâr chei.

²² Tâk-kha tûnchu, Asapa taksa a athina vâng khan ahmai kunga nangni masetna kasea, inthenga, inlâr senga aṭhōi manhlut theina sik chei aṭhōn inkhat a asyem jo chei kae.

²³ Adek a, nangni’n akahnet leh akadik ngir hmun chunga taksenna kha nantaneiṭhak sik kae, khana nantathei ṭong kaṭha a inphut nan-inhōrna chunga khan a’nhlingjen mak sik chei kae. Hiva ṭong kaṭha sik jâra hin Paul kei sōk inkhat akachang eng kae, hiva ṭong kaṭha vânhnōi ralei mi rakip hneng akahrile sik a.

Bekrup Sōk inkhat a Paul Ṭōntlo

²⁴ Tûn ke’n nangni sik jâra khōdeng kathei hi inpâk eng, ajârchu kataksa khōdeng theina vâng hin ataksa kachang bekrup kahlanga Christa khōdeng theina sik alaka-om kha pui mathlukna sik ka’nthōpui kae.

²⁵ Nangnihei sik ṭhattheina ṭōn anikapek Pathen khan kei bekrup sōk sik a asyem jo eng kae. Hivahi aṭongpui katluk a hri manthangna sik a ṭōn kha kae,

²⁶ khavakha kumsôt a mi rakip hnenga aleithup ṭong in-ip, tûnchu amihei hneng aphôngsōt jo kha kae.

²⁷ Mi rakip sik a akanei akahao leh akalûr ṭong in-ip hi, amihei tamanhret sik a Pathen ṭōnmantluk kae. Khava ṭong in-ip khachu Christa kha nanshunga ka-om ti kha kae, hivahi Pathen lûrna nanchen sappui sik tina kae.

²⁸ Khava jâra mi rakip hneng Christa hi kantahri manthang kae. Mi rakip Pathen hmaikunga Christa leh inchunna shunga anbing et a pui katluk mi anchangna sik, singna rakip vâng gîkna leh mansena kannei hei.

²⁹ Hiva tlosōtna sik, Christa tapek eng kashunga ṭōnkatlo akator ratha kha kahmanga insuk inbōitak a inṭang eng.