A’NPHUTNA 8 - LEKHARABU INTHENG (BSI)

Tuishânglen A’nchaina

¹ Pathen in Noah leh rakōng shunga ka-om ranhring rakip hei kha mahngi mak hei, ama’n thli inkhat amanhrânga khava khan tuishânglen kha tlâksuk inphut joa kae.

² Ralei thōia tuikapût akhâm jo. Chungvân tinga tuilen kot inkam jo, khōtui tlâk mak jo.

³ Kanikhō 150 shunga tui kha jâ-jâma katlâk suk jo.

⁴ Thla 7 tlukna ni 17 tluk ning rakōng kha Ararat inti tlâng chunga inhnga jo.

⁵ Tuikalen kha khanga katlâk suk a thla 10 tlukna ahma inkei kani ning tlânghmor inshâng kha le’nlâr jo.

⁶ Ni 40 kahnunga Noah khan kotte inkhat amahlânga,

⁷ khana va-âk inkhat amasōa atirsōt. Va kha hong inlemak jo, kachanga tuilen kha akhenga atlâksuk mak kârseng kajōng lelea leika-om.

⁸ Khava kâra, tuilen kha akatlasuk jo mo ti aka-en sik a vaṭhu inkhat atirsōt,

⁹ tâk tuilen khan ram rakip alakachûmsō jâra vaṭhu khan chōngna sik hmun hmumak a rakōnga hong inlea Noah’n akutbân azera vaṭhu kha asura athōn manhlut nôk jo.

¹⁰ Ama’n ni 7 ahngâksō kahnunga vaṭhu kha atirsōt nôk.

¹¹ Khōhlei ting hin olive bō kahring ather inkhat abeia aheitlena ahnenga hong inle. Khana inphut Noah khan tuishânglen kha katlasuk jo ti kha amanhret jo.

¹² Khana ni 7 ahngâksa nôk a, khava sōa vaṭhu kha vōi khat atir nôk; tuna chunga chu vaṭhu kha hong inlemak jo.

¹³ Noah akum 601 atluk pha ahma kakei thla a kani hma inkeipen ning tuishânglen kha katlâk suk pet jo. Rakōng phuchung makhuna kha Noah’n amahlânga asîr aven akimve heia a-en lelea ralei kachâr kha ahmu jo.

¹⁴ Thla hni tlukna kani 27 ning raleichung kha kachâr pet jo.

¹⁵ Pathen in Noah hneng,

¹⁶ “Ra-kōnga inphut nanuhmei nasahei leh annuhmei heirakip heisōk jo ruh.

¹⁷ Va leh sha rakip ṭhōisōt heiroh, raleichung anhlōsōa sa leh te anneia anpung theina sik masō hei roh,” ati.

¹⁸ Khava jâra Noah’n rakōnga inphut anuhmei, asahei khana anmani nuhmeihei leh inṭhōia kasōksōt jo hei.

¹⁹ Rakōng shunga sha leh vahei kha anruprup a abân bâna heikasōk hei.

Noah’n Inthoina Atlo

²⁰ Noah’n Rōngpu hneng maichâm inkhat aleisyem. Ama’n inthoina a’ntheng sha leh vahei kakip a inkha-khat ahei choisōt a maichâma apum a aro mankhut hei.

²¹ Inthoina marim khan Rōngpu malung kha katlâi joa abinga, “Mihringhei tloset jâra avea ralei hi hâksêr mak jo ning; ansinlaia inphut anmandonna hei kha ṭhaphung mak ti hi kamanhret. Ke’n tuna katlo kapōa ahei tik a’m akahring hei hi suk manram mak jo ning.

²² Vânhnōi ralei a-om kârseng avor pha alōk pha ka-om sik. Akalum leh akadai, sûr leh ṭhe, sûn leh jân ka-om ṭhak sik jo,” ati.